12 ёросысь спортсменъёс ӵошатскизы «Удмурт дунне» газетлэн кубокез понна

Удмурт Дунне
By Удмурт Дунне Март 22, 2017 11:05

12 ёросысь спортсменъёс ӵошатскизы «Удмурт дунне» газетлэн кубокез понна

 

Кылем суббота нуналэ Кияса ёросысь Уддяди гуртын ортчиз «Удмурт дунне» газетлэн кубокез понна куасэн бызьылонъя 55-тӥ ӵошатскон. Ужрадэ вуылӥзы Удмуртиысь 12 ёросысь, Сарапул, Ижевск но Чайковский городъёсысь спортсменъёс.

55-тӥ ӵошатсконэз сӥё-дано усьтон ужрад.

Тодматскон

55-тӥ ӵошатсконэз сӥё-дано усьтон ужрадэ пыриськизы Кияса ёрослэн йырыз Александр Максимов, солэн воштӥсез Тамара Васильева, ёрос администрациысь мугорез кыдатон культурая но спортъя ёзэн кивалтӥсь Валерий Тихонов, Уддяди муниципал кылдытэтлэн йырыз Григорий Бигбашев, «Удмурт дунне» газетлэн валтӥсь редакторез Зинаида Рябинина. Люкаськем спортсменъёслы но вань куноослы капчи мылкыд пыӵатӥзы школаын дышетскисьёс но гуртысь «Инвожо» ансамбле ветлӥсьёс.

«Удмурт дунне» газетлэн кубокез понна ӵошатсконъёслэсь флагзэс ӝутыны оскемын вал шаерысьтымы тужгес кужмо спортсменъёслы: Шаркан ёросысь Николай Батаноговлы, Пичи Пурга ёросысь Алексей Мурашовлы но Кияса ёросысь егит спортсменкалы Ирина Бронниковалы. Ӵошатсконэ 200-лэсь трос спортсменъёс пыриськизы. Нырысь ик старт сётэмын вал тэшкылиослы. Ваньмыз куас вылын нискыланы быгатӥсьёс 1 иськем сюресэз ортчизы. Финише вуисьёсты ческыт кузьымен утялтӥзы.

Ӵошатсконэ люкаськем калык пӧлысь тросэз нырысь тодматскизы Кияса ёросэн, паймемзэс веразы чебер Уддяди гуртлы но сблмо калыклы. Тулыс куазь ульчаын кузёяське ини бере, куд-ог спортсменъёслэн кышканзы вал куас сюрес ласянь. Но одӥгзылэн но ӝожтӥськон мугъёссы ӧй вал. Вольыт дасям сюресэтӥ куасъёс асьсэос нискылтӥзы кадь.

Пусйыны кулэ созэ но. Тужгес трос спортсменъёс люкаськемын вал воргоронъёслэн вожвылъяськоназы. 60-64 аресъемъёс 10 кузя вал, 65 арессэс ортчемъёс — 7 мурт. Кылсярысь, Пичи Пурга ёросысь Михаил Петровлы 71 арес ини. 55 ареслэсь бадӟым нылкышноос 6 кузя люкаськизы, нош Ижысь Полина Хохрякова 66 аресаз  вамышъя ни вылэм. Пусйыны кулэ, тросэз ӵошатскисьёс вуэмын вал городъёсысь. Газетлэн кубокез понна ӵошатсконъёс луозы шуыса иворез кылӥллям кылем арня шорын Красногорск черкогуртын ортчем шаерысьтымы пенсионеръёслэн 2-тӥ спартакиадазы.

3 пол бызьылӥзы

18-тӥ мартэ шаерысьтымы тросэтӥ интыосын куасэн бызьылонъя ӵошатсконъёс ортчизы ке но, Кияса ёросэ но нимо-дано спортсменъёс уно гинэ люкаськизы. Вожвылъяськонэ пыриськемъёс пӧлын ӝыныезлэсь тросэз спортъя мастеръёс но мастере кандидатъёс вал. Уноез соос Якшур-Бӧдья черкогуртын ортчем Гурт шудонъёсын вормисьёс, Россиысь Гурт шудонъёсы пыриськем спортсменъёс луо.

