«Гурт адями-2016»: Визьнодась, куиськись, гожъяськись Евгения Анисимова

Удмурт Дунне
By Удмурт Дунне Январь 16, 2017 17:25

Евгения Анисимовалэн котыраз нылпиос бинисько, яратыса дораз куное вуыло.

Кияса ёросысь Калашур гуртысь Евгения Анисимова кырӟа-эктэ, кылбур, кырӟан гожъя, киужъёсыз синъёсты палёмыто.

Евгения Вячеславовна Анисимова вордӥськиз Дэбес ёросысь Ӟаско (Верхний Шудзялуд) гуртын. Римма сузэреныз соос одӥг нуналэ югыт дуннеез адӟизы. Кыктоос дырызлэсь вазь лябесь, висисесь вордӥськизы. Римма кема ик ӧз улы, нош  Женя улон борды ӝабырскиз.

Нылаш дышетӥсьлэсь сюрессэ бырйиз. Дэбесысь педучилищеез йылпумъямез бере сое ыстӥзы Кияса ёросысь Выль Тӥгырмен гуртысь школае. Егит визьнодасьлы тодон-валан удыслэн ӧраз пырыны юрттӥськиз Мария Никонова дышетӥсь.  Берло та кык нылкышноос зол эшъяськизы, кыӵе гинэ ужъёсты берыктыны ӧз быгатэ.  Валче соос гуртысь клубын концертъёс радъяллязы. Сцена вылын котьку вал удмурт дэремъёсын, айшетъёсын, уксё-тӥрлыкен. Али ке но Евгения Вячеславовна аслаз вурем дӥсеныз, куэм айшетэныз калыкез шулдыртэ. Со кичӧлтэм улсын Калашурысь клубын «Чебер апайёс» ансамбль кылдӥз.

Евгения Вячеславовна кема визьнодаз Лутоха школаын но.

Лэсьтыны быгатымтэ ужез солэн ӧвӧл — куиськыны, керттӥськыны, вуриськыны, чильпаськыны, гын сапег гындыны, муш вордыны — ваньмыз солэн усто пӧрме. Син куспын кылбур малпалоз, солэсь кырӟан пӧрмытоз,  шулдыръяськонлы сценарий дасялоз. Гуртоос арганчилы но уг ёрмо — Евгения Анисимовазы баянэн но усто шудэ. Та адӟем карымон кышномуртлэн кырӟанъёсыз, кылбуръёсыз бичетэн поттымон люкаськемын ни. Пӧртэм аръёсы соос печатласькылӥзы «Кенеш», «Кизили» журналъёсын, «Удмурт дунне», «Дась лу!» газетъёсын.  Нылпиосын ӟеч ужамез «Калыкез дышетон удысысь отличник» нимен пусъемын.  Зэм но, Е. Анисимовалэн котыраз нылпиос бинисько, яратыса дораз куное вуыло. Ваньмызлы дыр шедьтэ, саклык висъя та ӟеч сюлэмо нылкышно. Со доры юромо мастер-классъёсы бадӟымъёс но вуыло, соосыз Евгения Вячеславовна куиськыны, туйлэсь арбериос пӧрмытыны, тылылэсь суредъёс лэсьтыны дышетэ.  Кибашлылэн ужъёсыз ёросысь но элькунысь пӧртэм адӟытонъёсын вылӥ дунъясько.

Евгения Вячеславовна — ӟеч кузпал но анай.  Нылпиосыз бурд улысьтыз кемалась потӥзы ни ке но, атай юртазы ӵемысь бертыло. Яратоно дышетӥсьсэс адӟыны, шуныт кылъёс вераны ӵемысь вуыло дышетэм нылпиосыз но. Та тужгес вылӥ данъет Е. Анисимова понна.

Елена Камашева

           Кияса ёрос, Калашур гурт

Удмурт Дунне
By Удмурт Дунне Январь 16, 2017 17:25