Балтач ёросысь удмуртъёслэн «Кенеш» автономизы 25 арессэ пусйиз

Удмурт Дунне
By Удмурт Дунне Март 15, 2017 08:19

Та нуналъёсы Татарстанысь Балтач ёросысь удмуртъёслэн «Кенеш» автономизы 25 арессэ пусйиз.


А. Серебренников но П. Данилов (бурысьёсыз) њечкылазы Татарстанысь Балтач ёросысь азьветлћсь удмуртъёсты.

Калык тачак

Юбилейлы балтачъёс сюлмысь дасяськиллям: зол концерт малпаллям, огазеяськонзылэн азинскемез сярысь адӟытон лэсьтӥллям, Удмуртиысь, Марий Элысь но Татарстанлэн пӧртэм ёросъёсысьтыз куноосты ӧтиллям, озьы ик автономилэн ужаз пыриськемъёсты, сое кылдытӥсьёсты огазе люкаллям. Сцена вылын та ӝытэ удмурт, бигер, ӟуч, пор кылъёсын уно ӟечкыланъёс, шуныт тодэ ваёнъёс, шулдыр кырӟанъёс чузъяськизы.

Соосыз кылзыны Балтач клубе калык тачак люкаськем: одӥг буш инты но ӧй вал. Учкисьёс борддор кузя но сылӥзы. Туж паймим: концерт 4 час кыстӥськиз, нош вань лыктэмъёс пумозяз чидазы, сак кылзӥзы, доразы бертыны ӧз дыртэ. Ужрад йылпумъяськем бере но, 11 час котырын ӝыт, соос шулдыръяськизы: арганэн шудӥзы, кырӟазы но эктӥзы.

Клубе пырыку ик, котыр ласянь удмурт кыл кылӥськиз. Пичиосыз но, бадӟымъёсыз но ӟабыльто. Бергес ини сцена вылысен Балтач ёросысь дышетӥсь вераз: «Ёросысьтымы урамъёсын удмурт кыл ӵемгес чузъяське, Удмуртиысь каръёсын ӵошатыса». Балтач удмуртъёс зэмзэ но анай кылзэс тодо но туж гажало потӥз.

Кутскиз ужрад «Удмурт Кенеш» огазеяськонлэн гимнэз бордысен. Нош собере вашкалаоссэ но, туалаоссэ но кырӟанъёсты быдэстӥзы, эктонъёс возьматӥзы пӧртэм коллективъёс, нимаз кыр-ӟасьёс. Кӧня-кӧня соос вылӥл-лям балтачъёс но оглом бигер удмуртъёс пӧлын!

Юнме шорысь Удмуртиысь лулчеберетъя но туризмъя министрлэн воштӥсез Пётр Данилов ӧз пусйы, луоз:

— Балтач ёрослы вань маин данъяськыны. Соос быгато культуразэс но кылзэс утьыны, азинтыны. Коллективъёс лулчеберетмес туж усто возьмато. Солы юртто Татарстанын выль пуктӥськись культурая юртъёс но.

«Турнан» эктон.

Нырысетӥез

Балтач ёрос исполкомлэн кивалтӥсез Рамиль Шакиров вераз, «Кенеш» автономия  Татарстанысь удмурт огазеяськонъёс пӧлысь нырысетӥез вал шуыса. Озьыен, солы уно шуг-секытъёс, валамтэос пыр потоно луиз, но со ваньзэ вормиз. Историын 25 ар — со огшокчем кадь. Но «Кенеш» автономия та вакчи дыр куспын туж бадӟым уж лэсьтӥз. Эскеремын шошма удмуртъёслэн сюан йылолъёссы, кырӟанъёссы но эктонъёссы, соосын нимаз дискъёс поттэмын, удмурт лулчеберетлы сӥзем нуналъёс радъямын, вунэтэм удмурт шулдыръяськон — Гыронбыдтон — улӟытэмын (нырысетӥез ортчиз 2000-тӥ арын Чабъя гуртын). Удмурт кылъя но литературая дышетӥсьёслэн ёрос методобъединенизы кылдытэмын, анай кылмылы сӥзем конференциос радъяськизы. 1993-тӥ арысен кутскыса, 2 арлы огпол ортчытъяське «Жингырты, удмурт кырӟан» вожвылъяськон, нош висказы — гуртъёсысь театръёслэн «Катанчи усьтӥське» конкурссы. Огвакытэ огазеяськонлэн азьветлӥсез Нина Филиппова аслаз мылкыд каремезъя удмурт кылын радиопередачаос но дасялляз, соос чузъяськизы ёрос радиоын бигер передачаосын оградын. Со сяна, автономилэн ёзчиосыз сюлмаськемъя Балтач ёросысь Чабъя гуртын огез урам Кузебай Гердлэсь, нош Вуж Кушкетын Ашальчи Окилэсь нимзэ нулло.