Командаос сярысь ке верано, котькинлэсь трос вал Дэри, Кизнер, Сьӧлта, Пичи Пурга но Шаркан ёросъёсысь спортсменъёс, тужгес кыдёкысьёсыз — кезъёс.

Газетлэн кубокез понна ӵошатсконэ пыриськыса, 1986-тӥ арын вормисе потӥз вал Кезысь Сергей Главатских. Со дырысен одӥг ӵошатсконмес но ӧз кельты на. Берло аръёссэ семьяеныз пыриськылэ, таяз учыре 2 пиналъёсыныз вуэм.

— Кузпалэ Дэри ёросысь Италмас каргуртын ортчись ӵошатсконэ пыриське, отысь ваньмиз ке, татчы вуыны кулэ, — шуэ Сергей Азарьевич.

Час ортчиз-а, ӧз-а, Елена Главатских Уддядиын вал ни. Ӵапак вуиз суро эстафетаын бызьылыны. Кез ёрослэсь данзэ утизы Елена но Сергей Главатскихъёс, Марина нылзы но Александр Пулькин.

— Газетлэн кубокез понна ӵошатсконъёсты чидатэк витиськомы, татчы ми шумпотыса лыктӥмы, — шуэ Шаркан ёросысь ветеранъёслэн командаенызы кивалтӥсь Николай Протопопов. — 2 семья вайимы, эстафеталы команда но трос воргоронъёсты: 40, 60 но 65 ареслэсь бадӟымъёс. Шаерамы радъяськылӥсь Гурт шудонъёсы шедён вылысь ёросамы гинэ но кужмо нюръяськон мынэ. Валамон, отчы мыныны ваньмызлы уг кылды, нош газетлэн ӵошатсконаз пыриськыны быгатэ котькуд мылкыд карись. Соиз но умой: спортсменъёслэн арлыдзы котькуд 5 арлы чакламын.

Куд-ог спортсменъёс та ӵошатсконъёсын 3 пол стартэ потазы. Нырысь ик семьяенызы, собере ас арлыдо эшъёссы пӧлын бызьылӥзы, нош бӧрысь ини ёроссылэсь данзэ утизы. Кылсярысь, Дэри ёросысь Ольга Малых нунал куспын 3 пол зарнияськыны вуиз, 2 пол зарни медаль утӥз Шаркан ёросысь Ольга Батаногова.

Арлы быдэ ке луысал…

Та ӵошатсконъёслы тужгес шумпотэмын арлыдоос. Соос шаерысьтымы пӧртэм стартъёсы пырисько. Дэри ёросысь Ожмос гуртысь Иван Осинцев но сюлмысьтыз тау каре киясаослы, нимысьтыз — Валерий Тихоновлы ужрадэз доразы ортчытыны кичӧлтӥсь луэмез понна.

— Пенсионеръёслы доразы пукыны маза ӧвӧл, арнялы быдэ стартъёс луо, — шуэ трос аръёс ӵоже «Бабино» хозяйствоен кивалтэм мурт, али пенсионер Иван Осинцев. — 5-тӥ мартэ Шарканы ортчем марафонэ пыриськи, 12-тӥ мартэ Вавожын бызьылӥ, 15-тӥ мартэ Красногорскын пенсионеръёслэн спартакиадаязы кужымме эскери, 18-тӥ мартэ — Уддядиын, 19-тӥ мартэ Пичи Пурга ёросысь Вуж Мӧньяын ортчем «Егит вакытэн пумиськон» ӵошатсконэ вуылӥ, 26-тӥ мартэ ёросам тол келян луоз.

Собере но куасъёссэ ватыны уг малпа на. 2-тӥ апреле Ижын 4 час ӵоже куасэн бызьылонъя вожвылъяськонын кужымзэ эскерыны дасяське, нош тол сезонзэ йылпумъялоз 24-тӥ апреле Пермь улосысь Частые черкогуртын ортчоно ӵошатсконын:  Вотка водохранилищеысь вуэз лэземзы бере, пе, йӧ вылын куасэн бызьылонъя ӵошатскон радъяське.

