86 быгатӥсь егитъёс премиосын пусъемын

Удмурт Дунне
By Удмурт Дунне Февраль 10, 2017 16:00

А. Рябова.

Кылем арняе Удмуртилэн Тӧроез Александр Соловьев шаерысьтымы 86 быгатӥсь егитъёсты «Дышетон» нацпроектлэн дипломъёсыныз но грантъёсыныз пусйиз.

Ваньзы соос Россиын но Удмуртиын ортчем вожвылъяськонъёсын вормизы. 18 адями Россиысь но дуннеысь олимпиадаосын устоосыз луизы. Соос быдэн 60 сюрс манетэн  пусъемын. 68 егитъёс шаерамы но Россиын олимпиадаосын, вожвылъяськонъёсын вормылэмын. Таосыз быдэн 30 сюрс манет басьтӥзы. Шумпотымон,  соос пӧлын вал удмурт егитъёс но. Вавож ёросысь Выль Бия гуртысь визь поглэн Сергей Григорьевлэн шаертодонэн герӟаськем ужезлы нырысь Удмуртиын, собере Россиын вылӥ дунъет сётӥзы.

С. Григорьев.

— Школаын дышетскыкум, туж потэ вал вордӥськем музъеме сярысь мургес тодэме, — вера С. Григорьев. — Дышетӥсе но,  Людмила Музиярова, мылкыдме адӟыса, пӧртэм ужъёс гожтыны, вожвылъяськонъёсы пыриськыны ӝутказ, бадӟым тау солы. Вормон дорозь вуттэм уже сӥземын бырем гуртъёслы, данакезлэн бервылзы но ӧвӧл ни. Кылсярысь, Выль Бия вӧзысь гинэ Азьмес, Петухово, Лудӟи но мукет гуртъёс быризы. Туж потэ, соос сярысь адямиос тодазы ке но мед возёзы шуыса. Али ИжГТУ-ын электротехника удысъя дышетскисько ке но, вордӥськем палъёсты гажан мылкыды котьку сюлмам.

Анастасия Рябова удмурт кылъя олимпиадае 3 пол пыриськылӥз, кылем арын со удмурт кылъя но литературая калыккуспо олимпиадаын вормиз. К. Герд нимо гимназиез йылпумъяса, Ижысь медициная кун академиын дышетске. Со вера:

— Можга ёросысь Пазял гуртын вордӥськи, семьяямы котьку удмурт сямен вераськимы. Пичи дырысеным, анай кылме гажаса, будӥ. Но та вакытэ солы трос саклык висъяме уг луы ни, но лыдӟиськисько, анай-атайёсыным удмурт сямен вераськисько.

Ангелина Снигирёва

Удмурт Дунне
By Удмурт Дунне Февраль 10, 2017 16:00