Депутатэ куриськисьёс йыло

Удмурт Дунне
By Удмурт Дунне Март 15, 2017 17:06

Нуналаз 3-4 муртлэсь куриськон вуэ.

Туэ 10-тӥ сентябре Кун Кенеше быръёнъёс ортчозы. Отчы кандидатъёсты быръён понна «Огъя Россия» партилэн праймеризэз радъяськоз.

Асьмеос бырйыны кулэ 60 депутат. Кун Кенешлэн Тӧроез, «Огъя Россия» партилэн шаерысьтымы ёзэзлэн секретарез Владимир Невоструев верамъя, 15-тӥ мартлы партилэн 26 кандидатъёсыз регистрация пыр потэмын ни. Кин ке одӥг мандатъем округъя, кин ке партилэн списокезъя, кин ке сояз но таяз быръёнъёсы пыриськыны медэ. Нуналаз 3-4 муртлэсь куриськон вуэ. Пӧлазы вань али гинэ вузысь потэм егитъёс но, шаермы понна трос кужымзэс сётыса ужам муртъёс но. Ог 300-500 кандидат люкаськоз шуыса, чакламын. Кандидатэ сюрон понна куронъёс сокем бадӟымесь ӧвӧл. Валтӥсез: тырмемын мед луоз 21 арес, мед луод Россилэн гражданинэз, судимостед медаз луы. Куриськонъёсты басьто котькуд ужан нуналэ.

Быръёнъёс умой мед ортчозы шуыса, «Огъя Россие» пыриськисьёс кылдытӥзы нимысьтыз оргкомитет. Отчы шаерысьтымы 16 тодмо адямиос быръемын.

Миым Россиысь Кун Думае быръёнъёс вакытэ «Огъя Россилэн» праймераз лыктӥз шаерысьтымы 105 сюрс мурт. Вань бырйисьёс пӧлысь со 8,8 процент. Туэ праймериз дыръя ог 10 процентэз адямиос пыриськозы шуыса чакламын. Собере кандидатъёс дебатъёс пыр потозы. Котькудӥз ичизэ 2 дебатэз ортчыны кулэ, сотэк кандидатъёс радысь сое куштыны луоз. Дебатъёсы пыриськем сяна, кандидат аслаз округаз калыкен пумиськылыны кулэ на.

Владимир Невоструев верамъя, Кун Кенешысь ӝыныез депутат корпус выльдӥськыны быгатоз. Азьлань вамыштон, выль законопроектъёс кутон понна со пайдаё луоз. Шаермы понна ужаны дась муртъёсты шедьтоно но депутатэ поттоно, шуэ В. Невоструев.

Елена Сараматова

Туспуктӥз А. Горбунов

 

Удмурт Дунне
By Удмурт Дунне Март 15, 2017 17:06