Газетлэн кубокез понна ӵошатсконэ Иван Петрович 1970-тӥ арысен пыриське. Трос пол вормисьёс радэ потамын, таяз учыре но ас ёзо эшъёсыз пӧлын 3-тӥ инты басьтыны быгатӥз.

— Азьвыл аръёсы Гурт шудонъёс ӧй вал бере, вань спортсменъёс газетлэн призэз понна ӵошатсконэ пыриськылӥзы, — вера Иван Осинцев. — Солэн данэз котьку вылӥын вал. Тодӥсько на одӥг учырез. Та вожвылъяськонэ, дуннелэсь чемпионатсэ куспетӥ карыса, вуылӥз вал Галина Кулакова. Со аръёсы нимо-дано спортсменъёс пӧлын вал на Нина Парамонова, Юлия Шамшурина но мукетъёсыз. Бӧрысьгес та ӵошатсконъёсты котьку ортчытъязы Гурт шудонъёс азьын.

Озьы ик Иван Осинцев шумпотэмын чебер медальёслы. Таӵеез нырысьсэ вал, угось азьвыл аръёсы медальёс интые вылӥллям чемпионэз данъясь лентаос. Дэри ёросысь спортсменлэн туж потэ на газетлэн кубокез понна ӵошатсконъёсты арлы быдэ адӟемез. Коньдон, пе, ноку уз тырмы, нош сяме пыӵам ӟеч уж медаз вуны.

Кынмон висьыны уг люкеты

Ӵошатсконъёс Уддяди стадионын ортчизы. Спортсменъёслэсь мылкыдзэс бурдъязы гуртоос. Пӧлазы вал пиналъёс но, арлыдоос но. Спортсменъёсты тодманы юрттӥз комментатор: Валерий Тихонов ӟуч но удмурт кылъёсын котькуд спортсмен сярысь нимын-тулын вераз. Арлыдо кышноос ӵошатсконлэсь мынэмзэс адӟыны дэмен люкаськиллям. Людмила Лебедева, Ольга Бехтерева, Валентина Бубякина, Лидия Зямбекова но мукетъёсыз. Шоразы учкыса, жаль потӥзы: одӥг пыд вылысьтызы мукетаз лёгаськыса сыло, кынмимы ни, кесяськыса куарамы быре ни, пе. Но асьсэос доразы бертыны уг дырто, ваньзэс, пе, адӟеммы потэ.

Бызьылон йылпумъяськем бере вань спортсменъёс гуртысь культурая юртэ дыртӥзы. Залын пуксён интыез ик ӧй вал. Калык пӧсь кичабонъёсын пумитаз гурт но ёрос культурая юртъёсысь артистъёсты. Та нуналэ вордскем нуналзэс пусйись спортсменъёслы — Пичи Пурга ёросысь Екатерина Васильевалы, Кизнер ёросысь Галина Суворовалы но Галина Семакиналы — «Ерпечка» ансамбле ветлӥсьёс шулдыр кырӟан быдэстӥзы.

Вань медальёс кузёоссэс шедьтӥзы. Огъя зачётын вормисе потӥз Дэри ёросысь куасэн бызьылӥсьёслэн командазы. 2-тӥ но 3-тӥ инты басьтӥзы Кияса но Шаркан ёросъёс. Ортчытэм ужрадэзлы йылпумъян лэсьтыса, шуныт кылъёс вераз Валерий Тихонов.

— Кияса ёросын таӵе бадӟым ӵошатскон нырысьсэ ортчиз, сое умой радъяны быгатӥмы кадь, — шуэ Валерий Иванович. — «Удмурт дунне» газетлэн кубокез понна вожвылъяськон вуоно Гурт шудонъёслы дасяськон выллем луиз.

Валентина Емельянова

Туспуктӥз Александр Горбунов

Удмурт Дунне
By Удмурт Дунне Март 22, 2017 11:05