Можга ёросысь Атасгурт: Выль арлы кузьым — чагыр эстӥськон

Удмурт Дунне
By Удмурт Дунне 12 января, 2017 13:59
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93
Updated

Можга ёросысь Атасгурт фермае арлы быдэ вуыло Тол бабай но Лымы ныл. Угось мукет азе нокытчы: отын ӧвӧл школа но, клуб но, лавка но….

Гуртысь ульчаос интыяськемын отын-татын.

Кытын кузпал — отын шулдыр

Вырйылысен адӟиське: гурт сокем пичи ӧвӧл, но туж вакчиесь урамъёс солань но, талань но кошко — йылзэс-пумзэс валаны уг луы. Ас поннамы серекъяськом: зэмзэ но, атас быжлы кельшо ук. Собере кутскиськом огаз, мукетаз капкае донгиськыны — я бадӟым-бадӟым пуны шорамы утыны ӧдъя, я ӧс тып-тып пытсамын. Гуртоосын тодматсконмы кутскиз Александр Прокопьевлэн семьяез бордысен. Таосызлэн бадӟым овчарка пунызы шорамы лекъяськыны выриз ик, но ӝог буйгаз.

— Ма, гуртэтӥ я чиганъёс, я корт бичасьёс ветло, соин ик тросэз пытсаськыса уло, — валэктӥз Александр. — Калыкмы ас понназгес улэ, Выль арез но ваньмыз сямен ик ас семьяосынызы пумитало.

Александр — механизатор. Та гуртын ик вордскемын, быдэ вуэмын. Нош Людмила кузпалыз — доярка. Таиз Ижысь. Гуртэ улыны выжемелы чик уг ӧпкелиськы, шуэ — бакча сиёнзы асьсэлэн, кеч вордо на, сютэм уз кыле. 3 нылъёссы быдэ вуо, кык бадӟымъёсыз школае ветло ни, нош пичиезлы 4 арес. Анай-атаез ужын дыръя пичильток огназ но кыльылэ. Телевизор дуре.

— Нылпи садэ нуллоно Пычас черкогуртэ, 3 иськеме, машинамы ӧвӧл, — валэктэ Людмила. — Соин ик, отчы путёвка курыса но, ӧм ветлэ…

Атасгуртэ сюрес.

Пычасэ атасгуртъёс ветло лавкае но, концерт но учкыны, отысь школае ик нылпиосты нуо-ваё автобусэн.

Пычас больницаысь, пе, бертӥсько Татьяна Севрюгина но — урамысь тазэ пумитам.

— Укол ке но пуктоно, Пычасозь вамышъяно луэ, — вера Татьяна. — Мӧйы калыклы туж ик капчи ӧвӧл. «Скоройлэн» туж ветлэмез уг поты ке но, секыт луыку, ӧтиськом ини. Ярано, Пычасын больница туж умой, кӧня ке койка но кельтэмын, медаз гинэ пытсалэ сое…

Татьяна Севрюгина но — лыктэм адями. Пермь улосысь татчы ог 30 ар талэсь азьло бызем. Нылзы но пизы быдэ вуиллям ни, гуртазы ик уло. Но пизы Иже корка пуктыны кутскем.

Пермь улосысь Т. Севрюгина Атасгуртэ 30 ар талэсь азьло бызем.

 

— Егитъёслэн туж ик татчы кылемзы уг поты, соосты валано: ӝыт клубе ке но потам потэ, дыр, ук, — ватса нылкышно. — Одӥг пол гинэ ӧй жалялля, татчы лыктӥ шуыса, дор палъёсам табере бадӟым коркаос пуктылэмын, туж шулдыр отын. Татын — мӧзмытгес. Но картэ татын! Кыкнамы но пенсиын ини.

Пумен куинетӥез но тодмомы кылдӥз — Галина Афанасьева. Пенсие потыса но, 2 арзэ колхозын ужам ай. Берло толэзьзэ гинэ, пе, дорам пукисько. Но выльысь ужаны малпа.