Огазеяськонлэн историяз бадӟым пытьы кельтӥзы А. Кунаев, П. Байтуганов, В. Никитин, И. Ермаков, А. Герасимов но мукетъёсыз. Нош али автономиен туж быгатыса кивалтэ Л. Сапожников.

Сыӵе бадӟым уж ӧй быдэстӥськысал, асьсэлэн бигер удмуртъёслэн мылкыдзы, чиданзы ке ӧй луысал. Озьы ик, ушъясько балтачъёс, соосты котьку валало но юрттыны тыршо интыысь кивалтӥсьёс. Огкылысь, огкужмысь тыршемзы ӟеч емышъёс сётэ.

Нимаз пусъеме потэ на, бигер кивалтӥсьёс куноосты пумитаны асьсэос ветло. Татарстанын милемыз пумитазы Балтач ёрос тӧролэн воштӥсез Ильгам Гайнутдинов но «Кенеш» огазеяськонлэн тӧроез Леонид Сапожников.

— Интыысь кивалтӥсьёс ужады юртто но культураез вылӥе ӝуто шуыса, палэнысен но адӟиське. Усьтӥсько выль клубъёс, улонэ пыӵало проектъёс, — пусйиз «Удмурт Кенеш» ассоциацилэн тӧроезлэн воштӥсез Алексей Серебренников. — Юбилей ужрадэ мӧйыосын ӵош вуиллям егитъёс — со туж шумпоттэ.

Нялтас верало на: Балтачысь пинал калык мылысь-кыдысь пыриське ужрадъёсы, тунсыко малпанъёссэ, проектъёссэ улонэ пыӵатэ.

— Быдэс зал тыр люкаськем калык балтач удмуртъёслэсь ужамзэс возьматэ, — шуиз Татарстанысь удмуртъёслэн автономиенызы кивалтӥсь Андрей Герасимов. — Ужаны кутскем дырысеным соос мыным но котьку юрттӥзы, визь-кенешъёс сётъязы.

Андрей Сергеевич оскытӥз, вуоно арын Гыронбыдтон элькун шулдыръяськонзы Балтач ёросын ортчоз шуыса. Соку ик Татарстанэ футболъя дуннеысь чемпионатэ уно калык лыктоз. Мед, пе, соос вуылозы удмурт празднике но пичи ке но тодматскозы культураенымы.

Балтач ёросын 4 сюрслэсь уно удмуртъёс уло (ёросын вань улӥсьёс пӧлысь 12 процентэз). Отын будэмын трос тодмо адямиос: гожъяськисьёс Григорий Медведев но Николай Никифоров, югдытӥсь Иван Яковлев, Удмуртиысь культурая но туризмъя министрлэн воштӥсез, фольклор кырӟанъя но эктонъя «Айкай» театрлэн азьвыл кивалтӥсез Пётр Данилов, Удмуртиысь калык артист, Россиысь дано артист Геннадий Кузнецов, Россилэн Героез Олег Исаев но мукетъёсыз.

Елена Рябина

 

 

Удмурт Дунне
By Удмурт Дунне Март 15, 2017 08:19