«Гурт адями-2016»: Николай Вахрушев — яратоно атае, ӟеч дышетӥсь

Удмурт Дунне
By Удмурт Дунне Январь 16, 2017 14:40

Дунне вылын вань сыӵе адямиос, кудъёсыз вӧзын астэ золгес но визьмогес, чупресгес но дӥсьтӥсьгес шӧдӥськод. Соос вордӥськемын, кожалод, сюлмо луэменызы дуннемес ӟечгес карыны.  Сыӵе адямиос пӧлысь одӥгез- мынам атае но дышетӥсе Вахрушев Николай Васильевич.

Николай Васильевич 25 ар пала ини Шаркан ёросысь Карсашур школаын физкультурая дышетӥсь луэ.

Николай Васильевич 25 ар пала ини Шаркан ёросысь Карсашур школаын физкультурая дышетӥсь луэ. Ёросамы сое тодӥсьтэмез ик ӧвӧл, дыр. Со адӟем карымон адями. Быдэс улонэз спорт удысэн герӟаськемын. Кивар школаын дышетскыкуз ик, куасэн бызьылыны кутскиз, нырысетӥ вормонъёс басьтӥз. Собере армие кошкиз, службазэ спортротаын нуиз. Армиысь бертэмез бере тодон-валан люказ Пермь улосысь Чайковский городысь физкультурая институтын. Отын азинтӥз куасэн бызьылонзэ, со сяна, капчи атлетикаен выриз, тунсыкъяськиз каратэен но боксэн. Удмуртилэсь данзэ утьылӥз Россиысь ӵошатсконъёсын,  отысь вормонъёсын ӵемысь бертылӥз.

Спортэз яратэмзэ Николай Васильевич тырше дышетскисьёсызлы но пыӵатыны. Физкультурая урокъёсы пиналъёс котьку шумпотыса лыкто. Угось дышетӥсьсы мылкыдзэс бурдъяны быгатэ, урокъёсыз туж тунсыко ортчо. Ӟеч психолог выллем, котькудӥныз огкыл шедьтэ: кулэ дыръяз лек вазьыны но, лач-лач валэктыны но быгатэ.

Физкультурая урокъёсты сяна, Николай Васильевич куасэн бызьылонъя секциез нуэ. Татчы арлы быдэ мыло-кыдо ветло ог 30-40 нылъёс но пиос. Тросэз спортъя мастер, спортъя мастере кандидатъёс луизы, чиньыен лыдъянтэм ини спортъя 1-тӥ, 2-тӥ я 3-тӥ разряд басьтэмъёс! Кылсярысь, Алёна Перевозчикова вормонъёсыныз быдэс Россиын  тодмо луиз ини. Со биатлонъя но куасэн бызьылонъя спортъя мастер, Россилэн биатлонъя чемпионэз. Карсашур нылпиос ялан пыриськыло но чемпионъёс луо ёросын ортчылӥсь ӵошатсконъёсын, арлы быдэ Шаркан ёрослэсь данзэ утё  элькун вожвылъяськонъёсын. Дышетӥсьсылэсь адӟем карыса, тросэз пиналъёс пытьыетӥз вамышто — физкультурая дышетӥсь, тренер луыса ужало.

Али школаямы спортэн вырыны котыр ласянь луонлыкъёс вань. Пиналъёслэн физкультурая урокъёссы туала спортзалын ортчо, куас сюресэз «Буран» машина лёге, со тылъёсын югдытэмын, школа бордын лэсьтэмын ӟеч спортплощадка. Николай Васильевич ужаны кутскыку ай, пиналъёс физкультура урокъёссэс лымы но, зор-кот но, кезьыт дыръя но педлон ортчытоно луо вал. Али нылпиос шуныт, югыт интыын мугорзэс кыдато.

Нуналлы быдэ Николай Васильевич калык пӧлын: нуназе котыраз нылпиос бинисько, ӝытазе школалэн спортзалаз люкасько Карсашурысь но котыр гуртъёсысь егитъёс но мӧйыос. Солэн кичӧлтэмезъя гуртысь калык — нылпи садысь пиналъёс, арлыдоос, кивалтӥсьёс — кужымзэс мертало спортъя вожвылъяськонъёсын. Шутэтскон вакытэз но со уг тоды кадь: я нылпиосты, я арлыдоосты ӵошатсконъёсы дася. Солэн мылкыдыз но, дырыз но ваньмызлы тырме. Тӥни сыӵе со дышетӥсь, гурт калыксэ спортэ кыскись! Николай Васильевичлэн ӟеч ужамез пусъемын трос таукаронъёсын.

Ми атаеным, нырысетӥ лымы усе ке, куас вылэ султӥськом ини но, куспамы ӵошатскон кутске. Ӝоген атае котырес лыдпуссэ пусъёз. Вань дышетскисьёслэн нимынызы ӟечкыласько сое но сӥзисько шуд но тазалык. Тон адӟем карымон дышетӥсь, усто атай но ӟеч сюлэмо адями!

Ульяна Вахрушева

Шаркан ёрос,  Карсашур школа

 

 

Удмурт Дунне
By Удмурт Дунне Январь 16, 2017 14:40