Лымы букосысь пельнянь

Удмурт Дунне
By Удмурт Дунне Февраль 10, 2017 15:23

Татьяна Москвинаен пумиськон.

Томи Койвунен. Кызьпу агай. Тазьы нимазы Финляндиысь студентэз Пичи Пурга ёросысь Пуро гуртысь пиналъёс. Таяз толалтэ Томи Удмуртие сизьыметӥ ползэ вуылӥз. Сюресэз вуттылӥз Пичи Пурга но Можга ёросъёсы.

 

 — Томи, книгаостэк улэмед уг луы кадь. Пурое вуыса но, библиотекаын егитъёсын пумиськонэ учырад.

— Пуроын мон нырысьсэ вал. Тодӥсько ни кадь, мае удмурт гуртлэсь возьмано, озьы ке но пайми пуэн эстоно коркалы: вуыкумы со кезьыт вал ай. Тау Лапландие ветлэмелы: гурез эстыны быгатӥсько вылэм. Пурое монэ вайиз Дарали Лели. Пумиськонэ вуизы школаысь бадӟым классъёсын дышетскисьёс. Отын выль ним сётӥзы — Кызьпу агай (фин кылын koivu — кызьпу). Ачим сярысь кӧня ке мади, нош егитъёс удмурт кылын юалляськизы. Лыдӟиськонниын пукеммы бере клубын ортчытӥзы арганэн шудэм улсын дискотека. Быдэс гурт удмурт кылын вераське, мыным туж кельшиз: егитъёс ог-огзылы удмурт кылын гинэ вазё.

Ӵукна кутскиз корка эстонысен: уйин кезьыт кариськем. Бакчаысь кынмем шу октыны потай, лымы мычи. Ӝытсэ мон вузаськонние ветлӥ вал, пельнянь басьтӥ но сое азбарысь лымы букосэ донги вал. Лымыям. Табере уг тодӥськы, кытчы мон со пельнянез понӥськем. Утчаса-утчаса шедиз… Нуназеяммы бере егитъёсын шаньгаен (тюбинген) нискыланы ветлӥм, гуртэтӥ поръям, фермаысь скалъёсыз адӟим. Ӝытазе Олёш агай тодмомы дорын мунчое пырим, со мыным «Вуж Мултан» книга кузьмаз. Та романэз сизьым пол, пе, лыдӟи ини. Тау Олёш агайлы!

— Гуртын сяна, Ижкарын но тунсыко ужрадъёсы ӝимид, дыр?

— Выль ар шутэтскон нуналъёс кема кыстӥськизы. Мон понна со кӧня ке паймымон, малы ке шуоно Фин шаерын Выль ар дыръя одӥг нунал гинэ уже ум потӥське. 7-тӥ толшоре Ижын удмуртъёслэн «Тол чупан» фестивалязы сюри. Удмурт егитъёсын  Ымусьтонэз пумитам. Кафеын удмурт кылын гожтэм книгаез шара лыдӟим: со вал Индрек Коффлэн «Удмуртлыклэн улон кужмыз сярысь» бичетэз. Кылзӥм Валерия Фёдоровалэсь крезен, нош Светлана Зайцевалэсь гитараен шудэмзэс, Екатерина Коротаевалэсь кырӟамзэ, Анастасия Шумиловалэсь кылбурамзэ. Бератаз мон лыдӟи удмурт кылысь финэ берыктэм кылбуръёсты: люкаськемъёс авторъёссэс тодыны кулэ вал — со вал Кузебай Герд но Ашальчи Оки. Кылзӥсьёс валазы!

Трос мае адӟыса вуттӥ. Огаз нуналэ Пургала ветлӥм но мыным дэрем басьтӥм! Можга ёросысь Пазял гуртэ потам. Школаез, хоккей площадкаез, нылпи садэз но трос вузаськонниосты (огаз банкомат но вань!) синйылтӥ. Таяз учыре корка эстыны кулэ ӧй вал, милемыз пумтэм-йылтэм куноятӥзы но чаен утялтӥзы. Мыным «уг» шуыны дышетсконо ни вал…

Ижысь кошкон нуналам университетысь огъя но фин-угор кылтодонъя кафедраын Вуж выль арез пумитаны тупай, татын но монэ сюдӥзы-сектазы. Нош уйин мон Балезиноысен сюрес вылэ потӥ…

 — Озьыен, Удмурт шаерын ортчытэм дырыд пайдаё, шулдыр  ортчиз?

— Вуылэме пайдаё вал — нырысь ик кылэз тодон ласянь. Нырысь вераськыны шугмисько вал, нош пумаз трослы ӟечгес вераськыны быгатӥ ини. Сьӧрам туж трос удмурт литература но кутӥ. Кылсярысь, «Удмуртия» книгапоттонние пыраса, А. Пушкинлэсь удмурт кылын бичетсэ басьтӥ, кӧня ке «Инвожо» журнал октӥ. Соосты мыным лыдӟоно, кылэз медам вунэты. Уг тодӥськы на, ку нош ик Удмуртие лыкто, но оскисько, ӝоген!

Tentti Olut

Удмурт Дунне
By Удмурт Дунне Февраль 10, 2017 15:23