«Гурт адями-2016»: Олег Пчельниковлэн улонэз — ӵошатскон

Удмурт Дунне
By Удмурт Дунне Январь 5, 2017 13:19

Олег Пчельников вордӥськиз но улэ Сьӧлта ёросысь Зямай гуртын.

Сьӧлта ёросысь Кильмезь муниципал кылдытэтлэн йырыз Олег Пчельников тэк улонэз чик уг вала. Со ялан руль сьӧрын, угось 12 гурт понна кыл кутэ, калыкез спортэн эшъяськытэ, кырӟанъя пӧртэм ёрос конкурсъёсы пыриське.

Олег Пчельников вордӥськиз но улэ Сьӧлта ёросысь Зямай гуртын. Та воргоронэз 1980-тӥ арысен тодӥсько.  Соку со Ленин нимо колхозын ужа вал ай, агитбригадаосын бускель гуртъёстӥ, концертъёс пуктыса, ветлӥз. Ялан пыриськылӥз колхозын радъяськылӥсь спортъя ӵошатсконъёсы.

Берло ВЛКСМ-лэн райкомаз гурт удысъя инструктор луыса тыршиз. Со кичӧлтэмъя Толошур но Кӧпка фермаосын егит ужасьёслэн звенооссы кылдӥзы. 2000-тӥ аръёсы Олег Викторович Ленин нимо колхозын бригадир вал. 2008-тӥ арын ёросын Кильмезь муниципал кылдытэт пӧрмытӥзы. Зямайёс Олег Викторовичез бырйизы отчы депутатэ. Нош 2012-тӥ арысен та муниципал кылдытэтлэн йырыз луэ ни.

Зямайын улонзы ӟечомиз. Толалтэ сюресъёсын шугомонъёс уг кылдыло, соос ялан сузясько. Жуг-жаг ласянь югдурмы воштӥськиз. Азьвыл гурт пуме силё нуллӥмы ке, табере толэзьлы 2 пол черкогуртысь машина жагмес нуэ. Силё-сюрномес утялтыса, гурт пуме емышо куакъёс мерттӥмы. Гурт котырез басьтэ вал ини борщевик, али сое котькуд ар турнало. Гуртоос понна зэмос шумпотон вал кылем арын пуктэм шутэтскон инты. Олег Викторович кичӧлтэмъя но гуртысь ужбергатӥсь юрттэмъя зямайёс асьсэос гур пуктӥзы, спорт площадка  тупатӥзы. Табере дорамы Сьӧлталан улӥсьёс чорыганы, табань пыжыны вуыло.

2-тӥ арзэ гуртмы пыриське ни «Сазь гурт» элькун ӵошатсконэ. Туэ та конкурсэ быдэс муниципал кылдытэтэз кыскыны пӧрмытӥз О. Пчельников. Шӧдӥськом, та вожвылъяськон чотын гуртоос умойлы воштӥсько. Арлы быдэ муниципал кылдытэтамы радъяськылэ тужгес чебер коркалы, сяськаё бакчалы вожвылъяськон. Гуртоос отчы мыло-кыдо пырисько, вормисьёсыз кузьымъёс басьто. Зямай гурт вӧзтӥ Сибирь тракт ортче. Олег Викторович юрттэмъя сюрес вожын  туристъёслы инты тупатэмын. Табере нылпиос татчы вуыло ёросысь культурая юртлэн «Вашкала Сибирь сюрес дурын» туризмъя маршрутэз чотын.

О. Пчельников али туж сюлмаське, Ленин нимо колхоз куашкан калэ вуэмысь. Колхозлэн музъемъёсыз вань зямайёслы пайёс чотын сётъямын. Али сюлмаськиськом, со музъемъёс тэк медаз кылле шуыса.

Олег Пчельниковен одӥг гуртын улӥськомы ке но, троссэ со сярысь ум тодӥське вылэм. Бускельмы спортъя ӵошатсконъёсын но трос вормонъёс басьям. Сямыз зӥбыт бере, быгатонлыкъёсыз сярысь Олег Викторович вераськыны уг яраты, соин вормонъёсыз сярысь я газетысь, я телевизорысь тодӥськом. О. Пчельников ялан пыриськылэ Гурт ӵошатсконъёсы. Алигес тодӥ, со ветеранъёс пӧлын гурезьёстӥ бызьылонъя Удмуртилэн 11 пол чемпионэз луэ шуыса. Вормылэмын Россиын но. Кузпалыз сьӧрысь уг кыльы Лариса кышноез но, со но арлы быдэ ёрослэсь данзэ уте элькун вожвылъяськонъёсын. Пӧртэм ӵошатсконъёсы нулло Савелий пизэс, сое но спортсмен будэтэмзы потэ.

Олег Викторович спортэн эшъяське бере, гуртооссэ но та удысэ кыскыны выре. Солэн ӝуткамезъя зямайысь егитъёс ёросысь но элькунысь вожвылъяськонъёсы пырисько. Озьы Александр но Илья Пчельниковъёс Ижысь Демидов нимо спортъя школаез йылпумъязы, нош али отын дышетске Иван Дубовцев. Олег Викторовичлэн кичќлтэмезъя ёросын куасэн ворттылонъя сюресэз югдытӥзы. Табере отын ӝыт пал но ворттылыны луонлык вань, Сьӧлталан улӥсьёс отчы юмшаны, мугорзэс кыдатыны ялан ветло. Вераны кулэ на: кивалтӥсьмы ёросысь нырысетӥосыз пӧлын ГТО-лэсь куронъёссэ зарни пуслы быдэстӥз.

Со сяна, Олег Викторовичез ӵем адӟыны луэ ёрос культурая юртлэн сцена вылысьтыз но. 8-тӥ Мартлы кышноослы удмурт кырӟан кузьмамез ӟеч сямлы пӧрмиз ини. Семьяеныз но котькыӵе ужрадъёсы пырисько. тужгес бадӟым вормонзы — пельняньлы сӥзем 1-тӥ элькун фестивальын 3-тӥ инты басьтэмзы.

Людмила Столбова

Сьӧлта ёрос, Зямай гурт

Удмурт Дунне
By Удмурт Дунне Январь 5, 2017 13:19