«Гурт адями-2017»: Пётр Вахрушев серекъятыса бурмытэ

Удмурт Дунне
By Удмурт Дунне Январь 7, 2017 12:58

 

Дораз эмъяськыны лыктэмъёслэсь но мылкыдзэс Пётр Михайлович ӝутыны быгатэ.

Пётр Вахрушев — усто пинь эмъясь. Озьы ик со серемес мадиськыны быгатэ. Соин быдэс элькунлы тодмо луэ.

Школаын дышетскыкуз, пияш туж яратыса удмурт кылъя но литературая урокъёсы ветлылӥз, гожъяськыны усто пӧрмытылӥз. Сочинениоссэ дышетӥсез котьку быдэс класс азьын  шара лыдӟылӥз. Соин но дышетӥсь луо, малпалляз пияш. Нош 10-тӥ классъёсын дышетскыкуз, фельдшеренызы пумиськиз, соиз П. Вахрушевлы стоматологе мыныны дэмлаз, ӵапак соку колхозазы пинь эмъясьсы ӧй вал.

Озьы П. Вахрушев пыриз Ижысь медициная училищее. Татын дышетскыкуз, кырӟаны ветлӥз  «Ижмаш» культура юртысь «Тюрагай» ансамбле. Училищеез йылпумъямез бере берытскиз вордскем гуртаз — Шаркан ёросысь Мувыр-Вишурын пинь эмъясь луыса ужаз. Заочно амалэн дышетскиз на культурая училищеын, режиссёръёсты дасянъя ёзэтын. Нялтас гуртысьтызы клубын тыршиз.

Колхозазы пинь эмъян кабинет кема ӧз возиськы — коньдон ӧвӧлэн ворсаськиз. Соку Пётр Михайлович Шаркан ёрос больницае выжиз. Отын мылкыдзэ кисьтыны ветлӥз врачъёслэн хоразы.

Улонысь, уж дурысь учыръёсты синйылтыса, газет-журналъёсысь серемес гожъямъёсты лыдӟыса, Пётр Вахрушевлэн юморескаосыз вордӥсько. Нош соосты гожъяны мылкыдыз ӝутӥськиз, «Шулдыр ӝыт» ансамбльысь Анатолий Ушаковлэсь «Одоть но Педоть» юморесказэ кылзыса. Дано артистлэсь мадиськемзэ П. Вахрушев магнитофонэ гожтӥз, соя ик дышетскиз серемес веранъёссэ быдэстыны. Та бордысен солы усьтӥськиз Ижысь сцена вылэ сюрес. Но бадӟым концертъёсы вуэмезлэсь азьло Пётр Михайлович гожтэмъёссэ семьяезлы, калыклы юрттэт сётонъя центре ветлӥсь пересьёслы лыдӟе. Соос ӟеч дунъет сёто ке,  Ижысь филармонилэн сцена вылаз потэ ни. Шаерысьтымы учкисьёс артистэз тодмало но зол кичабонъёсын пумитало ни. Озьы  П. Вахрушев мыло-кыдо пыриське «Маскара», «Штат базар», «Лӧпшо Педунь серекъятэ» элькун  фестивальёсы. Со пусъемын «Удмурт юморез улӟытӥсь» дипломен. Туэ, солэсь удмурт калык понна ӟеч тыршемзэ пусйыса, «Удмурт Кенешлэн» 25 ар тырмонэзлы сӥзем ужрадын сӥлы каризы.

Кыӵе ке шулдыръяськон ортчытоно ке, сюан-а со, юбилей-а, корка пырон-а, ёросысь калык Пётр Вахрушевез  маскаръяськыны ӧте. Угось со пӧрмытэ кӧт висьымон серекъятыны, ужрадэз шулдыртыны. Нош удмурт сямен кырӟамзэ ӟучъёс но пӧсь кичабонъёсын пумитало.

Дораз эмъяськыны лыктэмъёслэсь но мылкыдзэс Пётр Михайлович ӝутыны быгатэ. Пинь портон машиналэсь кышкасьтэмъёсыз ӧвӧл, дыр, но пальпотӥсь, дырыз дыръя серекъятыны быгатӥсь воргоронлэн кылъёсызлэсь висисьлэн шурдонэз тӧлӟе.

Надежда Максимова

Шаркан черкогурт

 

Удмурт Дунне
By Удмурт Дунне Январь 7, 2017 12:58