«Гурт адями-2016»: Сергей Гаврилов юрттӥськыны котьку дась

Удмурт Дунне
By Удмурт Дунне Январь 1, 2017 13:01

Сергей Гаврилов Удмурт Пычас гуртмылэн старостаез луэ.

Можга ёросысь Удмурт Пычас гуртын улэ но ужа мыло-кыдо воргорон Сергей Гаврилов. Со гуртмылэн старостаез луэ. Та сюлмо адямилы котькыӵе юанэн вазиськы, со котьку  юрттӥськыны дась.

Удмурт Пычас гуртын 1962-тӥ арын вордӥськем пияш школаын ӟеч дышетскиз. Анай-атаез солы  гурт улонэз гажан, дунъян мылкыд пыӵатӥзы. Соин но, дыр, С. Гаврилов вордскем гуртаз ик ужаны кылиз, семья кылдытӥз.

Сергей Николаевич берло 10 арзэ ужа ЖКХ удысын. Солэн ӟеч тыршемез уно таукаронъёсын пусъемын, угось ужзэ валаса но дырыз дыръя быдэсъя. Берлозэ солы гадьпус бырттӥзы гурт калык пӧлын тылпулэсь утиськонъя валэктон уж нуэмез понна.

Сергей Гаврилов Удмурт Пычас гуртмылэн старостаез луэ. Та воргорон пичиеныз но, бадӟыменыз но огкыл шедьтэ. Калык понна сюлмаськемзэ адӟыса, Сергей Николаевичез 3-тӥзэ бырйизы ни Мельниковское муниципал кылдытэтысь депутатэ.

Зэм но, та воргорон, ас кужымзэ, дырзэ жалятэк, гуртысь улонэз умоятон понна лулысь-сюлмысь тырше. Сергей Гавриловлэн данак сюлмаськонъёсыз. Со чакла, Удмурт Пычасысь сюресъёс толалтэ лымылэсь сузясько-а, гужем тупатӥсько-а. Пудоез тулыс возь вылэ дырыз дыръя но таза поттон сярысь сюлмаське, тылпуэз алонъя кенешонъёс ортчытъя.

Гуртамы 2005-тӥ арын чагыр эстӥськон вуиз. Та понна трос бызьылӥз гурт старостамы. Сергей Гавриловлэн ӝог ужаменыз, 42 семьялэн юртаз вакчи дыр куспын газ лыктӥз.

Сергей Николаевичез арлы быдэ гужемзэ кысык дыръя эштосэ ужаны ӧтё. Колхозын со кадь техникаез валась адямиослы туж кулэясько. Гуртоос но ӵем гинэ С. Гаврилов дӥне, юрттӥськыны курыса, лыкто. Одӥгъёсызлы турын ваёно, мукетъёсызлы пу ворттоно. Оглом вераса, Удмурт Пычасын солы луыса гурт улон азинтӥське но ӟечоме.

Соин но гурт сярысь гожто «Удмурт дунне» но «Можгинские ведомости» газетъёс, удмурт радио пыр верало.

Сергей Николаевич ӟеч кузпал но атай. Кышноеныз будэтӥзы 3 нылпиоссэс. Ваньзы анай-атайзылы данъяськымон, ӟеч адямиос луизы.

Николай Емельянов

Можга ёрос, Удмурт Пычас гурт

 

Удмурт Дунне
By Удмурт Дунне Январь 1, 2017 13:01