2020-тӥ арын удмурт кунлыклы 100 ар тырмоз

Удмурт Дунне
By Удмурт Дунне Март 13, 2017 15:35

2020-тӥ арлы дасяськыны кутсконо ни али ик.

Таяз арняе ортчем исполкомын кенешизы 2020-тӥ арын удмурт кунлыклы 100 ар тырмемен валче ужрадъёс ортчытон пумысен.

Огласянь, отчыозь дыр вань кадь ай, но бадӟым ужрадъёс ӝог уг лэсьтӥсько, вылаз ик, бордаз коньдон кулэ. «Удмурт Кенеш» кунлыклэсь бадӟым юбилейзэ пусъёнэз кайта ик мытыны малпа. Кылсярысь,  2018-тӥ арын чакламын вань удмуртъёслэн 1-тӥ  ӧтчамзылы  100 ар, Кузебай Гердлы 120 ар тырмонлы сӥзем калыккуспо  научно-практической конференциос, Ашальчи Окилы 120 ар тырмонлы нимысьтыз ужрад ортчытыны но мукет.

— Нош 2020-тӥ арын вань бадӟым мылкыдмы Гербере быдэс Россиысь куноосты люканы, сое Удмуртиын гинэ ӧвӧл, бигер Сабантуез сямен, котькытын мед тодозы, — шуиз огазеяськонлэн тӧроез Татьяна Ишматова. — Малпанъёс трос, но соосты быдэстон вылысь элькун ласянь  юрттэт кулэ. Со пумысен вылӥ кивалтӥсьёслы поттылӥм ни, пумиськонъёс луозы на.

Нош та рад исполкомчиос мылкыдъёссэс-малпанъёссэс вераны быгатӥзы элькунысьтымы валтӥсь федерал инспекторлы Дмитрий Мусинлы. Со юромо пумиськонэ ӧтемын вал.

Со сяна, пумиськонын туэ Ашальчи Оки нимо премия сётон пумысен ивортон лэсьтӥз «Удмурт Кенеш» огазеяськонлэсь премиоссэ сётъянъя комиссилэн кивалтӥсез Георгий Грязев. Со вераз, туэ конкурсэ 9 адями ӵектэмын вал. Шумпотымон, конкурсэ мыло-кыдогес пыриськыны кутскизы гуртоос. Ужъёсты пыр-поч эскерыса, жюри пусйиз кык муртэ: Дэри ёросысь Лидия Бияноваез но Якшур-Бӧдьялась Валентина Ивановаез. Та синмаськымон нылкышноосты  данъялозы Ашальчи Окилэн вордӥськем нуналаз, 4- тӥ апреле, Алнаш черкогуртын. Отын ортчоз сӥё-дано ужрад.

Зинаида Рябинина

Удмурт Дунне
By Удмурт Дунне Март 13, 2017 15:35