«Бемыжский» хозяйствоын кылем ар пумын выль ферма усьтӥськиз

Удмурт Дунне
By Удмурт Дунне Март 22, 2017 12:14

«Бемыжский» хозяйство бадӟым ик ӧвӧл — 42 адями тырше, 15 мурт ферма котырысь ужъёсты быдэсъя.

Кизнер ёросысь «Бемыжский» хозяйствоын кылем ар пумын выль ферма усьтӥськиз.

Бемыжысь фермаез ӝутонлы быдтэмын ог 21 миллион манет. Со 212 йырлы  чакламын. Но али отын 70 егит скалъёс, соосты татчы ваемлэсь азьло гужем лагерьын юромо дасязы-будэтӥзы. Озьы ик вуттэмын 70 ветылъёс — соос ӝоген куняналозы ни. Нялтас вераса, выль фермаын егит скалъёсты гинэ возьыны малпало.

«Бемыжский» хозяйство бадӟым ик ӧвӧл — 42 адями тырше, 15 мурт ферма котырысь ужъёсты быдэсъя. Соос пӧлын гурт удысын кема тыршемъёс но, егит специалистъёс но. Тани Анна Рыжкова скал кыскисьын 2-тӥ арзэ гинэ ужа. Но адӟиське ни, макем валаса со берга бӧксӥсьёс котырын.

— Мон туж яратӥсько пудоез, — вера А. Рыжкова. — Мыным кельше соосты эскерыны, утялтыны. Оглом вераса, яратӥсько ас ужме.

Бемыжысь фермаын Анналэн кузпалыз но ужа — Евгений йӧл кыскон гумыосты чакла, тупатъя. Воргорон нокыӵе ужлэсь уг палэнтӥськы, со ик фермаын утялскись но, эстӥсь но.

Хозяйствоын ваньзы ог-огзылы юрттӥсько. Кылсярысь, висьыны усем дояркаез воштыны котьку дасесь осеменатор Светлана Абрамова но фермаен кивалтӥсь Лидия Тихонова. Та кышномуртъёс кема ужало ни гурт удысын. Соос туж шумпото, шуныт, югыт ферма кылдӥз шуыса.

Кизнер ёросысь «Бемыжский» хозяйствоысь выль фермаын шутэтскыны но ужаны луонлыкъёс кылдытэмын.

— 15-20 ар талэсь азьло фермаямы нокыӵе условиос ӧй вал, — тодазы ваё кышномуртъёс. — Пыриськод вал ужан интыяд пеймыт гуэ сямен, пыд улын кырсь ву пуке, гужемзэ неномыртэм ӝокыт. Дӥсьмес, пыдкутчанмес воштон инты но соку ӧй вал, ужан дӥсь рос-прос ӧз сётъялэ. Али уж дуре ӝутскем мылкыдын вуиськом. Таяз фермаямы шутэтскон сэрегмы но кылдӥз. Ужан вискамы отын чай юиськом, электрочайникмы асьмелэн. Сиёнмес шунтыны микроволновка луысал на ке… Улонмы майбыр — скал гидын шуныт сьӧрос лэсьтэмын, душ гинэ кулэ на. Шумпотӥськом, ужмы вань шуыса, уждун дырыз дыръя басьтӥськом, ёросысь мукет хозяйствоосын сярысь уродгес ум улӥське, эштосмы тужгес кужмоез ӧвӧл ке но.

Фермаын ужасьёс оско, выль сямен улыны кутскемзы бере тросгес йӧл кыскозы шуыса. Кылем арын одӥг скаллэсь ог 6 сюрс литр кыскизы, берло 2 ар куспын хозяйство йӧл поттонзэ ог 64 тонналы йылэтӥз.

Калыклэсь улонзэ ӟечомытон сярысь трос сюлмаське «Бемыжский» хозяйстволэн кивалтӥсез Леонид Титов.

— Фермалы быдтэм коньдонмес тырим ке, басьтӥськом кунян гид лэсьтон борды, техникамес но выльдоно на. Но та вакыт нырысетӥ ужпуммы — кысконо скалъёслэсь лыдзэс йылэтоно, — шуиз Л. Титов.

Татьяна Решетникова

Удмурт Дунне
By Удмурт Дунне Март 22, 2017 12:14