Анатолий Перевозчиков писательлы — 70 арес

Удмурт Дунне
By Удмурт Дунне Март 2, 2017 10:59

Анатолий Перевозчиков гожъяське гуртаз.

Арлыд кыске кузьмадёсэ…

Анатолий Перевозчиков юбилейзэ, вал кадь ужаса, пумита: выль произведениосыз «Кенеш» журналын, «Удмурт дунне» газетын бӧрсьысь бӧрсе печатласькизы. Та нуналъёсы югыт дуннеез адӟизы кылбуръёсын «Гужемтэк вуиз сӥзьыл», прозаен «Сьӧлыктэм сьӧлык» бичетъёсыз. 

— Гуртын тӥледыз Школа Толя шуо. Анайды — дышетӥсь. Асьтэос но нырысь ик дышетӥсьын ужамын.

— Школаез йылпумъяме бере мон журналистэ дышетскон понна Казаньысь университетэ мыныны турттӥсько вал, но анаелэн монэ дышетӥсен адӟемез потылӥз. Дышетӥсьлэн ужезлы ӧй синмаськылы. Но дышетӥсьёсты дасянъя институтэ ик, Иже, мыноно луиз. Казане дышетскыны пырон понна 2-3 ар журналистын ужамед, печатлам материалъёсыд луыны кулэ, шуизы. Ма, тросэз дышетӥсьёс журналистын ужало ук, малпай ас поннам.

Монэн но озьы ик луиз: школа бере вуи газетэ. 10 арзэ тырши «Дась лу!» газетын, школаосын кусып вози, собере шокчи (шутэтски) Удмуртиысь Писательёслэн союзазы. Пырай возьмаськисе. Журналистын кема ужаны уг яра —  кыл кӧса. Кылыд воляз, мукет азе кошконо! Выльысен школае берытскылӥ — Пичи Пурга ёросысь Аксакшуре, Пурое, Кечолэ — литературной студиосты нуыны. Пинал гожъяськисьёсты кельше вал дышетыны, но соос ӝыныё дугдо ке, ӝож луэ. Кылсярысь, нырысетӥ аръёссэ Аксак школаын ужакум, кружокысьтымы одӥг Люба Тихонова гинэ тодмо гожъяськисе потӥз, нош кӧня ветлӥсьёс вал. Кечолысь Мария Золотарёваен данъяськисько. Со Герман Ходырев нимо ёрос премия но басьтӥз. Кечолысь дышетскисьёс пӧлын трос быгатӥсьёсыз вал, тросэзлэсь  пичи кылбур бичетъёссэс но поттылӥм. Но огез но соос пӧлысь бадӟым литературае сюрес ӧз лёгы. Нылъёс быдэ вуыса асьсэзыз семьялы сӥзё, нош пиос азьтэмесь. Сыӵе вакытэ мылкыд куашка.

— Нош асьтэос кыӵе литературной школа пыр потэмын?

— Трос басьтӥ, Удмуртиысь Писательёслэн союзазы ужакум. Тодмо кылбурчиослы ужъёсме возьматъясько, гуртъёсы ӵем поталляськом вал. Калыкен пумиськон вискын кылбур лыдӟыны  магазинъёсы но пыраллямы. Владимир Романов чуръёссэ туж зол лыдӟылӥз. Ымме усьтыса ик кылзылӥ Олег Поскрёбышевез. Мон но соослэсь адӟем карыны тыршылӥ. Гожтэм сяна, кылбурез артист сямен лыдӟыны быгатоно на ук.

Нырысьсэ печатласьки 1961-тӥ арын «Молот» журналын, 7-тӥ классын дышетскыкум. Со дырысен гожъяськон возме нуисько. Нырысетӥ кылбурме гожтыны  мылкыдме ӟуч эше ӝутӥз. Аксаке выль школа пуктыны кутскизы, милемыз, дышетскисьёсты, нюлэскы силё сузяны лэзизы. Ужан вискын шутэтскыны пуксим но, эше кылбур лыдӟиз, ачим, пе, гожтӥ. Пайми: кызьы озьы монэн ӵош дышетскись пияш кылбур гожтыны быгатэм! Азьло малпаськод вал,  гожъяськисьёс — бадӟым, Инмар кадь, адямиос, соос доры кыдёке сузьтӥськыны но сузьтӥськыны кулэ шуыса. Гуртэ бертӥ но удмурт газет-журналъёсын бугыръяськыны кутски, кызьыгес та гожъяськыны кулэ ай шуыса. Син улам такмакъёс сюризы. Ма, мон но тазьы гожтыны быгатӥсько ук! Гожтӥ жугиськись Анисимовмы сярысь, ньыль чурме лыдӟеме бере со монэ зырен уйылӥз. Озьы нырысетӥ кылбуре понна тыш сии. Собере Аксак школае вуиз Раиса Ивановна Покоева. Ми солэн литературной студияз быдэс классэн ветлыны кутским —  куамыно мурт. Ветлӥськом вал пересьёс дортӥ, мадемъёссэс, выжыкылъёссэс гожъяса. Но эшъёсы ӧз чидалэ, гожъяськонзэс аналтӥзы, ваньзы пӧлысь одӥгнам кыли.

— Озьыен, гожъяськыны чидан кулэ?

