«Гурт адями-2016»: Валентина Осипова — яратоно дышетӥсь

Удмурт Дунне
By Удмурт Дунне Январь 3, 2017 13:06

Дышетон удысысь отличник, элькунысьтымы дано дышетӥсь Валентина Павловна химия, биология, экология удысъёсын нылпиослэсь тодон-валанзэс 27 ар ӵоже паськытатэ ни.

 

Кияса ёросысь Вуж Салья шор ёзо школаысь Валентина Осиповалэсь нылпиосын мыло-кыдо, сюлмысьтыз ужамзэ адӟыса, дэмласал сое «Гурт адями» конкурслэн «ӟеч сюлэм» номинацияз.

Дышетон удысысь отличник, элькунысьтымы дано дышетӥсь Валентина Павловна химия, биология, экология удысъёсын нылпиослэсь тодон-валанзэс 27 ар ӵоже паськытатэ ни. Со туж адӟем карымон ужа, тыршемез понна пусъемын пӧртэм таукаронъёсын. Визьнодам нылпиосыз пыро Удмуртиысь вылӥ дышетскон интыосы.

Лякыт сямызлы луыса со котыре нылпиос бинисько. Валентина Осипова соослэсь мылкыдзэс бурдъялля пӧртэм ёрос но элькун ӵошатсконъёсы пыриськылыны. Тыршемез син азьын — В. Осиповаен визьнодам нылпиос ёросысь гинэ уг, элькунысь но Россиысь вожвылъяськонъёсысь вормонъёсын бертало. Нылпиос огымысь верало: туж кельшо Валентина Осиповалэн урокъёсыз, со ваньзэ лад-лад но валамон валэктэ.

Вылӥ категориен ды-шетӥсь Валентина Павловна ёросысь биологияя но химияя дышетӥсьёслэн огазеяськонэнызы кивалтэ. Шаплы кышномурт дышетонъя пӧртэм программаос гожъя, соос пӧлын — «Пинал исследовательёс», «Сюд астэ ачид», «Инкуазез утьыны дышетон» но мукет.
Валентина Осипова 10 ар ӵоже ини кыл кутэ школалэн бакчаез понна. Солэн сюлмаськеменыз сад-бакчазы ёросын устоосыз пӧлын.

Валентина Павловна — котыр ласянь быгатӥсь адями. Нылпиосты визьнодам сяна, азьвыл шудылӥз гуртысь театрын, школалэсь данзэ утьылӥз волейболъя ӵошатсконъёсын. Али но спортэз гажа. Тулыс ёросысь школаос, лулчеберетъя юртъёс, нылпи садъёс пӧлын ортчем «Нациослэн кроссы» вожвылъяськонын 50 аресъемъёс пӧлын вормиз.

Валентина Осипова — ӟеч дышетӥсь, лякыт адями, соин ик визьнодам нылпиосыз яратоно дышетӥсьсылы шуныт кылъёссэс вераны уг жаляло. Тау каро улонын асьсэды шедьтыны юрттэмез понна.

* * *

«Гурт адями» вожвылъяськон азьланьтӥське. Ужъёс дунъясько 3 номинациосъя: «Устоез кивалтӥсь», «Выжыоссэ утись», «Ӟеч сюлэм». Адӟем карымон адямиосты сярысь чуръёстэс яке дэмланъёстэс  туспуктэмен валче ыстэ конвертэн яке электрон почтаямы.

Марина Морякова  

Кияса ёрос, Вуж Салья гурт

Удмурт Дунне
By Удмурт Дунне Январь 3, 2017 13:06