Шаркан ёросысь Петух починка: Быдэс гуртын одӥг улӥсь

Удмурт Дунне
By Удмурт Дунне 12 января, 2017 13:44

  Но сюрес донгамын укно улозь

Шаркан ёросысь Петух починкаын 4 корка сылэ на, одӥгаз улэ 52 аресъем Владимир Максимов.

Шаркан ёросысь бырись Петух починка.

Воргорон, пуны но коӵыш

Шаркан ёрос газетлэн редакцияз ужасьёс алӥзы: гуртозь куас сюрес гинэ вань, дыр, улӥсез но отын одӥг адями гинэ кылемын. Кезьыт куазен машинамес жуммытэммы ӧз поты. Огъя тодмоосмы пыр Петухысь воргоронэн телефон пыр герӟаськоно кариським.

— Вуоноез ар Атаслэн бере, гуртты сярысь газетэ гожтэммы потэ вал, — шуисько.

— Гуртамы 4 корка кылемын на, огаз мон улӥсько, мукетъёсаз гужемлы гинэ бертыло.

— Шуизы вал, гурт дорозяды куас сюрес гинэ вань.

— Сюрес укно дорозям ик донгамын. Вератэк, курытэк. Сельсовет, вылды, косэ. Зюзяозь 7 километр луоз. Отчы ик магазинэ ветлӥсько.

— Гурттылэсь историзэ тодӥськоды-а?

— Соседэ вал, Скобкарёв Шурик. Со книга гожтэ гуртмы сярысь.

— Мӧзмыт ӧвӧл-а бен огнын улыны?

— Туэ гинэ огнам кыли. Вахрушев Николай семьяеныз улӥз, соослэн 3 пиналъёссы. Нылпиос Сильшурозь 1,5 километр мыно, отысен школае вуон понна автобусэ пуксё вал. Кулак-Кучесэ улыны кошкизы. Огнам улыны дыши ни. Чорыганы ветлӥсько. Гырдымен Петухен вискын шуръёс вань, Ита шур но кыдёкын ӧвӧл.

— Шеде ик-а кинэз ке?

— Чабак, юш, голавль, чипей… Ачим но сиисько, вузасько но.

— Бакчады, пудоды вань, дыр?

— Скалме кемалась быдтӥ, ыж гинэ вордӥ. Табере пудое ӧвӧл ни, муш гинэ возисько. Пуны, коӵыш вордӥсько.  Жулике тани пыд котырам берга. Машка коӵыше но вань. Пуные пичи гинэ, коркан возисько.

— Ог-огенызы тупало-а?

— Одӥг тусьтыысь сисько. Толалтэ ульчае уггес потало, ачим но уг лэзьяськы. Но гужем корка уг ик пырало. Машкае корка сиге пи вае но, куштоно луисько.

— Нош сиён ласянь пуны-коӵышты уг тэргасько-а?

— Мае аслым пӧзьтӥсько, соос но сое ик сиё. Ачим шыд яратӥсько, кеньыръёслэсь мар но со лэсьтӥсько, чорыг пӧзьтӥсько, жарить карисько.

— Мар кариськоды бен, огнын улыса?

— Быдэс нунал «Моя Удмуртия» радио вераське, телевизорысь кино, иворъёсты учкисько-кылзӥсько.

 Музъем бадӟым — калык ичи

Петух пыре Зюзя муниципал кылдытэтэ.

Солэн йырыз Василий Кожевников верамъя, Зюзя муниципал кылдытэт Шаркан ёросын тужгес бадӟымез лыдъяське гуртъёслэн лыдзыя но, музъемлэн быдӟалаезъя но — 11 гурт, 12 сюрс 100 гектар. Нош улӥсьёсыз, мукетъёсыныз ӵошатыса, трос ӧвӧл, пе, пасьтана пичи гуртъёс интыяськемын. Бегенвыль починкаын 2 коркан 4 улӥсез вань на, Гырдымын 2 коркан 3 улӥсез. Петух починкаын чылкак 1 адями кылемын. Адямиослэн вордскем интыосысьтызы кошкемзы уг ке поты, кужмысь уд кары ук, шуэ.

— Улӥсез вань бере, Петух починкае но сюрес сузямын, — вера В. Кожевников. — Выль ар бере секытгес луоз ни, коньдон уг тырмы. Берло 2 арзэ Шарканысь доротдел асьме дорын возьыны нимаз трактор но ставка сётъяз — солань-талань ветлыны туж кыдёкын уго. Со тракторен асьмелэн ик механизаторъёсмы ужазы. Но туж зол пелляськыку, сюресэз Петухозь котькуд нунал ӧз донгалэ, нош Сильшурозь ялан сузязы: пиналъёсты школае нуллыны кулэ.

Петухъёс гуртэнызы адӟиськыны бертыло. Берлоез пумиськонзы 2012-тӥ арын вылэм. Поселенимы бадӟым бере, котькуд ар гуртлэсь нуналзэ ортчытъяны ум быгатӥське, вераськимы 5 ар вис карылыны,  шуэ В. Кожевников.

Пужыммы сылэ мӧзмыса

Петухын вордскемын экономика наукаосъя кандидат, Калык хозяйствоя но кун службая академилэн Ижысь филиалысьтыз кафедраен кивалтӥсь Александр Скобкарёв. Со гуртэз сярысь книга дася. Александр Николаевичез куримы Петух починкалэн историеныз вакчияк тодматыны.

— В. Старостинлэн «Книга Вятских родов» ужаз 1891-тӥ арлы Петух починка сярысь шуэмын: Петуховской починка пыре Вятской губерниысь Сарапул уездысь Зюзя волостьысь Сыльшур огазеяськонэ. 18 семьяын соку улэ вылэм 157 мурт. Со дырысен Петухи трос пол «починок» но, «гурт» но луылэм. Нимыз но Петуховскойысь Петухи луиз, нош калыкын Петух гинэ шуо. Пырылӥз но пӧртэм ёросъёсы: Дэбес, Шаркан, Тыловай, Вотка.

Похозяйственной книгая 1960-тӥ аръёсы гуртамы вылэм 26 хозяйство, улӥсез 118 мурт. Тросэз ужаз «Красная нива» колхозын, кин ке тыршиз Зура леспромхозлэн Мирный посёлоказ. Гурт интыяськемын Петуховка шур валлин.

Гуртын улӥсьёс кемалась пазьгиськемын ни быдэс республикае. Гуртысьтымы потэмын  Россиысь дано артистка Валентина Пудова.

Гуртмылэсь мӧзмон пыраклы сюлэмъёсамы кылемын. Кин тодаз гинэ вайылэ на, кин ке дырын-дырын адӟиськыны вуылэ ик. Гурт дорысь гурезь йылын сылэ пужым. Со котькуд ласянь ог 20-25 иськемозь адӟиське. Со весь возьма но возьма  гуртооссэ дораз, — шуэ А. Скобкарёв.

Лия Малых

Туспуктӥз А. Скобкарёв

Удмурт Дунне
By Удмурт Дунне 12 января, 2017 13:44