8-тӥ апреле гожтомы Бадӟым удмурт диктант

Удмурт Дунне
By Удмурт Дунне Март 30, 2017 09:45

В. Туганаев. — Дасяй 2 текст. Одӥгез музъем ужъёслы сӥземын. 2-тӥзэ текстме инкуазьлэн чеберлыкез сярысь гожтӥ.

Туэ удмурт диктантлы текст гожтӥз биология наукаосъя доктор Виктор Туганаев.

— Диктантлы текст гожтыны ӵектэмзы бере кема малпаськи солэн пуштросэз пумысен, — вераз В. Туганаев. — Дасяй 2 текст. Одӥгез музъем ужъёслы сӥземын. Удмуртъёс вашкала дырысен музъем вылын тыршо, та удыс сооcлы матын. Малпай, терминъёс ласянь но та текст ваньмызлы валамон луоз.

2-тӥзэ текстме инкуазьлэн чеберлыкез сярысь гожтӥ. Котькуд будослэн, лулослэн кулыкез сярысь вераме потӥз. Соос пыр адями дунъяны но адӟыны мед быгатысал кадь инкуазен сётэм узырлыкмес.

Азьло аръёсы сямен ик, удмурт кылъя тодон-валанзэс эскерыны мылкыд карисьёслы диктантэз гожтыны 2 амал ӵектэмын. Нырысетӥез: 8-тӥ апреле ӵукна 11 часын диктант ортчоз Удмурт кун университетысь 2-тӥ корпусысь 222/3 аудиториын. Кыкетӥез: та нуналэ ик текстэз лыдӟозы «Мынам Удмуртие» радиоысь меӵак эфирын 15 часын. Гожтэм уждэс келяны луоз diktant@mail.ru электрон адресъя яке «Мынам Удмуртие» телерадиокомпание — 426069, Иж город, Песочной урам, 9-тӥ юрт. Одно ик пусъёно: «Бадӟым удмурт диктант».

Ангелина Снигирёва

 

Удмурт Дунне
By Удмурт Дунне Март 30, 2017 09:45