Дарали Лели. Вожан

Удмурт Дунне
By Удмурт Дунне Март 7, 2017 17:00

Дарали Лели. Вожан

Мынам фин воргоронэ сӥзьыл кӧснуналлы быдэ нуллӥз монэ карлэсь палэнэ. Пичигес гинэ тып-тып коркаез ты дурын ик: котыраз ӵашетэ тыметэз ӟыгыртӥсь тэль. Палэзь, пашпу но тыпы сикын милемыз чакласа улӥзы кадь: пеймыт уйёсы террасаын ӵындыкуз, воргоронэ весь шуылӥз:

— Шӧдӥськод-а? Нош ик шорамы учко.

— Кин? — востэм юалляй мон.

— Нюлэс лулъёс.

Мон ӧй валалля, уродэн я умоен учко соос. Та бордын ужпум ӧй вал. Воргоронэ — Клаус вал нимыз — кема ӵындылӥз на террасаын огназ: тамак пумыз, ыгы син кадь пиштыса, нюлэс шоры мертчылӥз. Нюлэскын улӥсьёс — коньыос, урдоос но нардыос — со учкемлэсь курдаса, сикысь нырзэс ӧз потталлялэ. Буйгаса Клаус корка пырылӥз.
Со яратэ вал сиыны зумыт сӥль сиёнъёсты. Кӧснуналэ ӵукна ик мон лавкаысь басьтэм сӥль юдэслэсь шыд лым пӧзьтыны кутскылӥ. Обедлы со дась луылӥз. Ми ӵошен пуксьылӥмы зӧк тыпылэсь ӝӧк сьӧры но каллен, дыртытэк ӟузьылӥм шыдмес. Собере Клаус эстылӥз песятаеныз пуктэм вашкала гурез но азяз книгаен пуксьылӥз. Мон пужъятскылӥ яке писэез, алвылам пуктыса, пыӵъёсызлэсь сузялляй.
Ӝомал васькем бере Клаус книгазэ палэнъяз. Огаз нуналэ со, книга бордысь мозмытскытэк, шуак вераз:

— Кылӥськод-а? Нош ик вуизы ни. Котькуд ӝыт зынъяськыны вуо.

— Мар соослы кулэ?

— Тон.

Мон? Мар верамзэ валатэк, мон кышнопала кошки. Айшетме миськоно кариськи. Клаус ноку вожась ӧй вал. Со вожасьёсты, вожъяськисьёсты ӧз яратылы. Но малы ке оскылӥз: нюлэскын но солы вожъяськисьёс вань.

Мон потӥ террасае, миськем айшетме оши но, юзмыт омырен шокаса, сылӥсько. Зэм но, тэльысь ог-огзы сьӧры ватскем писпуос пӧлын кин ке вань кадь потӥз. Мон тэль шоры учкыны кутски. Со но шорам. Озьы ми кема сылӥм. Нюлэс синзэ ӧз вошъя. Мон но. Вити, кин нырысь сётскоз.
Вӧзам выж пул ӟукыртӥз. Клаус матэктӥз.

— Эн берыкъяськы. Учкы шораз, — косӥз со.

— Учкисько.

Клаус тыбыр сьӧрам султӥз. Мон шӧдӥ, кызьы со, пель но чырты котырам шокаса, сылэ но учке отчы ик, кытчы мон. Нюлэслэн синмыз кыкнамес ик сӥсъя. Мон шӧдӥ, кызьы нюлэс вожа…
Клаус ӝутӥз юбкаме но ӝиптӥз монэ бордаз. Тӧл ӝутӥз сӥзьыл куаръёсты, нуиз соосты умме усись ву вылэ. Тӧллэсь нюлэс шуэрскиз, куашетыны, шаугетыны шӧтаз. Мынам воргоронэ нюлэс азьын ик кылиз монэ — писпуосты куаръёстэк кельтӥсь тӧл сямен…

— Уг яра тазьы, — шуи гинэ мон, чупамъёсызлы пумитъяськыны быгатытэк.

— Мед адӟоз, — чурыт вазиз со. Пӧсь ӟыгыръяз монэ — но учкиз ты сьӧрын ӵашетӥсь тэльлэн мураз…

— Кошкиз. Уг ни пишто синъёсыз, — вазиз Клаус, юбкаме лэзьяса. Тамаксэ кенжытӥз.

— Тон сое улляд, — верай мон. — Со табере уз ни лыкты.

— Медам лыкты.

— Нош тон сотэк уд быгаты, дыр. Тыныд… учкись кулэ.

Мон корка пыри.

Клаус кема сылӥз на.

Уйин изён азьын Клаус нош ик потӥз кыре кыскыны. Кыскиз ӝог, берен пыриз. Мар ке воштӥськиз, но мон со воштӥськонэз валаны ӧй быгаты.

Вуоно кӧснуналэ Клаус поттӥз монэ нюлэс азе шыр гольык —  нокыӵе учкись ӧй вал ни.

Коркаямы но, котыраз но туж мӧзмыт потыны ӧдъяз. Озьы ми кар сьӧрысь коркаямы шергес но шергес ветлыны кутским кадь.

Кӧня ке ар ортчыса, Клаус кулэм бере ни, мон вуылӥ на со интые. Ты куасьмем. Мон султӥ террасае но кема сылӥ учкыса векчи куакъёсын алям ярдур шоры. Тамак кенжытэме бере потӥз: нюлэс пыдсысь шорам кин ке учке. Соку ик мон шӧдӥ Клауслэсь шокамзэ — йыртышкам, пель дорам… Шӧдӥ кускам тырем кужмо киоссэ, бордаз ӝиптэмзэ, но шуак йыры берганы ӧдъяз. Тӧл пумитам куаръёсын шильыртыны кутскиз.
Нюлэс пеймытысь вожась тылъёс чилектӥзы. Нюлэс ваньзэ адӟиз но валаз. Мынам потэ вал, мед со адӟоз, мед валалоз но вожъяськоз мыным. Мед со вожалоз на, берпуметӥзэ…

ДАРАЛИ ЛЕЛИ

 

Удмурт Дунне
By Удмурт Дунне Март 7, 2017 17:00