Башняын принцессаез ӧвӧл

Удмурт Дунне
By Удмурт Дунне Январь 31, 2017 09:35

Санкт-Петербурглэн котькуд сэрегаз ветлыны улон но уз тырмы, вылды. Али дэмласько тодматскыны Питер котырысь аспӧртэмлыко интыосын.

Выборгысь дун-чылкыт Олафлэн башняезлэн љуждалаез 48 метр.

Выборгысь дун-чылкыт Олафлэн башняезлэн љуждалаез 48 метр.

Ворекъясь шунды изъёс

Пушкин каре шедьыны луэ автобусэн. «Московская» яке «Купчино» метро станциосысен маршруткаос ялан ветло. Азьвыл та город Царское село шуыса нимаське вал.

Син азе усьтӥське Екатерининской дворец. Зарнивуам вылтусыныз синэз палёмытэ. Нош пушказ узырлыкез вераны-гожтыны луонтэм. Залъёсы пырыны вуиськод гинэ, котыр югытак луэ. Тылъёслэсь но шундылэсь ӧвӧл, борддоръёслэсь. Соос зарниен чильпамын кадь. Экскурсовод комнатаостӥ нуллэ. Котькудӥз сярысь нимысьтыз вера. Одӥгез мукетызлэсь пӧртэм. Комнатаос дуно арбериосын узырмытэмын, ӝӧк вылъёсын вашкала фарфор пуктылэмын. Синъёсты вошъятэк, учкиськом, вылысьтыз вылаз туспуктӥськом. Тани вуттӥзы тужгес тодмо но данъяськымон комнатае — Янтарнояз. Быдӟым ож вакытэ фашистъёс арбериоссэ сьӧразы нуиллям, озьы янтарьёслэн бервылзы ышем. Али мар возьматэмын дворецын — со азьвыл комнаталэн выльдэм тусыз. Эсьмаса, татын туспуктылэмлэсь но ало, вспышкаослэсь янтарь сӧриське, пе. Дворецын утиськемын эксэй кышноослэн дэремъёссы, чебермаськон арбериоссы, солдат мундиръёс, ожмаськон тӥрлык. Ваньмыз чылкак выжыкылын кадь йӧтэ.

Пушкинэ вуэмъёс, уката ик литератураез дунъясьёс, одно ик пыраны кулэ на Царскосельской лицее. Александр I сое усьтӥз дворянъёслэн нылпиоссылы. Татчы кутылӥзы 10-14 аресъем пияшъёсты но дышетӥзы соосыз 6 ар. Ӵапак татын нырысетӥосыз 30 пияшъёсын валче визь-нод люказ А. Пушкин.

Музей нырысетӥ лицеистъёслэн вакытазы вуттэ кадь. Экскурсоводлэн верамезъя, ваньмыз татын азьло сямен ик пуктылэмын. Одӥгез зал — бадӟым ужрадъёсты ортчытон инты (ӵапак татын А. Пушкинэз нырысьсэ синйылтӥз Г. Державин), мукетаз — библиотека, куинетӥяз — дышетскон класс.

Классын вӧзысьтыз вӧзаз 30 парта. Дышетӥсьлы матэ пуктыло вылэм ӟеч дышетскисьёссэ. Пушкин ӵемгес пукылэм берпуметӥ партаос сьӧрын, угось солы секытэн сётӥськылӥллям точной наукаос, со понна кыл чеберлыкъя солэсь устоез ӧй вал. Музейын утиськемын лицеистъёслэн оценкаосынызы бумага. Сое учконо ке, тодмо поэт сокем ик ӟеч дышетскымтэ. Озьы ик тодматскыны кылдӥз егитъёслэн улон комнатаосынызы. Ӧс йылысь тодмо фамилиосты адӟыса, уд оскиськы кадь, зэм ик таӵе дано адямиос татын улӥллям шуыса. А. Пушкинлэн но И. Пущинлэн (декабристлэн) комнатаоссы артэ, егитъёс дышетскыкузы юн эшъяськиллям.

Европаысь суредъёс

Выборге шедьыны луэ пӧртэм сямен: поездэн, электричкаен. Но ӝоггес отчы вуттэ автобус. Санкт-Петербургысен «Парнас» метро станциысь 2 часлэсь кемагес мыноно.

Выборгысен Финляндиозь 27 иськем на, автобусэн 1 час пала мыноно. Выборгез 13-тӥ даурын шведъёс пуктӥллям. Соин но городлэн шораз ик сылэ бадӟым W буква, вылаз Wiborg гожтэмын. Выборг Европаысь городъёслы укша, яркыт юртъёс паймыто: син ӧвӧл дышемын сыӵе суредъёслы. Пумитано пӧртэм паймымон коркаосты: соос я башнялы кельшо, отын принцессаез гинэ уг тырмы кадь, мукетъёсыз вашкала дауръёсысь юртъёслы укшало. Выборглэн шорсюлмыз — замок, со вуэн котыртэмын. Со музей сямен ужа. Отын радъямын пӧртэм адӟытонъёс. Но милемлы тужгес тунсыко вал дун-чылкыт Олафлэн (Норвегиысь король) башняяз тубаны. Солэн ӝуждалаез 48 метр. Вылӥысен адӟисько Выборглэн шудон коркаослы укшась юртъёсыз. Замоклы пумит сылэ Выборгез пуктӥсьлы, швед  маршаллы Торгильс Кнутсонлы синпелет.

Озьы ик дэмласал на вуылыны «Монрепо» музей-заповеднике. Та парк Выборгской заливен котыртэмын. Инкуазез чебер: котыр бадӟым изъёс — гурезъёс соосты уд шуы, ӝужытэсь ке но. Паймыто готика амалъя лэсьтэм капка, китай выжъёс, Людвигштайн замок, Нептун храм но трос мукетъёсыз. «Монрепо» француз кылысь берыктыса — гань-гань улон. Зэм но зыл-зыл, шыпыт инкуазе зымиськод кадь татын.

Ангелина Снигирёва

Удмурт Дунне
By Удмурт Дунне Январь 31, 2017 09:35