Ульфат Бадретдинов: тужгес кузь сюрес — астэ ачид утчан…

Удмурт Дунне
By Удмурт Дунне Январь 30, 2017 12:11

Ульфат Бадретдинов

Солэн нимыз — шуд

21-тӥ январе 60 арес тырмиз тодмо удмурт гожъяськисьлы, Россиысь Писательёслэн огазеяськонзылэн ёзчиезлы, «Кизили» журналлэн редакторезлы Ульфат Бадретдиновлы. Писательлэн юбилеез азьын «Удмуртия» издательство поттӥз солэсь «Астэ утчан сюрес» книгазэ.

— Ульфат Шайхутдинович, бадӟым юбилеез азьын котькудӥз аслаз улонэзлы кыӵе ке йылпумъянъёс лэсьтэ, ортчем сюрессэ син азяз пуктэ. Тӥляд выль книгадылэн нимаз но со шӧдӥське.

— Тодам лыктэ 1984-тӥ ар. Выль ар бере, 2-тӥ толшоре, ми, Владислав Кириллов, Александр Лаптев но мон, Ижкарын улӥсь кышнояськымтэ егитъёс, пумиським но аспӧртэм кенеш ортчытӥм. Ог-огмы азьын ортчем арын быдэстэм творческой ужъёсмы сярысь отчёт лэсьтӥм. Со пумысен протокол но гожтӥм. Вуоно араз но озьы ик кенеш ортчытӥм, отчёт лэсьтӥм. Семьяосмы кылдэм бере сыӵе кенешъёс ӧй вал ни. Но мон огдышем сямъя аслам творчествоея отчётъёс арлы быдэ лэсьтӥсько, ортчем сюресме выль сямен эскерисько. «Астэ утчан сюрес» книгаям пырем произведениос улонлэн пӧртэм вакытъёсаз гожтэмын, геройёсыз но туж пӧртэмесь. Но котькудӥзлэн улонэз — со кыӵе ке сюресэз ортчон. Нош сюреслэн пумыз ӧвӧл. Берпуметӥ сюрес но улонлы пумпус (точка) уг пукты на, со мукет сюреслы кутскон сётэ. Мынам малпамея, кулэм муртлэн лулыз аслаз сюрестӥз пумтэм дуннеын лоба.

— «Сюреслы кулэ сюресчи» повестяды шуиськоды: «Тужгес но секыт но кузь сюрес — астэ ачид утчан сюрес». Нош тӥ асьтэ сюрестэс шедьтӥды-а? Оло, мазэ ке мукет сямен карысалды?

— Адями ялан ассэ утча, мӧйымыса но… Ас вакытаз мон ужай школаын, «Советской Удмуртия» газетын, «Инвожо» журналын, али — «Кизилиын». Улон сюресэ тунсыко радъяськиз кадь потэ. Туннэ мазэ ке воштоно ке, одӥгзэ гинэ курысал: атае луло мед луысал на. Мед адӟысал мынэсьтым дышетӥсь, журналист, писатель луэмме, внукъёсылэсь будэмзэс. Атае луло ке луысал, шуисько ке… Ӵапак та ке частица улӟе мынам «Лобась Ке, яке Дырез азьпалтон» фэнтези произведениям (со выль книгаям пыриз). Писатель гожъяськыкуз дырез озьы но, тазьы но бергатыны, вошъяны быгатэ. Жаль, улонын озьы уг луы…

— Удмурт шаере тӥ вуиды Башкортостанысь туж тодмо Алтау гуртысь ог 40 ар талэсь азьло. Иже пыраклы выжы лэзиды. Но произведениосысь геройёсты ӵемысь — камсьӧр удмуртъёс. Мар со — выжылэсь мӧзмон?

— Писпулэсь вайёссэ выльдыны луэ, нош выжызэ уд вошты. Со бордын кужым. Ас выжыдэ дунъяны но данъяны кулэ. Немец драматург Кристиан Геббель куке но вераз: «Котькуд писатель аслэсьтыз биографизэ гожъя, солэн произведениез умойгес пӧрме, куке со уг шӧды аслэсьтыз улонзэ возьматэмзэ». Тӥни озьы, мон но ас ортчем сюресме, адӟем-кылэмъёсме гожъясько. Пинал дырысь суредъёс йырвизе золгес пыӵамын. Собере, мон ке ӧй, кин Башкириысь удмуртъёс сярысь гожъялоз на?

— Ӵемысь тӥ асьтэ произведениостэс кинлы ке сӥзиськоды: Можга педучилищеын дышетскем эшъёстылы, Рифкат вындылы, Юрий Фоминлы… Улонысь зэмос адямиослэсь нимъёссэс пыртӥськоды. Малпан кылдэ: уноез произведениосты — улонысь учыръёс.

— Адӟем-кылэм учыръёс пӧлысь ваньзэ чеберлыко литературае уд пырты. Куд-ог учыръёсты юри малпано луэ, сотэк верос яке юмореска уз пӧрмы. Вань мынам «Мар луоз ӵуказе?» веросэ. Солы инъет карыса, пыртӥ асэным луэм учырез. Тулыс ми, гуртысь пиос, пудо возьмаськом. Ваньзы сямен футболэн шудыны кутскизы, нош мон тыпыос пушкы пыри. Мар утчай, ачим но уг тодӥськы ни. Музъем вылэ усьылэм тыпы куаръёсты огазе люкай но кенжытӥ. Кӧс куаръёс соку ик ӝуаны кутскизы. Витёнтэм шорысь тӧл потӥз. Мынэсьтым тылскемме кир-пазь кариз. Писпуос пушкысь куаръёс я отӥ, я татӥ ӝуаны ӧдъязы. Пиджакеным кысыны вырисько, нош тыл ялан азьпала мынэ, тыпыос пушкы пыре но пыре. Ма карыны валамтэеным, мон эшъёсы доры потӥ. Сьӧрам учкисько — тыпы арамаысь бугыр гинэ ӵын ӝутӥське.

