Кызьы пумитазы Тӧролэсь вазиськонзэ элькунысьтымы бадӟым адямиос?

Удмурт Дунне
By Удмурт Дунне Январь 12, 2017 11:34

Кун Кенешлэн Тӧроез В. Невоструев

Ӝоглыкмы медаз усьы

Кыӵе мылкыдыз кылиз Кун Кенешлэн Тӧроезлэн Владимир Невоструевлэн, Удмуртилэн Тӧроезлэсь А. Соловьевлэсь вазиськонзэ кылзыса?

— Экономикаын, гурт удысын, калыкез утёнын воштӥськонъёс шӧдскымонэсь, — шуиз В. Невоструев. — Шуг-секытъёс шоры учкытэк, калык азе пуктэм ужпумъёс, лыдъясько, быдэстэмын.  Но гань-гань кариськыны уг яра. Азьлань мынон понна эшшо но бадӟымесьгес ужпумъёс асьме азе пуктоно.  Туннэ люкам ӝоглыкмес азьланяз но медам уськытэ — эшшо бадӟымесьгес вормонъёс басьтыны мед быгатомы. Нимысьтыз саклык висъяно интыосысь начар социальной объектъёслы. Укноосты вошъяно, липетъёсты кышъяно. Со дыре ик тросгес выроно спортэн. Та удысэз азинтон понна туннэ трос лэсьтӥськомы, кылсярысь, школаосысь спортзалъёсты тупатъяськомы-выльдӥськомы. Но школаос котырысь стадионъёсты но лэсьтоно, нылпиос мугорзэс кыдатон борды мылысь-кыдысь мед басьтӥськозы шуыса. Удмуртилэн Тӧроезлэн вазиськонэз — со шаерамы вань улӥсьёслы азьланяз ужанъя план.

Кун Кенешысь депутат
В. Бузилов.

Азьлань вамыштоно

Кун Кенешлэн сессияз пыриськизы Кун Думаысь депутатъёс но. Кызьы пумитаз Тӧролэсь вазиськонзэ Удмуртиысь одӥг мандатъем 34 номеро округъя депутат Валерий Бузилов?

— Удмуртилэн Тӧроез аслаз вазиськоназ Правительство азе нимысьтыз ужпумъёс пуктӥз,  — шуэ Валерий Бузилов. — Александр Соловьев кӧня ке пол пусйиз со интыосты, кытын министерствоос лябгес ужало, кыӵе удысъёслы бадӟымгес саклык висъяно, кыӵе тырмымтэосты-шекъёсты тупатоно. Вазиськоназ нокыӵе чеберъянъёстэк вераз, кыӵе югдурын асьмеос туннэ улӥськомы, кызьы азинтӥське экономикамы. Та ласянь вераськемез туж кельшиз. Тӧро зэмос вормонъёсты но зэмос быдэстоно ужпумъёсты пусйиз. Лад-лад вераз аслэсьтыз учконъёссэ, кудпала вамыштоно азьланяз. Ужпумъёс пуктэмын бере, Правительстволы матысь ар ӵоже ужан сярысь малпаськоно, вазиськон вылэ пыкиськыса, нимысьтыз программа гожтоно но сое быдэстон бордын тыршоно. Соку эшшо но азинтӥськыны, эшшо но бадӟымесьгес вормонъёс басьтыны быгатомы.

Елена Сараматова

Удмурт Дунне
By Удмурт Дунне Январь 12, 2017 11:34