Кызьы дунъя ортчем арез Удмуртилэн Тӧроез Александр Соловьев

Удмурт Дунне
By Удмурт Дунне Январь 12, 2017 08:30

Тол бабайлы осконо, но аслыд золгес ужано

Удмуртилэн Тӧроез Александр Соловьев шаерысьтымы журналистъёс понна  пресс-конференция ортчытӥз.  Со элькунмылэн туэ азинскемезлы йылпумъянъёс лэсьтӥз, со сяна, иворчиослэн пӧртэм юанъёссылы валэктонъёс сётӥз.

Удмуртилэн Тӧроез А. Соловьев: туэ элькунмы огсыр азинскиз.

Экономика сярысь

Номыр шоры учкытэк,  элькунмы туэ огсыр азинскиз. Куд-ог удысъёсъя — кылем арынлэсь ӟечгес. 11 толэзьлы йылпумъянъёсъя промышленностьын 107,8 процент вуз поттэмын. Коньдонэн вераса, вуз каремын 470 миллиард манетлы тросгес (15,6 процентлы). Та ласянь тау шуыны кулэ оборонно-промышленной комплексмылы — туэ соос 11 толэзь ӵоже 49,2 процентлы тросгес вуз поттӥзы.  Ӟеч ужазы нефтяникъёс но гуртоос.

Экономикаез, палэнысь уксё кыскытэк, азинтыны шуг, соин ик берло аръёсы  кивалтэт нимысьтыз саклык висъя инвестициосын ужанлы. 2015-тӥ арын шаерамы кыскемын вал 80,3 миллиард манет тыр инвестициос, туэ  ар пумозь та лыдпус 85 миллиардозь вуыны кулэ. Нош 2017-тӥ арын чакламын та лыдпусэз эшшо ог 10 миллиардлы  йылтыны. Инвесторъёсын тужгес азинлыко ужало «Калашников» концерн (7 миллиард манет) но  Ижысь автозавод (5 миллиард манет).

Вуоно арын азьвыл «Буммаш» заводлэн интыяз бичаны кутскозы тракторъёс, озьы ик чакламын усьтыны бакча сиён будэтонъя  бадӟым комплекс — талы но луиз 5 миллиард манет кыскыны. Кияр-помидор будэтозы чылкак выль технологиосъя. Озьы, ваньмыз малпамъя  пӧрмиз ке, выль бакча сиён магазинъёсы Выль ар бере ик вуоз ни.

Шоркарлы матын улӥсь-ёс шумпотыны быгатозы выль сюресъёслы. Кайта арлы Удмуртия сюриз Россиысь «Ӟеч но кышкыттэм сюресъёс»  программае. Соя федерал бюджетысь вуоз 620 миллион манет, сомында ик ватсалоз элькун бюджет, озьы выльдэмын-тупатъямын луозы Ижысь но Иж котырысь — Вотка, Сарапул,  Дэри, Якшур-Бӧдья ёросъёсысь — 100 иськем сюресъёс. Нялтас вераса, туэ Удмуртиысь Сюресъёсъя фондлэн  быдӟалаез 8 миллиард манет пала луиз. 2014-тӥ арен ӵошатыса, со 2 поллы тросгес! Сое ас вылазы  тужгес но шӧдӥзы шоркарын улӥсьёс — сюресъёс шӧдскымон волязы.

Йыр висён ӧжытгес луысал, налогъёсын радлыкез ке воштысалзы. Туннэ нуналлы Удмуртия Москвае келя шаерамы люкам 65 процентсэ вытъёсты! Асьме кивалтэт олокӧня пол куронэн вазиськылӥз ни, вытъёсты шори карыны курыса. Кемалась ӧвӧл со пумысен Федерация Кенешын вераськиз Кун Кенешлэн Тӧроез Владимир Невоструев. Депутатъёс дурбасьто, но Россиысь Коньдон ужпумъёсъя министерство  талы пумит…

Гурт сярысь

Гуртоосты, нялтас вераса, берло аръёсы туж ушъя Россилэн Правительствоез но. Кызьы шуо, куддыр сюлолэн но пайдаез вань. Санкциос асьме производительёслы юрттӥзы гинэ. Соос золгес берганы кутскизы, ужазы выль технологиосты кутыны ӧдъязы. Асьмелэн импортэз воштонъя 50 проектмы ужа — Приволжск федерал округъя та кыкетӥ инты. Туэ асьме гуртоос, кӧс гужем шоры учкытэк, 64 миллиард манетлы тросгес  сиён-юон поттӥзы. Учкиськод магазинысь ӝажыосты: сӥль-колбаса, йӧл-вӧй, нянь, бакча сиён — ваньзэ асьмеос поттыны быгатӥськом! Ми ум куштӥськиське миллион тонна йӧл поттон пумысен малпанлэсь но. Бен, кыдёкынгес ай со дырозь, али 743 тонна кыскиськом, но ми вань луонозэ лэсьтӥськом тросгес йӧл кыскон понна. Кылсярысь, туэ гинэ 53 выль ферма пуктэмын!

Тыршиськом гурт удысын ужасьёс сярысь сюлмаськыны — туэ ёросъёсын 25 фельдшер-акушер пункт пуктэмын. Гуртоос талы туж шумпото. Озьы ик юрттӥськом егит специалистъёслы, гуртэ ужаны мынӥсь  врачъёслы, шуиз элькун Тӧро.

