Ӝог юрттэт сётӥсьёслы кулэ юрттэт

Удмурт Дунне
By Удмурт Дунне Март 22, 2017 14:30

Кун Думаысь депутатъёс юнматыны чаклало ӝог юрттэт сётӥсьёс вылэ урдскем понна кыл кутонэз. Эмъясьёс угось берло дыре мыжыкъёс улэ ӵем шедьылыны кутскизы.

Утем понна эмчиос ӵемысь лек кыл кыло.

Пумитало пуртэн

Депутатъёс малпало «скоройын» тыршисьёсты полицейскойёсын оградэ пуктыны. Вылазы кидэ ӝутӥд — кыл кут. Азьвыл аръёсы кыл кутон чакламын вал югдурез утисьёсты вӧсь карем понна гинэ. Выльдӥськонъёс улонэ пыӵазы ке — «скоройлэсь» сюрессэ пытсасьёс вылэ административной уж ӝутӥськоз.

Нош туннэ шурдыт на. Жугемын Москваысь, Саратовысь, Нижний Новгородысь, Ярославльысь ӝог юрттэт сётӥсьёс. Сюлэмын оскон улэ: асьме дорын таӵе учыръёс ӧвӧл, дыр — шаермы пичи, калык небыт сюлэмо. Но Россиысь Следствиея комитетлэн Удмуртиысь ёзэзлэн ивортонъёсыз та осконэз сылмыто.

Кылем арын ноябрь толэзе следовательёс йылаз-пумаз вуттӥзы уголовной ужез. Ижысь арлыдо кышномурт «скорое» жингыртэм — вирзӥбетэ, пе, бадӟым. Эмъясьёс соку ик вызове пото. Но песянайлэсь тазалыксэ эскерыса уг вутто. Кышномурт  улэ вылэм керӟег сямо, юылыны яратӥсь пиеныз ӵош. Тӧдьы халатэн адямиосты адӟыса, воргорон вожомем но эмъясьлэсь чыртызэ пуртэн шырӟем. Ярам коть, врач улэп кылем. Туннэ со нош дыртэ калыклы юрттэт сётыны. Нош йыртэмась лулсэр висёнъёсъя больницае кемалы шедиз…

Светлана Петрова Ижысь огаз нылпи поликлиникаын медсестра луыса 5 ар пала ужа ини. Талэсь азьвыл нылкышно ог 20 ар тыршиз ӝог юрттэт сётонъя станциын. Но жугиськисьёсын, кудӟемъёсын сэрен «скоройын» ужаны кужымез ӧз тырмы.

— Эмъясьёс вылэ омырскылонъёс арнялы быдэ луо! — шуэ Светлана Сергеевна. — Кудӟемъёс милемыз тубатъёс кузя кӧня пол питыръяллязы — лыдъяны чиньыосы уз тырме. Но одӥг учыр чиданме чигтӥз. Бригадаенымы потӥмы юыса шузимем воргоронлы юрттыны. Ӧссэ усьтӥз гинэ, монэ, дӥсьтӥм кыскыса, мурӝолаз кылтыр-колтыр уськытӥз. Кызьы пеймытысь чигем пыдын потӥ — али уг валаськы ини. Но та учыр бере мукет нуналаз ик ӝог юрттэт сётонъя станциысь кошки.

Келяло мыжыкен

Кылем арын декабрь толэзе Удмуртиын станция кылдэм дырысен 95 ар тырмиз. Та лыдпусэн валче шаерамы вуылӥзы Москваысь ӝог юрттэт сётӥсьёс. Соос сэрттӥзы-пертчизы эмъясез утёнэн герӟаськем ужпумез.

— Ужасьёсмы устоесь, — пусъе шаерысьтымы ӝог юрттэт сётонъя станцилэн валтӥсь врачез Олег Прузан. — Но соос, жаляса верано, ми дорын кема уг чидало. Пӧртэм кышкыт учыръёсты ас пыртӥд поттыны угось юн сюлэм кулэ. Алигес врачъёсмы нош умойтэм учыре кемдӥзы. Пияшез поезд зол шуккем. Эмъясьёсмы сое утьыны ӧз быгатэ. Ӧтизы полициез. Югдурез утисьёс вуытозь, пияшлэн ӵыжы-выжыосыз эмъясьёс вылэ омырскиллям. Бер вуиды шуыса, янгыше уськытыны выриллям. Но таиз ласянь милемды пыкылыны уг луы — жингыртэм бӧрсьы 11 минут ортчыса, эмъясьёсмы чугун сюрес вылын вал ини. Тае ик возьмато машинаосамы юнматэм ГЛОНАСС тӥрлыкъёсмы но. Та учырын маиз абдрамон: ульчаысь адямиос огзы но ӧз дыртэ врачъёсты мыжыкъёслэсь утьыны. Телефонъёссэс поттаса,  туспуктылыны, видео гожтыны ӧдъязы. Озьы эмъясьёсмы асьсэос койкае шедизы…

Эмъясьёсты утён понна одӥгъёсыз врачъёсты страховать карыны дэмлало. Мукетъёсыз шуо: сьӧре токен шуккись арбериез  нуллоно, полицейскойёсын ӵош ветлоно, жугиськыны, астэ утьыны дышетсконо. Куинетӥосыз машинае кышкытлык сярысь ивортӥсь кнопка пуктыны  ӵекто…

— Та амалъёс уз юрттэ, — шуэ Олег Прузан. — Угось тодӥсько: эмъясь ассэ макем керӟег возёз, висись но сокем зол тушмонъяськоз. Соин ужасьёсме нуналысь нуналэ индылӥсько: мыжык вылэ мыжыкен эн пыре! Укылтэмъёсты электрошокеръёс, кнопкаос но полицейскойёс уз визьмалэ. Зӥбломытозы бадӟым тыриськон но пытсэт сьӧры шедён гинэ.

Ольга Корепанова

Туспуктӥз А. Горбунов

Удмурт Дунне
By Удмурт Дунне Март 22, 2017 14:30