«Гурт адями-2016»: Александр Штумф калыкен ӵош будӥз

Удмурт Дунне
By Удмурт Дунне Январь 6, 2017 12:55

 

Александр Штумф вордӥськемын Ува ёросысь Узей-Тукля гуртын.

Ува ёросысь Александр Штумфез шуысал гуртэз зэмос утись. Солэн ужез бергатыны быгатэмезлы луыса гуртамы музъемъёс гырисько, коркаосмы шунтӥсько. Та адӟем карымон воргоронэз дэмласал «Гурт адями» конкурслэн «Устоез кивалтӥсь» номинацияз.

Александр Штумф вордӥськемын Ува ёросысь Узей-Тукля гуртын. Шудзэ утчаса палэнтӥ ӧз ветлы — кытын вордӥськиз, отын ик нылпиоссэ будэтӥз, улэ но ужа. Калыкен ӵош со ачиз но будӥз но кыдаз. Со сярысь шуыны луысал: вань сюлмыныз бурмемын вордӥськем музъем бордаз. Та кылъёс чеберъяськон понна гинэ верамын ӧвӧл — соослэн зэмлыко луэмзы ӟеч адӟиське Александр Штумфлэн улон сюресэз вылын.

Александр Филиппович  ужаны кутскиз огшоры шофёрын. Собере механик луэ, бӧрысьгес «Увинский» совхозысь валтӥсь инженерлэсь ужзэ быдэсъяны кутске. Кӧня ке аръёс ӵоже ёросысь гурт удысъя управлениын инженерной службаен кивалтэ. Бӧрысь со вуэ Узей-Тукля гуртысь школае. Татын со механизацияя урокъёсты нуиз. Кытын гинэ ӧз ужа, котькытын ассэ быгатӥсь специалистэн возьматӥз.

Но зэмос быгатонлыкез кыре потӥз ужбергатӥсь луэмез бере. Солэн сюлмаськеменыз, гуртамы вуиз чагыр эстӥськон, пуктӥськизы ву кыскон башняос, кылдӥзы ву гумыос.

1990-тӥ аръёсы «Увинский» совхоз куашкам бере тросэз калык ужтэк кылиз, музъемъёс гыриськытэк пашмизы. Александр Штумф та секыт вакытэ гуртысь калыкезлы юрттӥськиз, кылдытӥз крестьян-фермер хозяйство. Улӟизы бусыос, кылдӥзы ужан интыос. Хозяйство юнмам бере Александр Филиппович семьяеныз валче усьтӥз  нюлэсэн вырись предприятие.

2010-тӥ арын ӝутӥз туала куронъёслы тупась фанера поттонъя цех. Сое завод шуыны но луоз. Отын поттэм вузъёс, Россиысь пќртэм улосъёсы сяна, кунгож сьӧры но кошко. Та 3 предприятиын 450-лэсь ятыр гуртоос ужало. Отын тыршо Узей-Тукляын, Ува каргуртын, Сьӧлта, Красногорск, Сюмси но мукет ёросъёсын улӥсьёс.

3 ар талэсь азьло та семья кичӧлтэмъя Узей-Тукляын пруд ӵыпизы, отчы чорыг лэзизы. Табере гуртоослэн тымет дурзы чорыган, шутэтскон интылы пӧрмиз.

Озьы ик Штумфъёслэн юрттэмзыя Инмар Анайлэн Семистрельной обросэзлы сӥзем пу черк ӝутӥськиз.

Мон малпамъя, янгыш уз луы, Александр Штумфез Узей-Тукля гуртлэн зэмос утисез шуимы ке.

Геннадий Сидоров

Ува ёрос, Узей-Тукля гурт

Удмурт Дунне
By Удмурт Дунне Январь 6, 2017 12:55