Кивалтэт сярысь

Туэ Удмуртиысь Правительствоын трос воштӥсь-конъёс вал: кин ке ужзэ ас мылкыдызъя воштӥз, кинэ ке кошкытӥзы осконэз быдэстымтэенызы сэрен. Таин валче куд-ог экспертъёс вераськыло кивалтэтэз дырызлэсь вазь отставкае келян сярысь но.  Но та пумысен юанлы Александр Соловьев шуиз: бен, куд-ог эшъёс куддыр юмоке вуттыло, но со уг вера, кӧня ке мурт Правительствоысь кошкыса, ми гуэ усём шуыса. Вань кивоштӥсьёс, огез интые мукетыз вуэ. Оглом министръёс умой ужало, нокыӵе бадӟым янгышъёс лэсьтэмын ӧвӧл, отставкае келян сярысь мон уг малпаськиськы. Ар пумын Правительстволэн котькуд ёзчиезлэн ужезлы пыр-поч дунъет сётэмын луоз, соку учком ни, кинэ  ушъяно, кинэ зуркатоно.

Туннэ нуналлы Правительствоын  2 вице-премьерлэн  интыез буш. Рафис Касимов далайгес ни ужзэ быдэсъясьын  ветлэ, депутатъёс сӥзьыл сое юнматонлы пумит луизы.

— Но тулыс, юртъёсы шуныт сётон вакытэз ортчытэм бере, Касимовез мон выльысь ӵекто та интые юнматыны, — вераз Тӧро. — Отчыозь солэн аслэсьтыз ужзэ возьматыны дырыз тырмоз.

Удмуртилэн Тӧроезлэн Россиысь Президент бордын ужась муртэз Светлана Смирнова кошкем бере инты озьы ик буш, али солэсь ужзэ быдэсъя Ирина Теслева (азьвыл Иж администрацилэн йырызлэн воштӥсез луыса ужамын).

— Та интые адями быръемын ӧвӧл на, — шуиз Александр Соловьев, — но малпасько, тупасал Москваын улӥсь адями, Ижысь келям ке, бюджет коньдонэн квартира басьтоно луоз уго.

Янгышъёс  сярысь

— Вал-а бадӟым кивалтӥсь-лэн туэ ужаз янгышъёсыз? — юазы журналистъёс.

— Кыӵе ке бадӟым янгышъёсы ӧвӧл кадь. Но  одӥг учыр пумысен Россилэн Президентэз азьын мон янгыш ик, — меӵак вераз Александр Васильевич.

Вераськон мынэ Кам но Буй шуръёс вамен выжъёс  сярысь. Берло аръёс ӵоже та шаерысьтымы одӥгез тужгес бадӟымез концессионной проект — 14 миллиард манет тыр усе. Проектъя выжез вуттыны чакламын вал 2017-тӥ арын гужем, но ужъёс нырысь-валысь туж умой мынэмен, кенешемын вал ӟеч учырез вазьгес пусйыны — выжез туэ 19-тӥ сентябре усьтыны. Асьме Тӧро Президентэз Владимир Путинэз но ӧтиз, но… выж ӧз усьтӥськы. Концессионер — «Региональная инвестиционная компания» ООО — коньдонзэ «Пересвет» банклы оскиз вал, нош  соиз «ӝуаз», уж ӝегаз…

Табере лэсьтӥськонэз йылпумъяны кредит висъяз  ВТБ банк. Огкылъя концессионер выж вылтӥ ветлэм понна доходысьтыз (выж вылтӥ ортчон дунын луоз) 51 процентсэ 49 ар ӵоже банклы тыроно луоз.

Выж йылаз-пумаз вуыны кулэ кайта гужем шорын. Огласянь, со дась, кылемын дораз нуись сюресъёсты волятон но мар, но малы ӧз лэзе усьтыны, уг валаськы, шуэ Тӧро. Угось Россиын эшшо 14 таӵе объект, сооссэ  усьтыны лэзизы. Зэм, асьме  выж вылтӥ но али нуналаз 2 сюрс пала машина ортче (рабочей движение нимаське), али машинаослэсь дун уг басьто на.

Кыл кутон сярысь

Элькунысьтымы журналистъёсын оградын пресс-конференциын юан сётъязы  нылпиос — Ижысь школьной телевидение.

— Оскиськоды-а тӥ Тол бабайлы? — юазы  юнкоръёс.

— Пичи дыръям оскылӥ, али аслымгес  осконо луэ, — ӧз пӧя Тӧро.

— Соку кин главнойгес: тӥ-а, Тол бабай-а? — уг буйгало огшоры валэктонэн шӧртчиос.

— Выль ар уе, валамон — Тол бабай, нош вань мукет нуналъёсы элькун понна мон кыл кутӥсько, луэ, — валэктӥз Александр Соловьев. — Соин ик сӥзисько шаерысьтымы котькуд адямилы огсыр улон, тазалык. Ваньмыз умой мед луоз.

Зинаида Рябинина

Туспуктэм: udmurt.ru

 

Удмурт Дунне
By Удмурт Дунне Январь 12, 2017 08:30