Кыӵе законъёс улонэ пыӵалозы 2017-тӥ арын?

Удмурт Дунне
By Удмурт Дунне Январь 16, 2017 09:09

Дунтэмгес, чурытгес, шарагес

Туэысен улонэ пыӵаны кутско куд-ог выль законъёс. Соос улон-вылонмес капчигес карыны кулэ.

Табере троссэ документъёсты электрон амалэн лэсьтыны луэ ни — озьы дунтэмгес усе.

 Паспорт дунтэмаз

2017-тӥ арысен трослы дунтэмгес луозы куд-ог кун услугаос, кылсярысь, загранпаспорт, Россилэн кунмуртэзлэсь паспортсэ, вордскем, семья кылдытэм сярысь свидетельство, водительлэсь удостоверенизэ басьтон. Зэм, скидкаос сётӥсько соку гинэ, куке документъёс лэсьтӥсько электрон амалэн — кун услугаослэн порталзы пыр. Кылсярысь, 10 арлы сётӥськись загранпаспортлэн дуныз 3 но ӝыны сюрс манет. Документъёсты электрон амалэн лэсьтӥськод ке, со 1 сюрс манетлы дунтэмгес луыны быгатоз.

 Пуктӥськисьёслы куронъёс чурытазы

Трос квартираем коркаосты пуктӥсьёслы куронъёс чурытазы. Табере соос ас сайтъёсазы одно возьматоно луозы вань документацизэс, ӝутоно юртъёс сярысь ивортонъёссэс, отысь туспуктэмъёсты, огкылъёсты. Ваньмыз та лэсьтӥське дольщикъёслэсь правооссэс утён вылысь.

Выль закон озьы ик лэсьтӥськисьёсты эскерись ёзъёслы тросгес луонлык сётэ. Табере соос чакланы быгатозы, интыяз-а кутэ коньдонэз застройщик, чакла-а лэсьтӥськонъя графикез но мукет.

Юрт вуэм бере тупатӥське гарантия дыр. Та дыр куспын шараясько ке тырмымтэос, застройщик соосты ас кужыменыз палэнтыны кулэ.

Электрон полис

Машина кузёос табере ганяк шокчозы — ОСАГО полисэз лэсьтон понна черодын сылоно ӧвӧл ни. Сое басьтыны луэ, дорысь потатэк, страхованиея  огазеяськонъёслэн сайтазы пырыса. Интернетын огазеяськонлэн бамез котьку ужаны кулэ. Со ӝыны часлэсь тросгес пытсамын луиз ке, Центробанк лицензизэ басьтыны быгатоз.

Та сяна, туэ судъёсы вазиськыны луэ электрон амалэн. Али вань судъёслэн сайтъёссы усьтэмын ни. Нырысь ик отын аслэсьтыд кабинеттэ кылдытоно, собере кинюртэмдэ пуктоно. Бӧрысь сайтъёсысь «Документъёсты сётон» люкетэ пыроно.

Пенсие эн дырты

Чиновникъёслэн пенсие потон дырзы воштӥськоз. Туэ шутэтскыны кошкисьёслы ӝыны арлы тросгес ужано луоз. Арлы быдэ пенсие потон дыр 6 толэзьлы нуйтэмын луоз. Озьы 2032-тӥ арын кышномурт кун служащийёс 63 аресазы шутэтскыны кошкозы, воргоронъёс — 65 аресазы. Кивалтӥсьёс пусйизы: та воштӥськон бюджетысь коньдонэз шыръян вылысь ӧвӧл, ӟеч кадръёсты утён понна малпамын.

Пунэмъёсты шарае уз поттэ

Туэ 1-тӥ январьысен коллекторъёслэн ужзы мукет сямен радъяське. Соослы трос куронъёс пуктэмын. Кылсярысь, пунэмъёссэс берыктыны курадӟисьёсын арняяз 1 пол пумиськыны, нунал ӵоже 1 пол жингыртыны гинэ лэземын. Коллекторлы уг яра соосты кышкатъяны, жугыны, ваньбурзэс тарканы, тыриськонзэс шарае поттыны.

Коллекторъёслэсь ужамзэс чакла Россиысь Правительство бордын нимысьтыз кылдытэм ёз. Куронъёсты тӥясьёс понна чакламын 2 миллион манетозь тыриськон.

