Геройёсыз — гурт калык

Удмурт Дунне
By Удмурт Дунне Март 21, 2017 17:07

«Удмуртия» издательствоын берло печатлам книгаос пӧлысь одӥгез — Константин Емельяновлэн «Яратонэз уд алда» бичетэз (12+).

Константин Емельянов вордскемын но вань улонзэ ортчытэмын Эгра ёросысь Мазьги гуртын. Ньыльдон арлэсь ятыр тыршиз «Рассвет» колхозын. Вал тракторист, кладовщик, ремонтной мастерскойлэн кивалтӥсез, наладчик. Гуртысь механизатор ваньмон дыръяз кияз ручка кутылӥз, улонын пумиськылӥсь учыръёсты тетрадьёсаз гожъяз, бӧрысь соосты веросъёсаз пыртылӥз. Солэн веросъёсыз, очеркъёсыз но серемес чуръёсыз «Ветлӥ меда, ӧй меда?», «Бускельёс», «Эшъёсы-юлтошъёсы», «Пилиськем горшок» книгаосаз пыртэмын.

Кемалась ик ӧвӧл вордскиз кема витем книгаез — «Яратонэз уд алда». Вакчи веросъёсыз сяна, отчы пыртэмын «Кулак кен» повестьысь люкет но «Яратонэз уд алда» кузьмадёс. Одӥгез жаль: улэп дыръяз автор та книгазэ адӟыса ӧз вутты. Кылем арын сентябрь толэзе, 90 аресэз тырмон азьын, улонысь кошкиз.

Константин Васильевич гуртоосызлы, удмурт литератураез вань гажасьёслы   гожтэм чуръёссэ кузьмаса кельтӥз. Солэн веросъёсысьтыз геройёс ас котырысьтыз синйылтэмын — гуртысь огшоры адямиос. Та вие мазьгиос солэсь книгазэ вожмаськыса лыдӟо, котькуд гожтэм учырысь кинэ ке тодманы выро.

 Валентина Кутузова

 

Удмурт Дунне
By Удмурт Дунне Март 21, 2017 17:07