«Гурт адями-2016»: Светлана Викулова уй но, нунал но эмъя

Удмурт Дунне
By Удмурт Дунне Январь 16, 2017 16:27

 

С. Викулова дышетскиз Можгаысь медициная училищеын.

Пичи Пурга ёросысь Пичи Бӧдья гуртысь фельдшермес Светлана Викуловаез туж гажаськом. Калыкен ужамзэ, тазалыкмы понна сюлмаськемзэ пусйыса, дэмласал сое «Гурт адями» вожвылъяськонлэн «Ӟеч сюлэм» номинацияз.

С. Викулова дышетскиз Можгаысь медициная училищеын. Ижын одӥг ар ужаз но, вордӥськем палъёсызлэсь ӵыдытэк, яратоно гуртаз берыктӥськиз. Со дырысен 17 ар ини со пичи бӧдьяослэсь гинэ уг, миндэргуртъёслэсь но тазалыксэс юнматон сярысь сюлмаське.

Можгаын дышетскыкуз, нырысь анаез, собере атаез бӧрсьысь бӧрсе улонысь кошкизы. Матысь адямиосыз бордаз луымтэен ик, Светлана Геннадьевна вала, макем дуно котькуд адямилы шуныт кылъёсын вазиськон, сюлмысь вераськон.

Зэм ик, фельдшермылэн небыт куараезлэсь висёнъёсмы сярысь ик вунэтӥськом кадь. Гуртын солэсь телефонзэ тодӥсьтэмез но ӧвӧл, дыр. Уй-а, нунал-а, бӧдьяос но миндэръёс дораз, визь-нод курыса, жингыртыны быгато. Светлана Геннадьевналэн одӥг пол но лек кылын вазиськемез, уг ваньмиськы, уг тодӥськы шуэмез ӧвӧл, котьку рос-прос валэктоз, эмъяськон амалъёсты дэмлалоз, кулэ луиз ке, уйин но дорад лыктоз.

2011-тӥ арын гуртын туала куронъёслы тупась выль медпункт усьтӥськиз. Солэсь азьвыл ФАП-мы вуж пу юртын интыяськемын вал. Гурзэ пуэн эстылӥзы, толалтэ но отын туж кезьыт вал. Табере туж шумпотӥськом чылкыт, шуныт, югыт медпунктмылы. Эмъяськон юртмес ӝикыт возён понна сюлмаське ачиз ик фельдшермы Светлана Геннадьевна. Гужем со юрт котыре турлы сяськаос мерттэ.

Светлана Викулова семьяын но адӟем карымон анай, ӟеч кузпал. Сергей картэныз 2 нылпиоссэс будэто.

Александра Бочкарёва

Пичи Пурга ёрос, Пичи Бӧдья гурт

Удмурт Дунне
By Удмурт Дунне Январь 16, 2017 16:27