Чильпаса керттэм шудонъёс

Удмурт Дунне
By Удмурт Дунне Март 9, 2017 09:27

Укно дурын уло пингвин, лудкеч, коӵыш.

Мыным 23 арес. Егит анай. Кемалась потэ ни вал крючокен чильпаськыны дышетскеме, малпанэ быдэсмиз.

Вень борды басьтӥськи пиналылы 8 толэзь дыръя. Умой, али Интернетын ваньмыз вань. Озьы кутски учкыны видео урокъёсты. Нырысетӥ уже — нылылы гужем нуллон дэрем.  Пӧрмиз. Алигес шудонъёс лэсьтылыны, озьы ик салфеткаос чильпаны дышетски. Туж яра. Ачим но куанӥсько, нылылы но шудонъёсыз ярало.

Тужгес капчи керттыны пингвинэз. Нимаз керттӥсько мугорыз, синъёсыз, нырыз, бурдъёсыз, пыдыз, йыре пононэз. Ваньзэ чильпам бере та люкетъёсты ог-огзы борды тэчоно.

Пушказ вата я синтепон выллем маке туйнано, мугорыз мед возиськоз шуыса. Секытгес каремды потэ ке, быгатӥськоды юромо вузаськись шарикъёс пушказ поныны.

Та пингвинэз чеберманы луэ на, мон керттӥ шарф, изьы.

Малы кулэ киужен вырон?

Киужен вырись адями гань-гань луэ.

Ки, чиньыос векчи ужез быдэсъяку, йыр но ужа. Озьы чыры-пырыосты адӟыны, дунне шоры творческой синъёсын учкыны кутскиськод. Умойгес луэ йырсазь но.

Киужен вырон уксёез шыръя. Котьку луэ вужезлэсь выльзэ пӧрмытыны, пыдвыл керттыны, коркаез чильпам, пужъятэм ужъёсын чебергес карыны.

Елена Черанёва

 

Удмурт Дунне
By Удмурт Дунне Март 9, 2017 09:27