«Гурт адями-2016»: Любовь Ганькова мае кизиз – сое араз

Удмурт Дунне
By Удмурт Дунне Январь 16, 2017 13:41

Алнаш ёросысь Ӟуння гуртын вордӥськем удмурт нылкышно Любовь Ганькова гуртоосыз, калыкез, удмурт сям-йылолъёс сярысь 10 книга поттӥз.

Алнаш ёросысь Ӟуння гуртын вордӥськем удмурт нылкышно Любовь Ганькова гуртоосыз, калыкез, удмурт сям-йылолъёс сярысь 10 книга поттӥз. Паймоно, макем паськыт тодон-валанэз, кужымез, быгатонлыкез гуртын будэм огшоры кышномуртлэн.

Улон сюрес ачим утчай —

Яратылӥ, ыштӥ, ути,   келяй,

Дыр дышетӥз, эмъяз,  уно валай:

Мар ке кизи — сое арай.

Та чуръёс пыр шаерчи, кылбурчи, прозаик Любовь Ганькова аслэсьтыз улон сюрессэ суреда. Кылбурын нылкышнолэн вормонъёсыз но, ыштонъёсыз но, син азе яркыт пуксьымон, гожтэмын.

— Асме тодӥсько 3 аресысен, — вера Л. Ганькова. — Сыӵе пичи дыръям ик мон ӵужайме кырӟанэн буйгатъяны быгатӥсько вылэм ни. Со сьӧры куноостӥ ӵемысь ветлылӥ. Мӧйыослэсь кырӟамзэс, ӝӧк улэ ватӥськыса, кылзӥськисько вал. Бӧрысьгес Калиновка гуртэ выжимы. Отын ӟучъёс улӥзы. Соос пӧлын туж секыт ке но вал, ӟуч кыллы ӝог дыши. Собере выльысь Ӟунняла берытским.

Любовь Ганькова, Байтэрекысь школае мыныкуз, ас ёзъёсыз пӧлын огназ ӟуч кылэз  тодэ вал. Нылаш умой дышетскиз, туж етӥз но шаплы вал.

Школаез йылпумъяса, фермае ужаны кылиз. Но отын кема ӧз ӝега:   дышетӥсьёсыз солы тодон-валанзэ паськытатыны дэмлазы. Бухгалтере дышетскемез бере сое Байтэрекысь сельпое лыдъясь-чотасе юнматӥзы. Собере Алнаш ёросысь «Сельхозтехника» огазеяськонын 20 ар ужаз. Со вакытэз Любовь Леонидовна шунытэн тодаз вае.  Соку пачылась мылкыдзэ кисьтыны хоре ветлылӥз. Кырӟасьёс пӧртэм ӵошатсконъёсы пыриськылӥзы, котьку вормисьёс радын вал.

Та шудо аръёсаз Любовь Ганькова шаертодонэн тунсыкъяськыны кутскиз, архивъёсын бугыръяськылӥз. Солэн ныл фамилиез сярысь пыр-почгес тодэмез потӥз. Озьы Казаньысь, Кировысь, Москваысь архивъёсы гожтэтъёс ыстылӥз. Тодэмезъя эшшо но тросгес тодэмез потылӥз. Озьы шаертодон сое ас бордаз мургес но мургес кыскиз.  Ӟуння гуртэз, калыкез сярысь узыр материал люказ. Сое «Алнаш колхозник» ёрос газетын «Даур ортче, пытьы кельтэ» нимын печатлаз. Бӧрысь 2006-тӥ арын та нимын ик книга поттӥз.

— Ӟуння выжыос Туймы шур дуре лыктӥллям 1553-тӥ аръёсы, Иван Грозныйлэн войскоез Казанез басьтэм бере, — вера Л. Ганькова историысь чуръёсты. — Татӥ ортче вал бадӟым сюрес. Котыраз улӥсь крестьянъёс трос выт тыризы. Казаньын, Кировын но Ижкарын архивъёсын ужаме бере тодӥ, Ӟуння гуртлэн нимыз 1743-тӥ арын документъёсын пумиськылэ шуыса.

Та адӟем карымон кышномуртлэн гуртэз сярысь тодон-валанэз паськыт. Кылсярысь, со 1644-тӥ арысен кутскыса татысь потэм котькуд семьялэсь выжы писпузэ вералоз. Алнашын улӥсь воршудъёсты тодэ.

Документъёсын бугыръяськем сяна, выжыосыз сярысь  Л. Ганькова гурт калыклэсь юалляськылӥз. Кылбуръёсыз, веросъёсыз гожтэмын, удмурт сям-йылолъёсты санэ басьтыса. Кылсярысь, Любовь Ганькова, удмурт кырӟанъёсты люкаса, поттӥз «Ӟуння кырӟа, эктэ, вера» бичетсэ. Лэчыт веранъёслы сӥземын «Вераськод ке, вера» книгаез, нош нылкышно сюлэмзэ со усьтэ «Мон кышномурт» ужаз. Любовь Леонидовна,  вашкала кылъёсты кутыса, гожъяське, тросэз соос вунэмын ни. Кылсярысь:

Монэ шуо перышта,

Кыллы бырем потьырна.

Шальматор, шуэ ӵужи.

Вераськын, пе, ӝог дыши.

Уӵыпи сётэм куара,

Льӧль туссэ кузьмам  сяська.

Чупали кадь выросэ,

Ӵуж мертчан кадь йырсие.

Яратско ӵужи вӧзын

Табань пыжын гур азьын.

Котькытын мон асаба,

Ӵужие каре абба.

Тодэме потэ ваньзэ:

Кытчы ӟоз лэсьтэм карзэ,

Кытысь вордӥське нуны,

Кытын улэ кырпуны,

Малы коӵыш пуштырес,

Кинэ шуо ӵушмырес?

Топ-топ веша ӵужие:

«Чульччобей тон, дыдые,

Унозэ ке тодоно,

Чабей ӝук ай сиёно.

Будэмъяд луод визь пог,

Тон али ай вӧй комок».

Татын пыртэмын туала лыдӟисьлы валантэм кылъёс: перышта — огинтыяз пукыны чидасьтэм; потьырна — бӧтьыртӥсь; шальматор — кыл йылаз мар лыктэ, сое вера;  чупали — кенӟали; асаба — мерскись, косъяськись; чульччобей — ури-бери; абба карыны — чупаны.

Та адӟем карымон, етӥз кышномурт вашкалазэ, удмуртсэ  уте но улӟытэ. Гуртоосыз таӵе бадӟым уж нуэмез понна сое гажало но ярато.

Людмила Сурчакова

 Алнаш черкогурт

Удмурт Дунне
By Удмурт Дунне Январь 16, 2017 13:41