«Гурт-адями-2016»: Василий Тратканов вашкалазэ улӟытэ

Удмурт Дунне
By Удмурт Дунне Январь 9, 2017 12:51

Василий Тратканов Ува ёросысь Пекшур гуртын вордӥськемын.

Удмурт калык сям-йылолъёсты ӟеч тодэ Василий Тратканов. Та тунсыко воргорон арлы быдэ удмуртъёслэн сям-йылолъёссыя календарь дася.

Василий Тратканов Ува ёросысь Пекшур гуртын вордӥськемын. Та гуртысь ик потэмын тодмо писатель Пётр Блинов. Быдэс улонзэ В. Тратканов тыршиз Пекшурысь колхозын.

Василий Михайловичен мыным ог 20 ар талэсь азьвыл тодматскыны шуд усиз. Школае шаертодонъя кружокам ӧти вал. Со милемыз паймытӥз палэзьпулэсь вӧлэм кык гырпум кузьда вашкала дырпусэныз (календарь). Отын пусйылэмын вал калык сям-йылолъёсты быдэсъяны тупась нуналъёс. Песянай-песятайёсмы со тодметъёсъя улӥзы, унозэ сям-йылолъёсты герӟаллязы толэзь будэмен но кулэсмемен. Табере тае тодӥсьёс чиньыен лыдъямон кылизы ни. Шумпотӥськом, Василий Тратканов тодаз возе на та калык чакламъёсты.

В. Тратканов верамъя, удмуртъёс ныл куразы, выль корка пуктыны кутскылӥзы яке кузь сюрес вылэ потылӥзы, толэзь будыку гинэ. Нош мытэм ужзэс йылпумъязы, толэзь кулэсмыку. Толэзь будыку, пунэмаськылӥзы, нош толэзь кулэсмыку, кураськыса ӧз ветлэ, со токма уж, шуылӥзы. Сад-бакчаын мерттӥськон, емыш утялтон вакытъёсты озьы ик толэзьлэн воштӥськемезъя быдэсъязы. Кубистаез ӵогыны но нюртыны (сылалтыны) будӥсь толэзь дыръя кутскылӥзы. Соку кубиста гулбечын гужемозь ӟеч возиськоз, нош сылалтэмез ческыт луоз, шуылӥзы.

Ваньзэ тае Василий Михайловичлы песянай-песятайёсыз веразы на.

— Пичи дырысеным ик мон гуртамы ортчылӥсь пӧртэм сям-йылолъёсын тунсыкъяськылӥ, кызьы бубаосы вӧсяськылӥзы, адӟылӥ, — шуэ В. Тратканов. — Со сяна, удмурт йылолъёс сярысь трос лыдӟи Семён Виноградовлэн, Альберт Разинлэн, Владимир Владыкинлэн ужъёсысьтызы.

Василий Тратканов выжыосыз сярысь но трос тодэ. Траткановъёс 19-тӥ даурын Пекшурез кылдытӥзы, шуыны луоз. Вашкала документъёсын пусъемын: 1859-тӥ арын гуртын 6 одворчаын 17 воргоронъёс но 21 кышномуртъёс улӥзы. Нош 1872-тӥ арын Яков Тратканов, Никон Тратканов но Пётр Тратканов вань пекшуръёслэн нимынызы Вяткаысь но Малмыжысь документъёсы кинюртэмзэс пуктӥллям. Собере гуртлы 322 десятин музъем висъязы.

Ува ёросысь Мултан гурт котырысь Тукля воршудысь удмуртъёслэсь кырӟанъёссэс люкаса ветлыкуз, Кузебай Герд Василий Траткановлэн песянай-песятайёсыныз пумиськылэм. 1918-тӥ арын Ува-Тукляын спектакль но пуктэм. Сое учкыны 40 гуртысь калык люкаськем. Соку К. Герд Екатерина Траткановалы синмаськем, курам. Но нылашлэн агайёсыз сётыны пумит луиллям.

Василий Михайловичлэн, кӧня со ассэ тодэ, семьяез удмурт газет-журналъёсты лыдӟылӥз, удмурт луэменыз данъяськылӥз. В. Тратканов но Ува ёросысь Кибашлыослэн юртэнызы кивалтӥсь Геннадий Сидоров сюлмаськемъя Чабишур гуртысь 4 дауръем пужым инкуазь синпелетэн нимамын. Та писпуэн гуртоослэн трос тодэ ваёнъёссы герӟаськемын. Тукля воршуд выжыысь калык со пужым дорын Инмарлы вӧсяськылӥз, солы тау карыса вазиськылӥз. 1918-тӥ-1919-тӥ аръёсы Малмыж уездын удмурт школаос усьтылыкуз, Кузебай Герд та пужым дорын валзэ шутэтъям, гуртоосын вераськем. Самой татын, Одотья Боброва  дышетӥсьлэсь кырӟамзэ кылыса, солэн «Вордэм мемие» солдат гурез кылдэм.

Евгений Эжбаев

Ува ёрос,  Чистостем гурт

 

 

 

Удмурт Дунне
By Удмурт Дунне Январь 9, 2017 12:51