— Чидан но кизилиед сьӧры кыстӥськон. Кизилиен мон кылбурме… ма, оглом гожъяськонэз лыдъясько. Со доры кыстӥськыны кулэ. Азьвыл нырысетӥ интыын кылбуръёсы вал — та дырлы 6 кылбур бичетэ, «Донды батыр, солэн пиосыз но Уйпери сярысь кузьмадёс-кырӟан» эпосэ потӥз. Но берло дыре поэзиез но прозаез  уг висъяськы ни. Кызьы шуо, пельпум сьӧрын арлыд ке, сюлэм проза доры кыстӥське. Егит дыръя мылкыд поръя, инметӥ лобаськод ке, арлыд будэмъя лапкомиськод, музъем вылтӥ вамышъяны кутскиськод.

— Юбилейды азьын милемыз 2 книгаен шумпоттӥды. Али нош ик кылбур бичет бордын ужаськоды.

— Та мынам тужгес бадӟым шумпотонэ — юбилеелы книга поттыны быгатӥ. Берло 11 арзэ одӥг бичетэ но дуннеез ӧз адӟы вал ни, ӝӧке гожъяськи. «Гужемтэк вуиз сӥзьыл» бичетэ люкай ӟуч кылэ берыктэм кылбуръёсме но — таиз но бадӟым вормонэ. Малпанъёсы йыр тыр. Котьку потэ вал гуртын пукыса гожъяськеме. Но ноку озьы ӧз кылдылы. Совето вакытэ уж интыед луыны кулэ вал, сотэк милицаос кысказы, тунеядец карылӥзы.

Али, пенсие потэме бере, вордӥськем гуртам, Пичи Пурга ёросысь Пурое, бертӥ. Малпасько вал, табере гань-гань гожъяськыса пуко. Но озьы гинэ уг луы вылэм — тазалык лябӟемын, жадёно, егит дыръя кадь ӧвӧл ни. Удмуртиысь Писательёслэн огазеяськоназы ужакум ай, Василий Широбоков пенсие потӥз. Юасько солэсь: «Василий Григорьевич, ужакуды ялан муртъёс понна тыршиды, малпасько, табере дырдэс асьтэ творчестводылы висъяськоды ни». Со  тыбырме ик топ-топ вешаз но шуиз: «Э, пие, пие, егит дыръя гожъяськыны кулэ, пересьмыса уг луы ни». Мон но азьло уй куспын ог 10 кылбур гожтӥсько вал, али секытгес ни.

Но каллен тыршисько, ӝӧк сьӧры нуналлы быдэ  пуксьылӥсько. Луэ-а, уг-а, но пуксисько.  Астэ валэз сямен кыткыны но воздэ азьлань кыскыны кулэ. Тыршид ке, одно ик пӧрмоз. Гожтоно темаосы миллион, но мон соосты быдэстыса уг вутты ни кадь потӥсько. Али студент вакыт сярысь кузьмадёсме дасясько. Уже кутӥсько улонысьтым адӟемъёсме. Гуртын улон сярысь быдэстымтэ романэ вань на. Но тырмыт материал ӧй люка на. Ма, мар мон верасько… Ми, гожъяськисьёс, оломарлы но оскиськом ук: малпандэ шараяд ке, со уг быдэсмы. Соин ик ваньзэ уг усьты…

— Тӥ дышетӥсь, журналист, эшшо шаерчи на. Уно очеркъёсты Пуроысь адямиослы сӥземын — парсь сюдӥсь Маш Лидапайлы, суредаськись Зинбратлы но мукетъёсызлы.

— Материал бичаса, гурт кузя коркась корка ветлӥсько.  «Мугло»  кузьмадёсэ но — нырысь сое «Палсуй» нимай вал — озьы пӧрмиз. Гуртысь Исай агай но солэн нылпиосыз — Сандрапай, Варапай но Мишагай, — сярысь со. Сандрапай гожтэмме «Удмурт дунне» газетысь лыдӟем но шуэ: «Дотово умой гожтэмед но, малы тон нимъёсмес вошъяд». Мон валэктӥсько солы: «Со быдэсак тӥ сярысь ӧвӧл ук, мон тӥляд учыръёсты вылэ аслэсьтым малпанъёсме ватсай». Очеркъёсам гинэ ӧвӧл, веросъёсам но ваньмыз сямен геройёсы Пуроысь басьтэмын.  Сюжетэз малпакум, одно ик гуртысьтым кыӵе ке адямилэсь туссэ син азям пуктӥсько.

— Критик Виктор Шибанов гожтэ: тӥ дунъямтэ гожъяськисьёс пӧлысь…

— Австро-Венгриысь писательлэн Франц Кафкалэн улэп дыръяз одӥг книгаез но ӧз поты. Нош улонысь кошкемез бере кыӵе со тодмо луиз. Оло, мынам но куке но сыӵе вакытэ вуоз.  Жаляса верано, али критикъёсмы но тырмыт ӧвӧл.

Уже трос. Потэ на сюлэмез бугыртӥсь ӟеч произведение гожтэме. Быгатӥ ке, со калыкелы но, аслым но бадӟым кузьым луоз. Творчествоын тубатэтӥ кадь тубоно. Произведенидэ гожтӥськод но, кӧня ке дыр ортчыса, тырмымтэоссэ адӟиськод.  Берлоез «Сьӧлыктэм сьӧлык» кузьмадёсэ золгес потэ, оло, романме йылпумъяй ке, кузьмадёсэ лябгес потоз. Гурезез берыктысал на, кужым но егитлык луысалзы на ке. Гуртын улыса, удмурт литература улонлэсь палэнынгес но сылӥськод. Уг тырмо писательёсын, тодӥсь-валась адямиосын ваче вераськонъёс. Мӧзмонме лэзисько, Иже удмурт редакциосы ветлыса.

Мария Векшина

Туспуктӥз В. Беломорских

Удмурт Дунне
By Удмурт Дунне Март 2, 2017 10:59