— Нылпиослы юрттӥське-ме потэ на, — шуэ со. — Кыкез ик пиосы семьяен уло ни, нунокъёсы 8 кузя, одӥг пиелэн — 3, мукетызлэн — 5. Кыксы но анай капиталэн корка басьтӥзы. Но со уксёен гинэ ӟеч юртъер луоз-а? Озьы пыд вылазы султыны юрттоно соослы. Быдэс улонме, шутэтсконъёсты но адӟылытэк, колхозын ужай — пенсие 8 сюрс 700 манет пала гинэ. Картэ — колхозын сторож, солы пенсиозь эшшо 5 ар ужано на…

Ворсам магазин интыын луоз, пе, черк.

Лопыръяз  горд атас

Гуртоос пӧлысь туж ик тодӥсь ӧвӧл ни Атасгуртлэн толло нуналыз сярысь. Со понна Можга ёросысь шаерчи Николай Емельянов мыло-кыдо вера:

— Мон ачим Атаспочинкаысь, Атасгуртысь школаын но дышетскемын ай. Кылем даурысь 60-тӥ аръёсы вал со. Но школаез йылпумъяме бере кема ик сое ӧз возе ни, быдтӥзы…

Шаерчи верамъя, Атасгуртлэн вашкала нимыз — Пужмезь-Шудӟа. Фёдор Чернов купеч татчы ас коньдонэныз Александр Невскийлы сӥзем черк пуктэм. Соя ик гуртлэсь нимзэ но Александрово кариллям. Волостной центр вылэм татын — Алабгоысь купечъёс вуз карыны вуылӥллям, ярмаркаос ортчылӥллям. Улон пӧзем!

— Гордъёс, тӧдьыос ожмаськон вакыт гуртоос кыкетӥосыз палан вылӥллям, — азинтэ веранзэ Николай Николаевич. — Тӧдьыос ик черкез но чакласа возиллям. Но бронепоездэн вуиллям гордъёс, ваньзэ таркаллям. Троссэ коркаосты но ӝуатӥллям. Горд атас, пе, гуртын туж зол лопыръяськиз. Солы луыса ик гуртлы но Атас ним сётӥллям ини.

Берло аръёсы гурт хозяйствоен ӟеч кивалтӥсь ӧз сюрылы — озьы гуртын улон пумен мӧзмыт кылиз. Палэнын улӥсьёс трос вуизы — чугун сюрес артэ, инкуазь чебер, сюрес вольыт. Но таосыз ас понназыгес улыны тыршо.

Гуртэ вуиз газ.

Ӵошен шулдыргес!

Но берло дыре Атасгурт выльысь сайканы кутскиз. Татын кылдӥз «Петухово» огазеяськон. Возе сое Можгалась ужбергатӥсь Ильсур Фаизов.

— Дорамы 55 ужась, — вера хозяйствоысь бухгалтер Татьяна Кулмакова. — Пӧлазы егитъёс но вань. Уж ваньмызлы сюре, дорамы вань мылкыд карисьёсты кутӥськом. Скал но возиськом, ветыл но будэтӥськом.

Выль ар уе тросэз атасгуртъёс асьсэ кожегес пуко ке но, ӵошен шулдыръяськонлэсь но уг палэнтӥсько. Колхозын одно радъяло шулдыръяськон ӝыт — Тол бабаен, Лымы нылын ик. Тужгес ӟеч тыршисьёсты кузьымен но шумпотто.

Нош туэ кузьым вуиз быдэс гуртлы: та нуналъёсы Атасгуртозь газ кыскизы!

Мукетыз шумпотонзы но вань — гуртазы черкез улӟытыны кутскизы. Со, пе, оло, калыкез выльысь огазеялоз, ӟечезлы оскон пыӵатоз.

Элина Кумачёва

 

Удмурт Дунне
By Удмурт Дунне 12 января, 2017 13:59 Updated