Визьмалоз уж

Туэысен улоназы нырысьсэ йыртэмасьёсты, чыры-пыры лушкаськисьёсты кечат-вамат укно сьӧры уз келялэ ини. Соосты 2 толэзьысен 5 арозь визьнодалозы, исправительной центръёсын ужатыса. Йыртэмась отысь ас мылкыд каремезъя кошкыны, уж бырйыны уз быгаты. Уз лэзе сое тамак кыскыны, курытсэ юыны, мугораз тату суредъёс пуктылыны. Яралоз телефон пыр вераськыны, Интернетын пукыны, эмъясьёслы вазиськылыны, 6 толэзь ужам бере 18 нунал отпуск басьтыны. Гижысь-пиньысь ужасьёс, асьсэды котыр ласянь ӟеч возисьёс центрысь кошкылыны быгатозы. Кужмысь уз ужатылэ нуны витись кышномуртъёсты, инвалидъёсты, быдэ вуымтэосты, пересьёсты.

Кысконлы но виналы дунъёс будӥзы

Виналы, шампанскойлы, сурлы дунъёс будӥзы. Та герӟаськемын акциз маркаослэн дунъёссы тэтчемен. Кылсярысь, асьме дорын будэтэм виноградэн лэсьтэм 1 литр вина понна акциз сылэ 5 манет, кунгож сьӧрысь ваем емышен дасям 1 литр вина — 26 манет. Дунъёс ӧз воштӥське коньяклы, брендилы но водкалы. Кудӟытӥсь юонъёсты дасясьёслы чурыт курон пуктэмын: курыт вуосты пластик ӟенеликъёсы кисьтаны уг яра.

Тросгес коньдон кисьтоно луозы кыскыны яратӥсьёс но. Кылем арын 1 тамаклы акциз марка 141 манет сылӥз ке, туэ — 155 манет.

Анай капитал уз йылы

Россиысь Правительство пуктӥз: анай капиталлэн быдӟалаез туэ уз воштӥськы, 492 сюрс манет кылёз. Азьло аръёсы инфляциен сэрен со  ялан будылӥз. 2007-тӥ арын анайёс 250 сюрс манет басьязы вал ке, 2015-тӥ арозь капитал 81 процентлы йылӥз но 492 сюрс манет люкаськиз.

Чакламъя капиталлэн быдӟалаез матысь аръёсы уз буды. Анайёслы юрттэт сётон кыстћськоз 2018-тћ ар пумозь. Экономикаын югдур тупатћськиз ке, та программа азинтэмын луоз.

Секыт висисьёслы капчигес луоз

Секыт висисьёслы эмъюрттэт басьтыны капчигес луоз. Вылӥ технологиосын герӟаськем операциосты соос кема уз вите ини. Азьвыл аръёсы та ужъёслы коньдон вуылӥз бюджет пыр. Туэ Медицина страхованиея фонд уксёез, бюджетэ келятэк, пырак эмъяськон учреждение ыстылоз. Озьы трос дыр шыръяськоз.

Кунгож сьӧрын кун чотын йӧнатӥськон но шаплыгес радъяськоз. Угось Россилэн палэназ ужась клиникаосын огкыл гожтон трослы капчиятэмын.

Огъя суред — регистръёс пыр

Интернетын усьтӥськиз кунысьтымы ВИЧ-инфек-циен паласькемъёслэн  регистрзы. Со юрттоз Россиысь огъя югдурез возьматыны: кӧня висисьёсмы, кызьы соос йӧнатӥсько, эмъюм ваньзылы тырме яке уг. Регистре кужмысь нокинэ уг гожто. Отчы пырымтэ понна висисьёсты кыл кутон улэ уг кыско.

Ужзэ мытӥз Россиысь инвалидъёслэн но регистрзы. Туэ Интернетэ висисьёс сярысь иворъёссэс интыялозы Тазалыкез утёнъя, Ужъя, Дышетонъя но наукая министерствоос, Пенсиосъя фонд. Нош 2018-тӥ арын котькуд сӧсыр адямилэн аслаз кабинетэз  усьтӥськоз. Отын тыро-пыдо пусъемын луоз: инвалидлэн кыӵе тазалыкез, кызьы эмъяське, кӧня пенсия басьтэ. Татын ик мылкыд карисьёс быгатозы юрттэт курыны яке кӧтӝожзэс кисьтыны.

Left Side Content
Right Side Content
Ольга КОРЕПАНОВА

 

 

Удмурт Дунне
By Удмурт Дунне Январь 16, 2017 09:09