Фин-угор дуннелэн шоркарез — Карелиысь Вокнаволок гурт

Удмурт Дунне
By Удмурт Дунне Январь 23, 2017 11:05

Быгыос Вокнаволокын.

Выль ар шутэтскон нуналъёсы отын фин-угор арлы кутскон сётэмын вал.

Карелие ми но, фин-угор дуннелэн нырысетӥ шоркарысьтыз — Шаркан ёросысь  Быгы гуртыысь — усточиос ӧтемын вал. Мынӥмы Быгы муниципал кылдытэтлэн тӧроез Н. Беляева, удмурт культурая «Быгы» центрлэн кивалтӥсез Ж. Ермолаева но центрын тыршисьёс Ю. Кузьмин но мон, А. Савельева.

Туэ фин-угор дуннелэн лулчеберетъя шоркарез луон понна нюръяськизы Финляндиысь Кухмо кар, Сиппола гурт но Карелиысь Вокнаволок гурт. Вераны кулэ: карелъёс 2015-тӥ арын но конкурсэ пыриськизы вал ни.

— Финъёслэн программазы «Калевала» эпослы, сям-йылолъёсты утёнлы  сӥземын вал, нош карелъёслэн — кылзэс азинтонлы, — вераз Вокнаволокысь Сари Хайминен. — Оскиськом, та проектэ пыриськыса, гуртлы но, калыклы но пайда ваём шуыса. Вокнаволок выль сямен шоканы кутскоз, азинскоз, нош пиналъёсмы но соослэн нунокъёссы вордскем гуртазы сюрессэс ноку но уз вунэтэ.

Вокнаволок гурт Костомукша кар борды юнматэмын бере, сӥё-дано ужрадъёс гуртын но, городын но ортчизы. Нырысетӥ нуналаз ми вуим Вокнаволоке, сӥё-дано ужрад ортчиз Вокнаволокысь Гуртлэн коркаяз. Со асьме клубмылы укша, отын интыяськемын карел культуралы сӥзем музей, пичи сценаен зал, кружокъёс ортчытъяны 2 висъет. Милемыз нуллӥзы на школа-садэ, отчы ветлэ 36 адями: 30-ез  — школае, 6-ез — нылпи садэ. Вераны кулэ, Вокнаволок — карел кыллэн кӧкыез, тодмо фин-угор «Калевала» эпослэн тросэз рунаосыз (кырӟанъёсыз) та гуртын гожтэмын. Вокнаволокын улэ 600 пала адями, коркаоссы пулэсь лэсьтэмын — школа-садзы но, соос пуэн эстӥсько.

Кыкетӥез ужрад ортчиз Костомукшаын — Карелиысь тужгес егит городын (солы 40 ар сяна ӧвӧл на). Со ӵогемын нюлэс пушкын корт поттонъя заводлы луыса. Татын туж утё нюлэсъёссэс, вань заповедниксы, нош ужбергатӥсьёссы туризмзэс ялан азинто.

Маин меда паймытоз фин-угор культуралэн выль шоркарез, шараямын ӧвӧл на. Огез гинэ тодмо: тужгес бадӟым ужрад ортчоз 6-тӥ гудырикошконэ, Ильин нуналэ. Калык оске, гуртын арлы быдэ ортчылӥсь праздник туэ доразы тросгес калыкез кыскоз шуыса. Та нуналэ ик Карелие люкаськозы фин-угор дуннелэн вань культурая шоркаръёсысьтыз адямиос, Фин-угор калыкъёслэн калыккуспо ассоциацизы, сэрттозы-пертчозы юанэз: азинскоз на-а та проект? Ми, удмуртъёс, оскиськом, азинскоз шуыса.

Алёна Савельева

Удмурт Дунне
By Удмурт Дунне Январь 23, 2017 11:05