Эн оске Интернетлы

Удмурт Дунне
By Удмурт Дунне Февраль 16, 2017 08:37

Котькыӵе куазен чорыг пичиен-пичиен шеде.

Гужемзэ кемалась чорыгасько ни, нош толалтэ ву дурын пукыны ӧз кылдылы на вал.

Толалтэ чорыган понна воксё выль арбериос басьтоно луиз: тол визнан, блесна, балансир, йӧ портон, со сяна, бадӟым чорыган сандык — оскыса ик, шур дурысь котьку тыроен бертыло шуыса.

Арнянунал. Кырын -20 градус, соин чорыганы мыныны ум ӧдъяське вал. Но ӵош ужась эше Интернетысь прогноз шедьтэм: куазь шуналоз, чорыг, пе, шедёз. Люкаським быдэс машина тыр. Гуртысьтымы чорыг милемыз тодма ни, лэся, уг сюры, соин малпам мыныны Каракулино ёросэ. Кам вылын ми кадьёс кизем мында пуко вылэм.

Йӧэз портыса, лэсьтӥ 5 люкмес. 4-5 час, интыме вошъяса, ветлӥ, огпол но ӧз кыскы. Куазь жобаське, трос аръёссэ визнанэн эшъяськись воргоронмы шуиз, жобаськыку, пе, чорыг уг сюры. Та кылъёсты кылыса, лэся, инбам соку ик сайкиськиз, ӟар-ӟар шунды пиштыны кутскиз. Но, со сяна, номыр ӧз воштӥськы. Артэгес одӥг интыын 3 кузя пукиськом вал, нуназе бере соослэн зыгатыны кутскиз, мынам — ӧз. Копак вӧзазы кариськи ни, курикме соосын огкеме лэзи, наживкамы но огкадь, но чорыг мынэсьтым палэнтӥ кошке — татын но тодма, лэся.

Нуназе бере 3 часын огпол кыскыны шедьтӥз, осконзэ ыштэм адями понна со бадӟым шумпотон вал. Но 10 секунд ортчыса, нош ик мылкыд пуксиз. Жингыртоно кариськи ӵош ужась эшелы, кудӥз дэмлаз вал туннэ чорыганы мыныны. Солэн но, пе, уг сюры. Оскеме но чидаме понна Инмар мыным одӥг чорыг сётћз ик, кошкон азьын бершез (вазерпиньтэм судак) поттӥ.

Тодон-валанэд, удалтонлыкед ӧвӧл ке, коть зарезь дурын чорыгаса пук, уз сюры. Эшшо: эн оске Интернетлы.

Константин Васильев

Удмурт Дунне
By Удмурт Дунне Февраль 16, 2017 08:37