Буш

Удмурт Дунне
By Удмурт Дунне Февраль 13, 2017 17:00

Буш

Со вал толалтэ, куке ымусьтон кезьытъёсты тулыс омыр зӥбиз но городын лымы шунаны кутскиз. Мон пыри пеймыт бӧлетэ, огаз борддор вылын киноэкран гинэ пиштэ. Пеймыт. Котыр сюсь зын лӧсъяське. Мар ке вылэ лёгиськи, гылӟыса усисько ни вал — выж вылын курегпузъёс пильылэмын, пызь пазямын. Пукси пукон вылэ, киноэкранэн борддор шоры ӝими: видеоарт возьмато. Сюсь зын, кубыз гур, син азям адями кыклы, куиньлы, ньыльлы, витьлы, куатьлы люкиськыны кутскиз.

Татысь мон шедьтӥ сое, аслэсьтым яратонме. Со ачиз мон доры лыктӥз. Берло вераз: пеймытын но мон шӧдӥ, тон мон кадь ик шуыса. Малпасько, мон но сое шӧдӥ, татчы кожи бере.

Со юаз:

— Тон кин?

— Анна, кылбурчи, — вази пумитаз.

Со нуналэ ми трос ӧм вераське, пуким экран азьын но учким солэсь видеооссэ. Кияса ёросын Уддяди гуртын, пе, лэсьтӥ. Мыным кельшиз, со туж ик вераськись ӧй вал шуыса. Уг яраткы кылъёсын пазяськыны. Ӝыт келякуз, со мынэсьтым юаз гинэ, малы кылбуръёс гожъясько. Мон тодам вайи эстон кылбурчилэсь, тодмоелэсь, кылъёссэ:

— Лэсьтӥськисьлэсь юазы ке, малы со корка пуктӥз, со шуоз: отын адямиос мед улозы. Кылбурчилэсь юазы ке, малы со кылбуръёс гожъя, со валэктоз озьы ик: адямиос отын мед улозы шуыса. Кылбурын адямиос асьсэзыз эркынгес шӧдо.

Яратонэ монэн соглаш луиз. Нош кӧня ке улыса, мон шӧдӥ, кызьы каллен бушаны кутски. Малпанъёсме, улон шоры учконме СО ялан лушкалляз но видеоез пыр ваньмызлы вералляз. Кылбураса но мон асме эрико ӧй шӧдылы ни — монэ кортназы. Йыры кур луиз! Кызьы озьы?! Малы озьы?! Ӧй чида.

— Ӵушылы вань видео-остэ, соос монэ гольык кельто! — кеськи шораз.

Со мон шоры чарка пасьта синъёсын учкиз но, ноутбуксэ шлач! ворсаса, улонысьтым кошкиз. Со сьӧры кошкиз пиналэ но, али гинэ пушкам вордӥськем мусо пиналэ. Монэ буйгатыны ветлӥз пислэг, укное йыгаськиз но, шорам учкыса, янак вылын пукиз. Мон, шузи, ӧй вала, со мыным ивор вайиз шуыса: табере тон быдэсак бушад — лулыд но, кӧтыд но. Со пислэгез кут но ваньзэ берен берыкты вылэм, но ӟигары ӧвӧл. вез-вез кыллисько койка вылын но учкисько тӧдьы вӧлдэт шоры. Коть оске, коть эн, но со чылк-чылк тӧдьы, гуртысь букосъёс кадь. Йырам одӥг малпан но ӧвӧл. Но малы ке мон асме сокем эркын шӧдӥсько, кылбуракум но таӵеез ӧй вал, мугоры вань секытэзлэсь мозмытэмын кадь, тани лобӟо.

Али мон пукисько автобусын. Мынӥсько кыӵе ке но капсулаын кадь: кырын зоре, питранъёс улысь ву сопала-тапала пазяське, укноос нюламын, трос адямиосты уте корт. Ӝокыт. Йыр пачка. Мон мынӥсько гуртэ, анае шуиз, отын, пе, скал вордӥсь фермер улэ. Огназ. «Удмурт дунне» газетлэн «Палтури» сэрегаз ялон гожтэм: кышно утчасько. Мон мар? Анаелэсь кылзӥськи, анай уродзэ уз дэмла. Пукси автобусэ но мынӥсько со доры, гуртэ. Оскыса, со монэ тырмытоз шуыса.

Анна Крезь

 

Удмурт Дунне
By Удмурт Дунне Февраль 13, 2017 17:00