«Гурт адями-2016»: Надежда Лекомцевалэн кужымез вожъяськымон

Удмурт Дунне
By Удмурт Дунне Январь 16, 2017 13:34

Надежда Лекомцева Зура черкогуртысь «Рябинушка» нылпи садын воспитатель луыса ужакуз, анай йӧлын пыӵам удмурт сям-йылолъёсты, кырӟанъёсты-веранъёсты ужаз кутыны тыршиз.

Дуннеез уд  вала,  ас вордскем шаердэ  умой ӧд  ке тоды, таӵе кылъёсын  вамышъя дунне вылтӥ Эгра ёросысь Зура клубысь фольклоръя методист  Надежда Лекомцева. Кырӟась-верась, сям-йылолъёсты улӟытӥсь, со вань сюлмыныз гажа шаерзэ, сюлмаське  калыкез понна.

Надяез пичиысен удмурт-ӟуч кырӟанъёс, эктонъёс котыртӥзы. Бубиз арганэн но балалайкаен шудэ вал. Мумиз вашкала веранъёсты мадьылӥз,  вордскем интыдэ дунъяны но данъяны дышетӥз. Оло, соин но  пичи Надилэн дышетӥсь луэмез потӥз — Сарапулысь педагогической училищеез йылпумъяз.

Зура черкогуртысь «Рябинушка» нылпи садын воспитатель луыса ужакуз, анай йӧлын пыӵам удмурт сям-йылолъёсты, кырӟанъёсты-веранъёсты ужаз кутыны тыршиз. Озьы со ас ӧрзэ шедьтӥз. Н. Лекомцевалэн сюлмаськемезъя нылпи садын музей сэрег усьтӥськиз. Маиз но татын ӧй вал: вашкала сынысен  кутскыса кӧкы дорозь. Пичиослы Надежда Михайловна вералляз удмуртъёслэн сям-йылолъёссы, тӥрлыкъёссы, кырӟанъёссы сярысь,  озьы ик тодматылӥз Зура черкогуртлэн историеныз.

Удмурт сям-йылолъёсты утён но азинтон удысэз мытӥз, Зураысь клубын методист луыса ужакуз но.  Мар быдӟа ужез берыктэ Надежда Михайловна! Со клуб вќзы Совето Союзысь Геройлы Спиридон Стрелковлы сӥзем музей усьтӥз. Зура сярысь данак материалъёсын, туспуктэмъёсын альбомъёс дасяз. Мае гинэ отысь тодыны уг луы: Зура но котыраз интыяськем гуртъёс, вашкала сям-йылолъёс, Митрофан  черк сярысь. Музейын радъям адӟытонъёс мадё Быдӟым оже ветлэмъёс, ож мышкын ужамъёс, Балезино сюресэз лэсьтонэ пыриськемъёс сярысь. Ваньзэ вераса но уд быдты.

Надежда Михайловна лулчеберетъя юрт бордын ужась «Ветеран» клубен, нылпиослэн «Эшъяськон» но бадӟымъёслэн «Бускельёс» фольклоръя коллективъёсынызы кивалтэ, «Арбери» кружок нуэ. Одӥг ужрадмы  но,  шулдыръяськонмы но сотэк уг ортчы: фольклорлы сӥзем ӝытъёс, Митрофан  базарын  Выль ар, Вӧйдыр…

Со сяна, Н. Лекомцева коллективъёссэ пӧртэм конкурсъёсы пыриськытэ. Туэ гинэ «Эшъяськон» нылпи ансамблез «Выжыос» («Путь к истокам»)  ёрос фестивальын 2-тӥ инты басьтӥз,  выжы калыкъёслэн сям-йылолъёссылы сӥзем элькун конкурсын 3-тӥ интые потӥз, «Иднакар» калыккуспо конкурсын 2-тӥ степенё лауреат луиз.

Надежда Михайловна — задор, чупырес, тэк улонэз тодӥсьтэм адями. Солэн лулпуш кужымезлы вожъяськоно гинэ.

Елена Агафонова.

Эгра ёрос,  Зура черкогурт

Удмурт Дунне
By Удмурт Дунне Январь 16, 2017 13:34