Инсьӧр кадь гурт

Удмурт Дунне
By Удмурт Дунне Февраль 14, 2017 17:00

32 аресъем фотограф Максим Егоров.

Ижысь 32 аресъем фотограф Максим Егоров чеберлыкез ас сяменыз адӟе. Сое ми валаны быгатӥськом ужъёсызъя но.

Максим Москваысь издательско-полиграфической колледжез быдтӥз, но быръем сюресысьтыз мукетаз кожиз. Уго туспуктылон, фотоаппарат улыны маза ӧз сётэ. Фото борды пияш пичи дырысеныз ик бурмемын, солэн атаез — тодмо удмурт туспуктылӥсь Михаил Егоров.

Али Максим Егоров — фрилансер. Ымысь ыме, пельысь пеле сямен, Максим дорозь выль заказъёс вуо. Я нылъёслэн чеберлыксэс фотое пуктэмзы потэ, я вузаськисьёслэн вуззылы промо лэсьтэмзы, я кузпалъяськисьёслэн сюан нуналзэс историе кельтэмзы. Кызьы шуэ ачиз Максим Егоров, туспуктэмын возьматыны кулэ пуш чеберлыкез. Солэн «ВКонтактеысь» яке «Инстаграммысь» бамъёсаз уно портретъёс но гуртысь инкуазь возьматэмын. Котькуд фотоез верос выллем, отын вань мылкыдыз но, историез но. Кылсярысь, тӧдьы йырсиё нылаш поръя нюлэскытӥ. Соку ик тодэ лыкто выжыкылысь суредъёс, оло, ныл пегӟе нюлэсмуртлэсь? Максим шуэ, малпанъёс лыкто, киноосты учкыса, крезьгур кылзӥськыса, тужгес, пе, кельше шунды пуксён вакыт. Тросэз туспуктэмъёсыз лэсьтэмын Пичи Пурга ёросысь Тыло гуртын. Анаез-атаез, пе, Ижысь бертӥзы атаезлэн вордскем гуртаз, нош Максим шумпотыса отчы ветлэ. Отын, пе, лул шутэтске.

Берло дыре туспуктэмез чебергес карыны туж трос амалъёс кылдӥзы.

— Макем кемагес ужасько туспуктэмъёс бордын, сокем ӟечгес валасько: туспуктэмез тыршоно исатэк кельтыны, солэсь зэмос чеберлыксэ утёно.

Зэм, соку гинэ адями зэмос мастерлы пӧрмоз.

— Яратӥсько инсьӧрез, со асьме чыры-пыры дуннемылы пумит сылэ. Малпанъёсмы но космос кадь ик пумтэм, — вера Максим. — Потэ лэсьтэме туспуктэмъёсын серия, кытын ваче пуктэмын луозы калык дӥсен туала удмурт нылъёс но песянайёс. Син азе пуксе «Атлас красоты» серия: Румыниысь туспуктылӥсь Михаэл Норок фин-угор нылъёсты пуктылӥз. Но со понна грант шедьтоно, нош мон уг тодӥськы, кызьы проект но гожтӥське. Мон художник ук. Потэ Удмуртиысь гуртъёсты котыртэме, собере мукет фин-угор шаеръёсы вуылэме.

Тросэз егит туспуктылӥсез фотоосыныз адӟытон лэсьтыны куро. Но Максим шуэ, нырысь кыӵе ке серия лэсьтоно. Пейзаж огшоры адямилы тунсыко уг поты, уго сое котькудӥз нуналлы быдэ ачиз адӟе. Но татын мон Максимлы пумит кылме верасал: художник инкуазез ас синмыныз адӟе, тодэм потэ, кызьы?

Мария ВЕКШИНА

 

Удмурт Дунне
By Удмурт Дунне Февраль 14, 2017 17:00