Чернобыльлэн яраосыз висьыто

Удмурт Дунне
By Удмурт Дунне Март 14, 2017 15:28

Чернобыльлэн яраосыз висьыто

Котрес ӝӧк сьӧрын пумиськон сюлмысь вераськонлы пӧрмиз: сюлмаськытӥсь ужпумъёсты ӝутэм сяна, чузъяськизы тау карон кылъёс но.

Элькунысьтымы 2 сюрс 500 пала адями пыриськиз Чернобыльын пуштон бервылэз утялтонэ. Кызьы соос туннэ уло — та ужпум эскеремын Кун Кенешысь котрес ӝӧк сьӧрын.

Чернобыльын авария луэм дырысен 30 арлэсь кема ортчиз. Но солэн бервылъёсыз туннэ но шӧдӥсько. Пуштон бервылэз утялтонэ элькунысьтымы пыриськемъёс пӧлысь туннэ 1 сюрс 500 адями улэп. Таосызлэн но тазалыксы ушъяськымон ӧвӧл. Кыӵе шугъяськонъёсын соос пумисько? Та ужпум эскеремын котрес ӝӧк сьӧрын. Ужрадэз нуиз Кун Кенешысь Тазалыкез утёнъя, демография но семья политикая ялан ужась комиссилэн кивалтӥсез Светлана Кривилёва.  Пумиськонэ люкаськылӥзы депутатъёс, Тазалыкез утёнъя министерствоысь специалистъёс,  эмъян учреждениослэн валтӥсь врачъёссы, «Чернобыль» огазеяськонлэн ёзчиосыз.

— Чернобыль АЭС-ын, Челябинск палась «Маяк» комбинатын пуштон бырвылъёсты утялтонэ пыриськемъёслы юрттэт сётон сярысь закон 1991-тӥ арын юнматэмын вал, — пусйиз «Чернобыль» огазеяськонлэн кивалтӥсез Семён Сармакеев. — Но сое быдэсъянын туннэ ке но пиртэшъёсыз вань. Кылсярысь, ожысь ветеранъёслэн элькун госпиталязы чернобылецъёсты, инвалидностьсы ӧвӧл ке, туж ик кутэмзы уг поты. Нош радиациен йырин инвалид луэм сярысь документ басьтыны капчи  ӧвӧл. Эмъясьёс малы ке сое сёто лек пыктослэсь курадӟисьёслы. Мукет учыръёсы уггес. Озьы элькунысьтымы чернобылецъёс пӧлысь котькуд 5-тӥезлы гинэ инвалидность сётэмын. Юромо эскери: артэ улосъёсын ик со котькуд 2-тӥезлэн вань.

«Чернобыль» огазеяськонлэн ёзчиосыз.

Чернобылецъёслэн мукетыз ӵектонзы: радиация пыр потэмъёсты йӧнатон понна элькунамы нимысьтыз специалист луыны кулэ. Эмъян учреждениосысь терапевтъёс пӧлын со валэктон уж мед нуысал. Угось радиация улэ шедемъёслы документъёсты, справкаосты дасянын вань нимысьтыз куронъёс.  Нош таӵе адями улонысь кошке ке, сое одно кырылоно —  луыны кулэ заключениез. Таӵе справка ӧвӧл ке, солы кулэмез бере огпол сётӥськись пособие уг тыриськы. Та сярысь  егит эмчиос уг тодо. Соин ик кылдыло валамтэос.

Трос юанъёс озьы ик кылдо, пе, чернобылецъёслы дунтэк эмъюмъёс сётонъя. Ожысь ветеранъёслы, радиация  улэ шедьылэмъёслы нимысьтыз поликлиника но кулэ вылэм. Тазалыкез утёнъя министрлэн воштӥсез Татьяна Дёмина, валтӥсь врачъёс ветеранъёсты сак кылзӥзы. Тросэныз ӵектонъёсынызы соглаш кариськизы. Кылсярысь, ожысь ветеранъёслэн элькун госпиталязы, пе, радиация улэ сюремъёсты сяна, соослэсь пал кылем кышнооссэс но йӧнатоно. Эшшо туэ апреле госпитальын усьтӥськыны кулэ гериатрияя (пересьёслэсь висёнъёссэс эмъянъя) ёз — отын 40 койка луоз. Татчы сюремъёсты 18 нунал ӵоже возёзы, тазалыксэс котыр ласянь эскерозы.

— Но асьсэос ветеранъёс но тазалыксы сярысь сюлмаськыны кулэ,  — ватсазы валтӥсь врачъёс. — Соос арлы быдэ ортчыны кулэ диспансеризация пыр. Но, жаляса верано, ӝыныез но больницаосы уг лыкты — дортӥзы ӧтчаськыса ветлоно луэ.

Котрес ӝӧк сьӧрын пумиськон сюлмысь вераськонлы пӧрмиз: сюлмаськытӥсь ужпумъёсты ӝутэм сяна, чузъяськизы тау карон кылъёс но.

Элина Кумачёва

Удмурт Дунне
By Удмурт Дунне Март 14, 2017 15:28