Ульфат Бадретдинов. «Сапег» верос

Удмурт Дунне
By Удмурт Дунне 30 января, 2017 10:10
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Вазь ӵукна ик Юрий Алексеевич, Дышетонъя министерствоысь ёзэтэн кивалтӥсь, сюрес вылэ потӥз. Та арня куспын со Баграш-Бигра гуртэ куинетӥзэ мынэ ни. Кунмылэн Азьмуртэз Владимир Путин отчы лыктыны дасяськемен валче та гуртэ нуналлы быдэ сямен элькунысьтымы кивалтӥсьёс ветло. Одӥгъёссэ вошто мукетъёсыз. Кунгожмес утись пограничникъёс кадь, ява. Баграш-Биграез кин ке лушканы малпам, кожалод.

Выль «Волга» ӝог ширтэ. Егит водитель вераськыны уггес яраты, Юрий Алексеевичлэн куд-ог юанъёсызлы вакчияк валэктэмъяське, но ӵемгес «да, да» гинэ шуылэ. «Милям Дада ошмесмы но вань, — ас понназ малпаз Филиппов водительлэн ялан «да, да» карыса вазиськемез пумитэ. — Дада песятай умой адями вал. Гуртоос сое гажазы. Визьмыз понна, калыклы котьку юрттыны тыршемез понна. Туала вакытэ гуртамы сыӵеос чик ӧвӧл ни кадь».

Одӥг вакытэ машина шуак паллянэ кожем кадь кариськиз но выльысь бур пала ик выжиз. Кык-куинь секундскын сыӵе воштӥськонлэсь мугзэ Юрий Алексеевич валаса но ӧз вутты:

— Мар вал со, Саша?

— Сюрес вылэ кин ке но сапег куштэм…

— Сапег?

— О-о. Синме ог-кык секундлы гинэ градусник шоры воштӥ вал, — киыныз машина приборъёсыз возьматӥз Саша. — Учкисько но — сюрес вылын арбери кылле. Нырысь ик мон сое кыӵе ке корт кожай. Рульме ӝоггес берыктӥ…

— Сапег, иське… Пал сапег… — Юрий Алексеевич соку ик тодаз вайиз пичи дырысьтыз одӥг учырез.

…Школа азбаре ӵукна ик, урокъёс кутскемлэсь азьло, пиналъёсты линейкае султытӥзы. «Марлы меда? — паймемын пиналъёс. — Туннэ вирнунал, нош линейка котьку сямен вордӥськон нуналъёсы луэ. Толон школа бакчаысь картофкаез октыса быдтӥм. Туннэ шутэтскон нунал уз сётэ меда? Оло, экскурсие мыном? Куазь шулдыр ук».

Школалэн директорез Александр Васильевич пиналъёсын ӟечъяськиз но линейка азьтӥ ортчиз, синъёсыныз кинэ ке утчаз кадь.

— Юра Филиппов, линейка азе пот ай, — вазиськиз кивалтӥсь.

Лапег мугоро пияш, аслэсьтыз нимзэ кылыса, шуак луиз. Юра сюлмыныз шӧдӥз, школалэсь картофказэ октыны толон лыктымтэез понна кылзэ юалозы шуыса, соин ик дасяськиз солы, ас понназ валэктон но малпаз. Нош ӵукна ик линейка азе потонлы со дась ӧй вал. Пияшлэн ымнырыз ӵыж-ӵыж луиз. Линейка азе султӥз но, йырзэ ошыса, сылэ. Нокин шоры учкыны уг дӥсьты.

— Филиппов, — пияшлы вазиськиз Александр Васильевич, — валлян тыныд школа выль сапег кузьмаз. Дунтэк. Учке ай, пиналъёс, кельышлы ведь? Чиляло, ява…

Со вакытэ Юра пыдъёсысьтыз сапегъёссэ кыльыса сэрпалтыны дась вал. Нош дӥсьтонэз ӧзгес тырмы. Директор веранзэ азьланьтӥз:

— Школа юрттэ тыныд, нош тон солы? Малы толон школа бакчае ужаны ӧд лыкты?

