Дуннелы усьтӥськем адями

Удмурт Дунне
By Удмурт Дунне Февраль 10, 2017 14:30

Туала арын тросэзлэн шумпотонзы — дуннеез котыръян. Одӥгез интыяз пукыны чидасьтэм адями — Мария Вятчина. Солы 26 арес, улонэз туж зол герӟаськемын мынон-ветлонэн.

masha

Сюреслэн пумыз ӧвӧл.

Ассэ Маша «дромоман» шуэ. Таӵе социальной висён, пе, кылдӥз 19-тӥ даурын, чугун сюресъёс, бадӟым корабльёс паськыт вӧлмем бере. Соку ваньмыз, кинлэн коньдонэз но дырыз вань, капчиен сюрес вылэ потаны кутскизы кунгожсьӧр улонэз адӟон но выль шӧдон-мылкыд утчан вылысь.

Нош 21-тӥ даурын дуннеез котыръян понна трос уксё но кулэ ӧвӧл ни, кылъёсты тодэм но. Кылсярысь, Маша Интернетысь шедьтэ дунтэм билет, каучсёрфинг пыр — дунтэк улон инты. Ӟуч кылэз тодӥсь выль тодмоосыз солы улон интызэс шумпотыса возьматозы, улонзы сярысь трос тунсыкозэ вералозы.

Арлэн кутсконаз Маша voluptas-1.livejournal.com блогаз план гожтэ, кытчы со туэ мыноз. Кылсярысь, 2016-тӥ арлы со пусйиз вал, Европаысь кунъёсты сяна, Грузиез, Армениез, Азербайджанэз, Таджикистанэз, Дагестан, Ингушетия, Кабардино-Балкария, Чечня элькунъёсты. «Мынам одно ик ветлэме потэ Антарктидае но Австралие, али отчы мынэме уг луы, дыр ӧз на вуы», — шуэ со. Инстаграмзэ учконо ке, туэ Маша ветлӥз Россиысь тросаз городъёсы, Израиле, Швейцарие, али Португалиын поръя.

Дуннеез адӟон понна гинэ сюрес вылэ мон уг потаськы, шуэ Маша. Ӵем дыръя со ветлэ экспедициосы но конференциосы. Таӵе мынон-ветлонэз со нима «академической туризмен». Маша — аспирант, тунсыкъяське культурной антропологиен. Дышетске Казаньысь федерал университетлэн аспирантураяз, тодос ужез сӥземын мусульманъёслэн асваланзылы. Эшшо сое туж зол бордаз кыске Холокостлэн историез. Научной статья гожтон понна уно калыкен кусып возёно, трос экспедициосы потано — таӵе уж солы туж но туж яра.

Нылмуртлэн валэктэмезъя, антропологиен, пӧртэм калыкъёслэн лулчеберетэнызы тунсыкъяськонэз кутскиз вордскем палъёсыз, семьяез но школаез бордысен.

— Мон вордӥськи Порес нимо туж пичи гинэ удмурт гуртын (Киров улосысь Малмыж ёрос), со интыяськемын Татарстан, Марий Эл, Удмуртия вискын. Озьыен, ми палан 4 этносэ пырись группаен кусып возёно луэ. Кылсярысь, песяе доры бигер гуртысь эшъёсыз лыкто ке, песяе бигер кылын вераське вал. Пор гуртысь куноослы пор сямен вазьылӥз. Песянайёсмылэн кылъёсты тодэмзылы мон котьку туж синмаськылӥ, — шуэ М. Вятчина.

Маша аслэсьтыз чакламъёссэ маде. Вылтус ласянь калыкъёслэн трос пӧртэмзы ӧвӧл кадь, нош сям-йылолъёссы но вераськон кылзы зол висъясько.

— Кылсярысь, песянае, табань пыжыкумы, котьку вера вал: «Тон пыжем табанез ӝӧк вылэ мукет палыныз понӥд, поръёс кадь». Удмурт табаньлэн таба палыз бамкышет вылын кылле, нош поръёс сое, йырчукин берыктыса, ӝӧк вылэ пукто, — валэктэ егит тодосчи.

Машаез наукаен герӟаз  школаязы  зол ужась шаертодонъя кружок. 7-тӥ классысен ёрос конференциын Маша Порес гуртэз сярысь рефератэныз 1-тӥ интые потэм.

Озьы Машалэн дуннеен тодматсконэз шаертодон бордысен кутскиз. Кировын нылпиос понна нимысьтыз историко-краеведческой школа ужа. Со сярысь тодыса, гуртысь шӧртчи нылаш отчы дышетскыны ветлылэм.

— Мыным та школа туж трос сётӥз. Куинь ар куспын милемыз дышетӥзы архивын но библиотекаын ужаны. Отын дышетскыкум, удмурт калык дӥськут сярысь реферат дасяй. Мон, 10-тӥ классысь нылаш, Москвае всероссийской конференцие вуылӥ, отын вормисе потӥ! Соку валай, книгаосын бугыръяськон, калыклэсь юалляськон  сяна, наука мыным дуннеез адӟыны луонлык сётэ! — шуэ Маша. — Валай, дуннеын нокыӵе кунгожъёс ӧвӧл. Ваньмыз пӧрме, тынад мылкыдыд вань ке.

Пӧртэм калыкъёслэсь улон-вылонзэс но лулчеберетсэс эскерыса, асме но асьме лулчеберетмес, улонмес ӟечгес валасько, шуэ Маша. Мария Вятчиналэсь наукая ужъёссэ шедьтыны луэ аcademia.edu вотэсбамысь. Машалэн аслаз но  сайтэз вань. Отысь шедьтыны луоз дуннеез дунтэм котыръян сярысь дэмланъёссэ.

Лариса Дмитриева

Удмурт Дунне
By Удмурт Дунне Февраль 10, 2017 14:30