Гидэ кулэ ужась

Удмурт Дунне
By Удмурт Дунне Февраль 9, 2017 15:00

Кез ёросысь «Дружба» эштосысь Олып бригадаын Выль арзэс выль гидэн пумитазы. Табере та хозяйствоын 11 пудо гидзы луиз. Олыпъёслэн вормонъёссы но шумпотонъёссы сярысь мадиз гурт хозяйствоен кивалтӥсь Ольга Ворончихина.

Выль ферма

 

Кез ёросысь «Дружба» хозяйствоын выль гидэ выжтэмын 200 скал.  Ёрос администрациысь гурт хозяйствоя управлениен кивалтӥсь Людмила Иванова ивортэмъя, ёросын 13 хозяйство, ваньзы сямен соос пыд вылазы йӧн-йӧн возисько. Кылем ар куспын «Труженик», «Мысы», «Кулига» хозяйствоосын выль гидъёс усьтӥзы. 2015-тӥ арен ӵошатыса, йӧл кысконзэс йылэтыны быгатӥзы «Степанёнкиын» 312 тонналы, «Дружбаын» 287 тонналы но «Труженикын» 244 тонналы. 2016-тӥ арын ёросысь пудо утисьёс котькуд скаллэсь шорлыдын 4 сюрс 836 килограмм йӧл кыскизы ке, «Большевик» СПК-ын — 5 сюрс 656 килограмм. 5 сюрс лыдпусэз ортчизы «Дружба» хозяйствоын но. Выль гид усьтӥськем бере соослэн мылкыдъёссы эшшо но бурдъяськемын.

— Та дырлы хозяйствоямы 122 адями ужа. Ваньмаз сямен гуртъёсын фермаосмы вань: Дырпаын 2 гид, Пажманын 3 гид, Олыпын 6 гид. Вазенгес вал на Апач гуртын ферма. Но со куашкан калэ вуэмын вал, отысь животэз Олыпе поттӥмы. Та дыре «Дружба» хозяйствоын 500 кысконо скалъёс. Нуналлы быдэ одӥг скаллэсь шорлыдын 15,5 килограмм йӧл люкаське.

Олып бригадаын выль гидын, мукетъёсыныз ӵошатыса, тросгес йӧл кыско — 18,1 килограмм. Али кунянам скалъёссэс нуналаз 3 пол кыско. Выль гидлы дурыныз шумпото скал кыскисьёс. Та дыре отын ужало Аксана Куташева, Ирина Белослудцева, Ольга Степанова, Наталья Васильева, Светлана Белослудцева.

— Ведра-карнан ӝутъян сярысь вунэтӥськомы ни, 2009-тӥ арын фермаосамы йӧл гумыос кыскизы, — шуэ пудо вордон удысын 23-тӥ арзэ ужась Светлана Белослудцева. — Киын быдэстоно ужмес арысь аре капчиятыны тыршо. Та дыре тужгес секытэз — кыед кыскан но вера миськон. Кысконо скалъёслэн лыдзы йылэмын. Котькуд группаын 48 скал лыдъяське.

Ирина Белослудцева эштосын 17-тӥ арзэ тырше. Выль гидэ выжемзылы со но шумпотэмын, таяз, пе, югыт, вӧл-вӧл, шутэтскон сэрегзы эркын, со вож садъёсын тырмемын. Выжыкылын выллем воштӥськонъёссылы пудо утисьёс уггес оско на, шӧдске. Матысь дыре, пе, ужаны кутскоз душсы.

Пуж-пуж йӧл басьтон понна пудоез ӟеч сюдоно. Кызьы вера колхоз тӧро Ольга Ворончихина, сиёнзы тырмыт дасямын. Сое витаминъёсын узырмытыны выро: ӵукназэ — кыдэн (жмыхен), нуназезэ комбикормен, ӝытазезэ — пызен. 1-тӥ — 2-тӥ классэн сиён тросгес люкамын. Турынзы кӧс мед улоз шуыса, сое клёнкаен шобыртӥллям. Ю тысь но кылем арын тырмытгес басьтӥзы: одӥг гектарысь шорлыдын 12,9 центнер потӥз.

Кез ёросысь Олыпысь выль фермаын ужало С. Белослудцева, И. Белослудцева.

Ульчаын ӟырт кезьыт нуналъёс кузёясько ке но, гурт кивалтӥсьёс гырон-кизён сярысь сюлмасько ни. Тулыс кизёно муоссы татын 1 сюрс 600 гектар котыр. Удалтытӥсь сылалъёс басьтыса дасязы ни. Кылем арын 80 тонна удобрение басьтэмын ке вал, туэ та лыдпусэз 100-озь вуттӥзы.

Олыпъёслэн азьланезлы малпанъёссы бадӟымесь: эшшо 200 йырлы гид пуктыны медо. Та уж борды басьтӥськозы ни пуктэм гидзы понна тыриськонзэс йылпумъямзы бере. Выль гидзы 23 миллион манет тыр усиз. Ӝыны дунзэ берыктоз государство, ваньмыз умой луиз ке, коньдон 1-тӥ кварталэ ик вуыны кулэ ни. Эштосын уг тырмо специалистъёс, тужгес кулэясько ветеринаръёслы. Быдэс хозяйствоын 1 ветеринарзы. Мултэс ӧй луысалзы инженер-механикъёс но. Гуртэ кылись егитъёс арысь аре кулэсмо. Урод сюресъёс тросэзлэсь мылкыдзэс быдто. Ёрос центрозь 22 иськем, тулыс-сӥзьыл гуртэ нуись сюреслэн куд-ог интыосыз шуге-леке вутто.

Валентина ЕМЕЛЬЯНОВА

 

Удмурт Дунне
By Удмурт Дунне Февраль 9, 2017 15:00