Юра чалмыт сылэ. Вераны дасям кылъёссэ шараямез уг пот ни. Ӧз, пӧяськыны со ӧз ик малпа вал.

— Оло, кылдэ ньылӥд? Малы уд вазиськы?! — лекъяськысагес юаз ни Александр Васильевич.

— Мон толон бакчаысьтымы картофкамес октӥ…

— Вот, вот… Кылыд вань вылэм. Иське, бакчаысьтыды картофкадэс октӥд? Нош мукет пиналъёслэн бакчаосазы картофказы ӧвӧл ни шат? Мынам аслам но картофкае утялтымтэ на… Филиппов, азьланьын таӵеез медаз луы ни, ато выль сапегдэ берен басьтом. Мын, султы интыяд…

«Басьтэ!» — шара но кужмо кеськемез потэ вал пияшлэн, но кызьы ке чидатскиз. Мар вераськизы на линейкаын, солэн йыраз ӧз кыльы ни. Директорлы вожпотонэз Юралэн сюлмаз гоманы кутскиз: «Кызьы мон огнам со быдӟа бакчаысь картофкаез вакчи дыр куспын, зорыны кутскемлэсь азьло, октыса быдтом? Ӵужае висьыны усиз. Анае мукет гуртын, мон солы кулэ ӧвӧл… Ассэ директор шуэ, нош сое но уг вала!»

Филиппов, зэмзэ но, ӵужаеныз гинэ улэ. Анаез, картэныз люкиськыса, мукетызлы бызиз, пизэ сьӧраз ӧз басьты, ӵужанаез доры кельтӥз. Нош атаез городын улэ, лэся, гуртэ бертылэмез ӧвӧл.

Юра понна туннэ урокъёс кема кыстӥсько, часлэсь минутсэ кин ке юри кутыса возе, лэся. Дышетӥсьёс пӧлысь нокин но солэсь гуртын быдэстэм ужзэ ӧз эскеры, ӧз но юалляськы. Удмурт литератураен дышетӥсьсы Любовь Павловна гинэ урок пумын Филиппов вӧзы матэктӥз но каллен гинэ, сипыртыса сямен шуиз:

— Сокем эн куректы, Юра, ми валаськом тонэ… Тыныд ӵужаедлы юрттоно.

«Нош директор малы уг вала монэ?!» — та кылъёссэ пияш шара ӧз вера — ас пушказ кельтӥз.

Тани берпуметӥ урок йылпумъяськем пумысен чингыли жингыртӥз. Коридоре ӝог гинэ потыса, Юра ӧс пала пуктэм сапегзэ кияз кутӥз но директорлэн кабинет палаз матэктӥз. Солэсь ӧссэ шуак усьтӥз. Адӟиз — Александр Васильевич ӝӧк сьӧрын пуке. Киысьтыз сапегзэ Юра директорлэн кабинетаз сэрпалтӥз но, ӧссэ таш! ворсаса, ыж гон носки коже ураме лобатӥз. Директор мазэ-созэ соку ик валаз: пияшлэсь сапегъёссэ кияз кутыса, коридоре потӥз.

— Кырме сое! Филипповез дугдытэ, шуисько! — пиналъёслы-а, утялтӥськисьёслы-а кесяське со — уд вала. Нош Юра урамтӥ лобе ни, сутод на, пе, сое…

Нунокезлэсь носки коже школаысь бертэмзэ Оксинья апай ӧз адӟы. Юра шоры учкиз но паймиз:

— Маке луиз, оло?

— Ӧ-ӧз…

— Ымнырыд копак кӧдэктэмын. Висьыны ӧд кутскы-а?

