Аслыд осконо но шоколад сиёно

Удмурт Дунне
By Удмурт Дунне Февраль 10, 2017 18:00

Кӧня ке нунал талэсь азьло мон нырысетӥ экзаменъёсме сётӥ. Уг пӧяськы, туж курдай. Йырын бергазы юанъёс: кызьы кулэ дасяськыны, кызьы сессия ортчоз?

Сюлмы зол пазяськиз! Ми эшъёсынымы мар но ӧм дауртэ, тодон-валанъёсмы борды шуд мед ватсаськоз на шуыса. Огез эше дэмлаз: ӵуказе ӵукна валес вылысьтыд одно ик бур пыдыд вылэ  султы, со юрттоз экзамендэ умой сётыны. Озьы ик кари. Мукет эше шуиз: экзамен азьын йырдэ эн миськы, вань визьдэ ву нуоз. Мон кышкай. Озьы ик кырсь йырсиен мынӥ экзаменэ.

Вуи университетэ. Йырам возисько дэмланэз: аудиторие бур пыдын пыроно. Озьы ик кари. Дыр вуиз билет кыскыны. Билетысь юанэз лыдӟеме бере валай: котькызьы дарманьты, но визьмыд ӧвӧл ке, номыр тыныд уз юртты. Оскыны кулэ аслад визедлы гинэ! Дасяськид ке, юанлы валэктон одно шедьтод! Мон билетэлы валэктон кагаз вылэ гожтӥ, мынӥ дышетӥсь доры, мынӥ каньыл мылкыдын, тодыса, ваньмыз пӧрмоз шуыса. Озьы ик луиз! Кыӵе со мылкыд вал, кылъёс но уд шедьты, ява, зачёткаысьтыд адӟиськод ке нырысетӥ оценкадэ: «отлично»! Бӧрысь, общежитие бертэм бере, мон малпаськыса пуки, быгатысал-а мон мукет билетъёслы но валэктон сётыны. Малпасько, быгатысал. Юнме асме курдатӥ гинэ.

Эшшо уг оскиськы ни, шуо ке «сессиысен сессиозь студентъёс усто уло». Дышетӥсьёсмы туж трос дорысь уж сётъяло, ваньзэ одно ик рос-прос лэсьтоно. Шулдыръяськон сярысь малпанъёс йырад уг бергало ни.

Озьыен, гажано нырысетӥ курсын дышетскисьёс, каре озьы, кызьы тӥляд потэ. Потэ ке, султэ паллян пыдын, миське йырдэс. Одӥгзэ гинэ дэмласал: экзамен азьын уйдэс умой изе, нош ӵукна шоколад  сие яке  кофе юэ. Ачим эскери. Шоколад мылкыдэз капчиятэ но йырвизьлы сураськыны уг сёты!

Виолетта Анисимова

Суредаз Вера Штыкова

 

Удмурт Дунне
By Удмурт Дунне Февраль 10, 2017 18:00