Ин но музъем: Уйпал Америкаысь шормуӵъёсын аспӧртэмлыко улон

Удмурт Дунне
By Удмурт Дунне Февраль 1, 2017 17:30

Туннэ Ольга Сунцова тодэ: дунне вылын выжыкыл вань. Алигес со вуылӥз Доминиканаысь Баунти шормуӵе. Солэсь огпалзэ шулдыртэ Карибской зарезь, мукет палзэ — Атлантической океан. Ӵапак соос шормуӵлэсь туссэ кылъёсын верантэм чебер каро.

Выжыкыл кадь чебер интыос.

Баунти шормуӵ

Доминикана интыяськемын Уйпал Америкалэн лымшораз — Гаити островлэн шундыӝужан палаз — но кӧня ке векчи островъёсын, кылсярысь, Саона шормуӵын, сое али ӵемгес Баунти шуо. Доминикана Удмуртилэсь трослы ик бадӟым ӧвӧл — ог 48 сюрс квадрат иськем. Люкемын 31 ёрослы.

— Зэмзэ вераса, ноку ӧй малпаськылы Доминикана, Баунти сярысь, дуннеез котыръяны туж яратӥсько ке но, — адӟемзэ тодаз вайыны ӧдъяз Оля. — Азьвыл аръёсы Европаез гажалляй. Отысь вань кунъёсты ас синмыным учкыса потӥ, узыр культуразэс сюлэмам кельтӥ.

Европа нылашлы пумен шӧг потыны ӧдъяз. Сюлэмыз выльзэ — экзотикаез — курыны кутскиз. Кузпалыз но шуиз: тырмоз асьмелы матысь кунъёстӥ ветлыны.

— Сюанмы ортчиз гинэ, лобимы Доминиканае, отысен — Саонае. Гужем туристъёс та палъёсы шергес ветло. Малы ке шуоно зол-зол зоръёс кисьто — сыӵе зоръёсты асьме палась адӟылэме ӧвӧл. Но шунды потэ ке, куаш-куаш пыже. Мугорлы пиль-пиль льӧлектыны ӝыны час но тырме.

Ми улӥмы Баунти шормуӵын. Отын верасько испан кылын. Угось кема аръёс ӵоже Доминикана Испанилэн колониез вал.

— Отысь сомында сьӧд адямиосты адӟыса, нырысь кӧты шурдылӥз, — вера эше. —  Соос но милемлы абдрало, тӧдьыесь шуыса, мугорысь котькуд сантиметрез синъёсынызы эскерыса пото кадь. Доминиканае ветлыса, талы дыши. Али соосты адӟисько ке, ӵыжы-выжыосы кадь пото.

Саонае вуон понна нырысь ик Альтос де Чавон гуртэ шедёно. Испаниысь 15-тӥ даурысь гуртлы укша со. Вашкала дыръя улыны шуыса кылдытэмын вылымтэ. Вуоно актёръёслэн репетициоссы отын ортчылӥллям. Но али татысь калыкез уг бырылы.

Вань на мукетыз гурт — Каса де Кампо. Карибской зарезь кузя 28 иськем кыстӥськись интыез кельшытӥллям тодмо адямиос: Майкл Джексон татын сюанзэ ортчытэм, Хулио Иглесиас, Мадонна, Джимми Картер, Билл Гейтс корка басьтӥллям.

Баунти шормуӵын верасько испан кылын.

Саонаын огшоры туристъёслы отельёс ӧвӧл. Соос шормуӵе вуыло 1 нуналлы экскурсие гинэ. Доминикана угось та интыез синчеберзэ кадь уте. Лэсьтӥськыны, пудо вордыны, музъемез копаны  лэземын ӧвӧл. Со понна шумпотыса пумитало кино яке реклама лэсьтыны мылкыд карисьёсты. Лыдъямын ни: котькуд ар Баунтиез учкыны 500 сюрслэсь ятыр адямиос вуыло. Татысь гинэ адӟыны луэ дунне вылысь шер пумиськылӥсь 500 пала тропической турын-куаръёсты: сакыр тростник, какао, апельсин, орхидея…

— Малы Саоналы Баунти ним лякиськем? Ӵапак татын «Баунти» шоколадлы реклама лэсьтӥллям, — шуэ О. Сунцова. — Телевизорысь учкыса, валано: инкуазез — мудрон. Но сое ас синмын адӟиськод ке, «мудрон» кыл уг тупа ни. Кылъёс уг сюро, чеберзэ вераны ӟудыса. Котырак тӧдьы луо, кокосъёс, пальмаос, одӥг жуг-жаг пыры но ӧвӧл… Азьвыл малпалляй: чылкыт Горд зарезен нокыӵе вуос ӵошатскыны уз быгатэ. Янгышаськем. Карибской зарезь чик но пӧртэм вылымтэ. Кузпалэным ӧм чидалэ — акваланг дӥсяса, пыдэсаз васькамы. Отын но — выжыкыл!

Саонаын ваньмыз шутэтсконлы лэсьтэмын: ю, сиськы, экты, вез-вез кылльы. Калык ульчаысь уй но, нунал но уг кошкылы. Ялан я румба, я бачата экто, крезьгур инструментъёсын шудо.

— Тӧдьы куо адямиосты татын гажало. Но гажанзы аспӧртэм — милемыз адӟо гинэ, вузъёслы дунъёс 5 поллы ӝутӥсько. Экскурсоводъёс кышкатъяло: Доминиканаетӥ оген ветлыны уг яра. Ӧжыт ӧвӧл учыръёс — туристъёс татысь буш кисы берытско. Секыт соин но — англи кылын вераськисьёс чиньыен лыдъямон.

Санто-Доминго город

Баунти бӧрсьы Оля кузпалэныз дыртэм Доминиканалэн шоркараз. Мылкыдзы кунэрес кылем: Саонаын выжыкыл кузёяське ке, Санто-Домингоын начар улон-вылон кырымпыдэс вылын кадь адске.

Город кыклы люкемын. Вашкала палыз чылкыт. Татын угось памятникъёс, музейёс лачак, туристъёс ӵем вуыло. Туала люкетаз вамыштыны юрӟым — выль юртъёсын ӵош ӝутско жуг-жаген гурезьёс. Коркаосъя ӟеч валаны луэ: кузёез узыр яке ӧвӧл. Гуртъёсазы югдур эшшо но урод. Гольык пыдын бызьылӥсь, ыльык-сыльык дӥсяськем сютэм нылпиос трос.

Гуртъёсын улӥсьёслэн валтӥсь ужзы — сериал учкон. Зэм, воргоронъёс маке со ужам карисько ик. Но уждунзы семьязэс сюдыны уг тырмы. Котькудаз 3 но солэсь трос нылпиос будо. Кышномуртъёс пиосмуртъёслы уг юрттӥсько, пиналъёссы котырын гинэ бергало.

— Доминиканаысь кык мылкыдын бертӥ. Огласянь, шулдыр инкуазь паймытӥз. Мукет ласянь, кырсь но начар улон со паймонэз лазегомытӥз. Инмысь музъем вылэ таш! усем выллем. Ӵапак та бордын ик, дыр, Доминиканалэн аспӧртэмлыкез.

Ольга Корепанова

Туспуктэмъёсыз Ольга Сунцовалэн

 

Удмурт Дунне
By Удмурт Дунне Февраль 1, 2017 17:30