«Гурт адями-2016»: Яков Петровлэн мылкыдыз егит

Удмурт Дунне
By Удмурт Дунне Январь 5, 2017 12:57

Яков Парамонович калыкен вераськыны быгатэ. Удмурт сям-йылолъёсын тодматэ нылпиосты, бадӟымъёсты.

Пурга ёросысь Улын Юри гуртысь Яков Петровез удмуртлыкез утись шуыны луоз. Та мыло-кыдо воргорон  25 ар ӵоже «Удмурт Кенешлэн» ужаз пыриське. Озьы ик гуртоосыз солы кема аръёс ӵоже старосталэсь ужзэ оско ни.

Яков Парамонович калыкен вераськыны быгатэ. Удмурт сям-йылолъёсын тодматэ нылпиосты, бадӟымъёсты. Кӧня пол пумиськылӥз но вашкала сям-йылолъёс сярысь вераськылӥз ни со нылпи садысь покчиосын. Солы луыса гуртын тодо но утё удмурт сям-йылолъёсты. Озьы Быдӟым оже быремъёслы сӥзем паркын нырысьсэ ортчиз выль кен пылатон. Табере та сям-йылолэз татын ялан ортчытъяло ни.  Яков Петровлэн кичӧлтэмезъя быдэсъяськись ужрадъёсты вераса но уд быдты. 5 ар талэсь азьло шайвыламы кылдӥз шудон коркалы укшась юрт. Сое ӝутӥмы гуртоосын валче, веме люкаса. Кисьтонэ вуэм калык отын чай юыны, шунтӥськыны быгатэ. Та юртэз утялтыса возе Яков Петров. Туэ гужем шаймылы 95 ар тырмиз. Песянай-песятайёсмес буре вайыса, шае пырон азе кирос пуктӥм. Сое вӧсяз Уча черкогуртысь Вячеслав баӵко.

Яков Парамоновичлы ужъёсты берыктыны юрттэ колхозэн кивалтӥсьмы Иван Петухов. Туэ гужем гуртмылы 320 ар тырмиз. Бадӟым шулдыръяськон ортчиз. Та ужрадлы сӥзьыса, вань сям-йылолъёсты чакласа, ош вандӥм, вӧсям сое. Макем ушъяса сиизы ужрадэ люкаськемъёс ӝукез, виртыремез.

Староста вылын — пенсие потэмъёсты ӟечкылан, урамъёсты жуг-жаглэсь утялтон. Та паймымон воргоронлы нокызьы но 74 арес уд сёты — егит мылкыдо, котькытчы вутске, котьма сярысь сюлмаське. Яков Парамонович урод сямъёсын уг эшъяськы. Адӟем карымон воргорон вӧзын котьку яратоно кузпалыз Хрестинья Михайловна. Соос кыкназы но удмурт культураез азинтонэн выро. Петров кузпалъёс 52 ар валче уло ини. Соос будэтӥзы 3 нылпи. Табере соослэн 6 нунокъёссы но 3 правнукъёссы вань ини.

Та адӟем карымон воргоронэз «Гурт адями» конкурслэн «Выжыоссэ утись» номинацияз дэмласал.

Нина Шутова      

Удмурт Дунне
By Удмурт Дунне Январь 5, 2017 12:57