— Ӧй…

Пияш сиськыны пуксиз, нош синъёсыныз урамез эскере: школа палась Александр Васильевич уг лыкты меда? Юра оске: директор татчы одно ик вуоз. Шыд сиыса, чай лэзиз. Тӥни соку пияш урам кузя лыктӥсь пиосмуртэз синйылтӥз. Вамышъямезъя ик валаз — Александр Васильевич. Коркась Юра лобыса кадь потӥз но ӝогак тубиз гид сиге. Толлы дасям турын вылэ выдӥз но пельёссэ сак кариз. Тани капка усьтӥськем куара кылӥськиз, собере — ӧс куара. Директор доразы ог дас минут сяна ӧз улы — берен потыса кошкиз. Гид сигысь Филиппов соку ик ӧз васькы — отын эшшо ог ӝыны час кыллиз на. Ӵужаезлэсь утчаськыны потэмзэ но витиз, лэся, нош соиз ӧз возьматӥськы.

Корказьысь сапегзэ Юра соку ик синйылтӥз. Дораз пырыса, сӥям чайзэ юыны пуксиз. Койка вылын кыллись ӵужаез шоры учырак гинэ учкылэ, солэсь ваземзэ вите. Нош мӧйы кышномурт чалмыт улэ. Бӧрысьгес, нунокезлэсь дӥсяськыны кутскемзэ шӧдыса, Оксинья апай юатэк ӧз чида:

— Тон, пие, кытчы ке мынӥськод, оло, туннэ?

— Бакчае потӥсько, картофкаез октоно ук…

— Ярам, иське… Жадьытозяд эн копаськы, ява, — кускад йӧтоз. Йыры ӧй ке кыскасал, ачим но бакчае потысал, — интыысьтыз вырӟыны турттэ вал кышномурт, Юра сое султыны ӧз лэзьы:

— Кылльы, ӵужай, бурмод ай…

Ӵуказеяз Филиппов школае, китай кеды кутчаса, мынӥз. Кутчанэзлэн одӥг интыез пасяськемын ке но, ветлыны яра на.

…Кӧня ке нунал ортчыса, куазь уйбыт зориз. Урамын дэри луиз.

— Тон, пие, туннэ сапегдэ кутча, ява. Нӧд ук, кедаяд зор-кот пыӵалоз, — нунокезлы каньылак вазиськиз Оксинья апай.

— Мыным кулэ ӧвӧл со сапег! — пумитаз кеськыса сямен вазиз Юра, собере ӧсэз йыг! ворсаз но, кедызэ ик кутчаса, школае кошкиз.

— Эк, шу, атаез выжые ик мынэмын та пиёк. Школалэсь кузьмам сапегзэ со уз кутча ни. Сямзэ тодӥсько — ваменэс. Берен нуоно шат? — озьы ас понназ вераськыса, кышномурт кӧня ке дыр ӵоже дораз пукиз но собере школа пала вамыштӥз, сьӧраз Юралы кузьмам сапегез но басьтӥз. Александр Васильевичлы со ваньзэ валэктӥз.

— Ярам, — шуиз директор, — асьмеос тазьы каром, Оксинья апай. Сапег басьтыны мон уксё сёто. Тӥ Юраен ӵош туннэ лавкае ветлоды но выль сапег быръёды. Кыӵеез кельшоз, сыӵезэ ик басьтоды. Юралы эн вералэ, ява, мон уксё сётӥ шуыса.

— Валай, Александр Васильевич, бадӟым тау…

Со нуналэ ик Оксинья апай но Юра ӟеч мылкыдын вамыштӥзы лавкае, отысь выль сапеген бертӥзы. Со сапегез школалэн коньдонэныз басьтэмзы сярысь Филиппов, институтын дышетскыкуз гинэ, тодоз, ӵужаез ачиз мадёз…

 

Печатламын верослэн оглюкетэз.

Туспуктэмез А. Горбуновлэн

Удмурт Дунне
By Удмурт Дунне 30 января, 2017 10:10
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<