Алексей Даниловлэн чуръёсаз улэп лул шока

Удмурт Дунне
By Удмурт Дунне Март 7, 2017 16:38

Эгра ёросысь кылбурчи Алексей Данилов.

Сюресэз кыстӥське инсьӧры

Эгралась Кедра Митрей нимо ёрос библиотекаын тыршисьёс ас пал гожъясьёссылэсь кӧня ке книгаоссэс поттӥзы ни. Берлоез соос пӧлысь Алексей Даниловлэн «Своей строкой, своей дорогой… Та улонын — мон сюресчи!» бичетэз.

«Мон сюресчи» шуонэз авторлэн быдэс книгаяз шӧдӥське. Но со огшоры сюресчи ӧвӧл — сюресэз лэсьтонын пӧсяса тыршись, со дыре ик ас ужезлы синмаськыса шумпотӥсь, котыр дуннелэн чеберезлы паймыса «калтыртӥсь», инсьӧръёсы но сузись романтик.

Златогривой кометой

В хаосе миров

Вечным странником

Так и останусь.

Аслаз сюрестӥз та книгаез дорозь Алексей кема мынӥз, 43 аресозяз. Рос-прос кылбурчи луон сярысь  малпаськытэк, шӧдске. Монтажной техникумын дышетскиз, кема аръёссэ ини сюресэз тупатъян удысын мастер луыса ужа. Куддыр сюрес вылысен ик крезьгураса кылдо чуръёсыз («Кто не строил дорог, никогда не поймёт, что же значит пройти километр пути!»). Табере соосты гитара сиосын улӟытоно, кылъёссэ волятоно на. Озьы кырӟан пӧрме. Огез, мукетыз…

Куараез пумен юнмаз, инвисэз паськытаз. Ёросысь крезьгуро ужрадъёсын чузъясько Сундурысь Алексей Даниловлэн кырӟанъёсыз. Кылем арын Ижын егитъёслэн  «Куарагур» проектазы пыриськемез нырысетӥ бадӟым вормон вамыш луиз. «Тон понна кырӟасал» («Удмурт шаерлэн сяськаез») кырӟанзэ быгатыса быдэстӥз Валерий Мадазимов. Та кырӟанын вордскем шаерлэн но яратоно нылкышнолэн образъёссы висъянтэм герӟаськизы. Кылемаз «Элькуновидение» дэмлам кырӟанзы но трос куара люказ. «Анаелы ӟечкыланэз» Зураысь Владимир Князевлэн куараеныз «Мынам Удмуртие» радиолэн тулкымъёсаз табере веттаськылэ.

Чуръёсыз потылӥзы «Инвожо», «Кенеш» журналъёсын, «Удмурт дуннеын». Нош ӵемгес «Светлый путь» но «Вакыт» ёрос газетъёсазы. Соин ик «Игра — в сердце моём» элькун конкурсын вормемезлы паймонэз ӧвӧл.  Таин валче «Удмуртская правда» газетын Эгралы но Зуралы сћзем кылбуръёссэ печатлазы.

Тросгес гожъя ке но яратон сярысь, А. Даниловлэн тематикаез сюбег эгесъёсын пачкатэмын ӧвӧл. Службаын кунгожез утён, тӧлпериё 90-тӥ аръёс, ветеранъёсты сӥлы карон, школа аръёсты тодэ ваён, нылпидэ, семьядэ гажан… Ушъямон луэ авторлэн  «Поезд куара…» кузь кылбурез, со мур пуштросо, Иж — Балезино чугун сюресэз лэсьтӥсь нылкышноослы сӥземын.

Удмурт кылбуръёссэ Алексейлэсь лыдӟемъя лыдӟем потэ на вылэм, но соос, ӟучез сярысь, кык поллэсь но ичигес, 12 гинэ. Школаын удмурт кылэз дышетымтэеныз, ӟуч кылэ выжоно луиз уго. Но, пусъём, нырысь кылбурзэ 15 аресаз удмурт сямен гожтӥз вал, нылашлы сӥзьыса. Тӥни со дырысен удмурт нылмуртэз данъя ни.

Алексей Даниловлэн «Своей строкой, своей дорогой… Та улонын — мон сюресчи!» бичетэн тодматскон.

Зэм, улонын ваньмыз пыкъяське яратон борды. Яратонлэн трос полэс бурдъёсыз: шаердэ, калыктэ, эшъёстэ, семьядэ, инкуазез яратон. Таӵе ик яратон гожъясьмес но ӟыгыръя, солы ас сюрестӥз мыныны, кылбураны-крезьгураны юрттэ. Соин ик Алексей Даниловлэн творчествояз валтӥсез луэ пӧсь-ӟырдыт сюлэмысь яратон тылпуэн гомӟем мылкыд. Со туж зол шӧдӥське ӟучаз но, удмуртаз но кылбуръёсаз. Со, шуом ни лирической герой, сыӵе яратэ, сыӵе ӝутэ яратоно нылкышнозэ, оло, шоканэз пытсаськымон:

Ты богиня моя,

Ты святая душа,

И твой ангельский лик

Предо мною.

Ты принцесса моя,

Неземная краса,

В поднебесье тобой

Лишь живу я.

Бен, со уг ваты туж юн яратӥсь мылкыдзэ. Сыӵе дыръя бурдъёс пото, крезьгур ас кӧкыяз ветта, кылъёс но асьсэос шедё:

Ты моё наказание, радость,

Ты моя неуёмная страсть.

Ты моё искушение, слабость,

Ты моя недоступная сласть!

Дышем сямъя шалтыр кылбурасьёсын ӵошатоно ке, татын улэп лул шока! Соин ик, нырысь-валысь лыдӟыкум, ӧй но шӧды кадь (яке адӟымтэ улсы кельтӥ) книгалэсь пиртэшъёссэ. Нош соос трос-трос! Котькуд кылбурын сямен маиз ке чутэ: рифма, ритм (кылчур), интыяз кутымтэ кылъёс… Соиз умой: кырӟаку та шекъёс кӧня ке воляло. Алексей Данилов ассэ огшоры шуэ ке но: мон кырњан гожъясь гинэ… кылтћрлыкез тупатыны ноку бер ќвќл.

Номыр шоры учкытэк, синмаськи Алексей Даниловлэн гожъямезлы, вожъяськи данъяно нылкышноезлы. Пайми но шумпотӥ: пиосмурт йырыныз но тужгес векчи сиосты шӧдыны-шедьтыны быгатэ, малпам дуннезэ улӟытыны буёлъёс шедьтэ. Жаляй но: ваньмыз со «урымтэ чабей» — кылтодос удыслы дышетскымтэез бордысь.

Ӝож соиз: книга 30 экземплярен гинэ потэмын.

Татьяна Чернова

Удмурт Дунне
By Удмурт Дунне Март 7, 2017 16:38