Башкортостанысь Улысь Балтач: Айбат улыны тырмашо

Удмурт Дунне
By Удмурт Дунне Январь 30, 2017 16:30

Башкортостанысь Улысь Балтач: Айбат улыны тырмашо

Бигерез но, удмуртэз но — асьсэлэн

Башкортостанысь Татышлы ёросысь Улысь Балтач гурт Еман-Елга (удмурт сямен сое Ӟаман-Ӟолга шуо) шур дуре пуксемын. Со Ижлэсь но Уфалэсь ог 260 иськеме интыяськемын, Татышлы райцентрлэсь — 25 кеме.

Историзэс тодо

Улысь балтачъёс кунооссэс котьку шуныт пумитало.

Гуртын пӧртэм выжы калыкъёс уло: башкиръёс, бигеръёс, хантыос, но тросгес лыдъясько удмуртъёс. Гурт шоры ик пуксемын шор ёзо школа, со 2015-тӥ арын удмурт гимназия (экспериментальной площадка) луиз. Кивалтэ соин Людвиг Зидымаков. Школае автобусэн нулло 11 гуртъёсысь нылпиосты.

— Школамы Бирск уездэ пыре вылэм, — вера гимназиен кивалтӥсь Людвиг Латыпович. — 1907-тӥ-1908-тӥ аръёсы сое кылдытэм удмурт воргорон Степан Никитич Давыдов. Та дышетӥсьлэн визьнодан удысын вормонъёсыз туж бадӟымесь — пусъемын Ленин орденэн.

Гимназиын туж узыр музейзы, со вашкала но туала улонлы сӥземын. Гимназилэн улон-вылонэныз но музеен мыло-кыдо тодматӥз Гульфия Самирзянова.

Улысь Балтачын одӥг интыегес интыяськемын больница, нылпи сад, культурая юрт, библиотека, магазин, столовой, пекарня, пересьёслэн юртсы но почта, Быдӟым оже быремъёслы синпелетсы вань — гуртысь 117 воргорон ож лудэ кошкем, соос пӧлысь 72-езлы дораз бертыны кылдымтэ ни.

— Гуртмылэсь кылдэмзэ тазьы верало, — тодаз вае тужгес мӧйыез нылкышно Анисья апа. — Турлы-чебер интылы синмаськыса, 1760-тӥ арын татчы Балтач нимо адями улыны интыяськем. Со дырысен уноез нулло Балтач нимез но Балтачев фамилиез.

Культура юртэн кивалтӥсь.

Гуртын кышкасьтэм воргоронъёс улӥллям. Нырысетӥ дунневыл войнаын Васиулла Сундюков но Гайнулла Сенькин пусъемын Георгиевской киросъёсын. Быдӟым ожын тушмонъёсын ожмаськемез понна кык Слава орден нуллӥз Шарифулла Гарифьянов, 3-тӥ степенё Слава орден бырттэмын кыкезлы — Василий Резвановлы но Зиятдин Исламшинлы. Озьы ик гуртсы данъяське Ханиф Баймиевен. Солэн кык пиосыз тодосчиос луизы. Ачиз кема аръёс ӵоже колхозэн кивалтӥз.

Ӟандан доразы берто

Культурая юртсы вӧл-вӧл. Татын ужасьёс арлыдоосын но нылпиосын ог кызё  кружокъёс, пе, нуо.  Туннэ но вазь ӵукна ик пиналъёс клубе лыктӥллям ини — концерт пуктыны, пе, дасяськиськом, люр-ляр потто. Тросэз нылпиос духовой оркестрын шудо. Сое кылдытӥз но кема аръёс ӵоже кивалтӥз Башкортостанысь культура удысысь дано ужась Рим Баймиев. Казыр (али) мыло-кыдо ужа Алик Кайранов. Солэн пиосын «Ӧрӟи» коллективез но вань на. Гитараен шудӥсьёсын тырше Дмитрий Таранов.

Культурая юрт.

Культура юртэн кема аръёс ини кивалтэ Ирина Шайхлисламова. Со та гуртын ик вордскемын, татчы ик быземын. Солэн кык ансамблез — арлыдоослэн «Рябинушка» но нылпиослэн «Ложкари».

— Пичи дырысеным клубын ужась луэме потэ вал, — шуэ Ирина Абзатовна. — Школаын дышетсконме йылпумъяса, тодон-валан люканы кошки тупала, Ижысь культпросветучилищее. Милям тросэз егитъёс Ижын дышетско но ӟандан (нош ик) доре берто. Мон но, дышетсконме йылпумъяса, гуртэ бертӥ. Пичи дыр малпанэ быдэсмиз, табере, вань сюлэмме поныса, культура юртын ужасько. Картэ «Рассвет» колхозын тракторист луыса ужаз, казыр со вахтае ветлэ. Колхоз сярысь ӟеч кылъёс гинэ вераме потэ, милям ведь одӥг кесэг музъеммы но буш уг кыльы, ваньзэ гыро-кизё, гид тыр пудо-живот вордо. Колхозэн быгатыса кивалтэ Альберт Минимбаев. Хозяйствомы районамы котьку азьветлӥсьёс радын, ужась калык ми дорын улэ. Тӥни озьы тырмашиськом, улыны выриськом.

Чылкытэсь, индэ

Улысь Балтачын улӥсьёс, пичиез но, бадӟымез но, шалтыр гинэ удмурт но бигер кылъёсын верасько.

 

— Семьяос сурасько, удмурт бигерзэ басьтэ, башкир удмуртэн огинэ кариське, — веранзэ азинтэ Ирина Абзатовна. — Нылпиос, ма, ми но, мӧйыос, бигер но удмурт кылъёсын одӥг кадь вераськиськом, соиз но, таиз но асьмелэн кадь потэ. Милям  нылпиосты 1-тӥ классысен башкир кыллы дышето, бигерзэ но палэнэ уг кельто.

Колхозын ужасьёс.

1990-тӥ арын гуртамы улыно-вылыно школа пуктӥзы. Урамъёсмес тупатъязы, 2003-тӥ арын гуртамы газ кыскизы. Улон айбат луэмен, тросэз егит семьяос гуртэ улыны кылизы, выль урамъёс кылдӥзы, Улысь но Вылӥ Балтач гуртъёс огинэ луизы. Висмы угось оломар ятыр ӧй вал.

— Милям казыр сельсоветмы асьме дорын ини, нош талэсь азьвыл Вуж Кызылъяр гуртын вал, — пенсия басьтӥсьёс мыло-кыдо верало гуртсы сярысь. — Тани почтамы но асьме доры ик интыяськемын. Айбат улӥськом, айбат, уксё дырыз дыръя ваё, магазинын котьмар вань, нянь гуртамы ик пыжо.

Улысь Балтач гуртын улӥсьёс чылкытлыкез чаклало: больницае, колхоз конторае, почтае, муниципал кылдытэтэ, сапегъёссэс но бигер колошаоссэс куштыса, пырало.

— Ми, индэ, аръёсын тазьы улӥськом ини, — валэкто нылкышноос. — Дорамы чылкыт улыны выриськом ук, татын но чылкыт мед луоз, нӧд медаз пыры.

Любовь Тихонова

 

Удмурт Дунне
By Удмурт Дунне Январь 30, 2017 16:30
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment

Your e-mail address will not be published.
Required fields are marked*