Ваньмы ӵош тылпуэз кысыны быгатӥм. Кытысь, кызьы тылпу потӥз, пиос паймемын вал. Мон номыре кылымтэ-адӟымтэ улсы кариськи. Нош со учыр ялан сюлэмам улӥз, педучилищеын дышетскыкум, верос гожтӥ. Валамон ни: сюжетсэ, геройзэ кӧня ке мукетгес кари. «Мар луоз ӵуказе?» книгаям со веросэ пыртэмын.

Кемалась ӧвӧл лыдӟи Юрий Буйда писательлэсь «Вор, шпион и убийца» романзэ. Автор — ёрос газетын ужась журналист — книгазэ гожтэм, аслаз биографиез вылэ пыкиськыса. Со ассэ лушкаськисен, шпионэн но виисен лыдъя. Писатель, пе, улонлэсь тунсыко учыръёссэ, сюжетъёссэ лушка, шпион сямен, чакла адямилэсь лулпушсэ, улонлэсь чилектэм кадь ортчись вакытъёссэ «вие» но ас произведениосаз пыртэ, соос весяклы мед кылёзы шуыса.

Ульфат Бадретдинов. «Сапег» верос

— Зэмос писатель басьтэмезлэсь трос сётэ ук. Улонлэсь кыӵе ке учырзэ пушказ нуллыса, выль произведениез, нуныез сямен, вае. Озьы ӧвӧл шат?

— Озьы. Тани «Сапег» веросэ сӥземын дышетонъя министерствоын ужам одӥгезлы кивалтӥсьлы — Юрий Фоминлы. Юрий Александровичен ми эшъяськиськом вал. Солэн котькуд верамез — верослы сюжет. Пичи дыръяз сое ӵужанаез огназ будэтэм. Валамон, ёрмон вакытсы вал. Соин ик школа пияшлы кузьым лэсьтэ, сапег кузьма. Но кызьы ке озьы луэ, одӥг учыр бере пияшез школа линейка азе потто. Нокин валаны ик уг тыршы, малы пияш умойтэм уж лэсьтӥз. Директор пыкылэ гинэ: «…Азьланяз таӵеез медаз луы ни, ато выль сапегдэ берен басьтом…» Та нуналэ пияш сапегъёссэ директорлэн кабинетаз сэрпалтыса кельтэ, ачиз дораз носки пыд бертэ…

— Лыдӟисьёс уката пусъё нылпи психологиен, инкуазен герӟаськем веросъёстэс. Выль книгаяды сыӵе луэ «Кучыран» верос.

— Куддыръя мон малпасько: пӧйшуръёс, тылобурдоос адямиослэсь визьмоесьгес. Тани кучыранлэсь карзэ, пиоссэ адями быдтӥз. Тылобурдолы чидантэм вӧсь. Но со ик бӧрысь адямилы юрттэ. Зэм, оло, озьы тупаз гинэ. Но со уродлы уродэн ӧз берыкты. Адямиос ке озьы быгатысалзы…

— Одӥгаз книгаяды тӥ асьтэ сярысь шуиськоды: «Нимы мынам — Шуд…»

— Со озьы ик вань. Араб кылысь берыктыса, Ульфат шудбур шуэмез возьматэ. Нимме мон туж яратӥсько. Со небыт ке но, пушкам мон юн адями. Школаын дышетскыкум ик, трос гожъяськылӥ ёросысьтымы бигер газетэ. Анае колхозын парсь сюдэ вал. Умой-умой ветеринарзы ӧвӧл, парсьёссы кулыло, нош парсь сюдӥсьёслы, привессы ӧвӧл шуыса, уждун уг тыро. Но маин соос янгыш? Та статьяе бере колхозамы комиссия вуылӥз, ваньзэ эскеризы, уждун тырыны кутскизы.

Школаын мон зэмос активист вал. Сюлмаськи инкуазез утён сярысь но. Огпол лушкем кылдытӥм юннатъёслэсь отрядзэс. Башкириын гинэ ӧвӧл, быдэс Совето Союзын данэ потӥм. Ми сярысь Москваысь радио вералляз. Со вакытэ нуналлы быдэ 50-лэсь трос гожтэтъёс басьямы…

— Нош «Дась лу!» газетэ нырысетӥ заметкадэс гожтэмды бере анайды гожъяськыны лэзьымтэ ни, шуо…  

— Рогаткаен ыбылӥськись пиос сярысь гожтӥ вал. Фамилиоссы букваен гинэ пусъемын ке но вал, гуртоосмылы соосты тодманы секыт ӧй вал. Одӥгезлэн анаез мынэсьтым анайме тышкаськем. Собере анай монэ тышкаськиз. Но гожъяськемысь ӧй дугды. Анаелы 82 арес ни. Со али но мынам нырысетӥ лыдӟисе.

— Тӥ — 10-лэсь трос книгаослэн авторзы. Азьланяз маин паймытоды?

— Малпанъёс трос, но соосты дырызлэсь вазь шараяме уг поты. Асме ачим утчан сюрес кузя азьлань вамышъяло на …

Елена МИННИГАРАЕВА

Удмурт Дунне
By Удмурт Дунне Январь 30, 2017 12:11