Юрӟым ке но, жаль

Удмурт Дунне
By Удмурт Дунне Декабрь 21, 2016 15:42

Фидель Кастро кулэм бере тодам лыктӥз Габриэль Гарсиа Маркеслэн «Осень патриарха» книгаез. (16+) Кема аръёс ӵоже власть котырын улыса,  адями макем воштӥське?

Та книгаез понна Колумбиысь писатель 1982-тӥ арын басьтӥз Нобельлэсь премизэ. Героез — Латинской Америкаысь кыӵе ке но странаен 100 ар ӵоже кивалтӥсь Сакариас. Власте вуэ, Англиысь солдатъёс юрттэмъя революция ортчытыса. Анаез — тылобурдо вузась, ляльчи, кураськись, кинлэсь пизэ вае, уг тоды ачиз но. Сакариас букваосты гинэ но уг тодма. Кивалтыны кутскыкуз, кылдытэ правительство но, парламент но. Но пумен министръёссэ улля, законъёс малпалля ачиз, соослэсь быдэсъяськемзэс чакла армия. Собере офицеръёс но ашкыно, котькытысь асьсэлы пайда поттыны выро. Озьы Сакариас армиезлэсь но пумен кышканы кутске. Нош ик революция медаз луы шуыса, косэ дарыез (порох) лапак кот возьыны, офицеръёсты вылысьтыз вылаз вошъя, ог-огзэс виылытэ. Одӥг гинэ эшсэ но — президентэ пуксьыны юрттэм генералэз — вузаз шуыса, быдтэ. Озьы маке быдӟа дворецаз огназ кыле — котькытчы кыедзэс кельтӥсь скалъёсын (скалъёсты со адямилэсь вылӥгес дунъялляз), анаезлэн курегъёсыныз-попугайёсыныз но проказаен висисьёсын, сукыръёсын. Таосыз шоры учкыса, со ассэ тазаенгес, шудоенгес шӧдылӥз, вылды: дурсыяз (мошонка) маке быдӟа лёг будэмын вал. Со ӧз валалля, ма со нылкышноез зэмос яратон, ма со нылкышнолэн зэмос яратэмез. Улонэзлэн пумаз гинэ Инмар солы сётэ синмаськыны шуд. Но пумен вала: егит нылкышно Летисия Насарено со бордын улэ, ассэ эксэй кышноен шӧдон понна гинэ.

Сакариас властьсэ утьыны выронъяз калык сярысь ноку ӧз сюлмаськылы ке но,  президент нимаськись эксэйзэс огшоры адямиос яратӥзы, вань шуг-секытъёс понна котырысьтыз векчи кивалтӥсьёс янгышесь шуыса. Вот Ачиз лыктоз, адӟоз но тупатыны косоз — соку зэмлык вормоз. Калык уг тоды мукет улонэз, со кышка воштӥськонъёслэсь, ялан одӥг адямилэн кивалтэмез улсын улыса-вылыса.

Ку кулӥз Сакариас, тодмо ӧвӧл. Оло, воксё но ӧз кулы. Оло, улонэз ик мукет вал. Геройлэн учыръёсыз кылдо ачиз, анаез, адӟисьёс верамъя. Озьы одӥг учыр ик воксё мукет сямен, мукет дунъетъёсын син азе пуксе. Вӧзазы полэстэмын на калык пӧлын улӥсь легендаос, кыл вӧлдонъёс. Оло вал, оло ӧй вал. Аслаз улонэныз-а улӥз Сакариас? Кивалтыны выронъяз шудзэ киулысьтыз ӧз лэзьы-а? Юрӟым ке но, жаль потӥз со мыным.

Эксэез калык тодаз возёз, сюрс ар но ортчыса, шуоз: соку-соку сыӵе-сыӵе закон кутӥз, войнаын вормиз яке келяз, но одӥг адями но солэсь зэмос улонзэ уз тоды. Ваньмыз легенда, миф…

Ольга ВАХИТОВА

Удмурт Дунне
By Удмурт Дунне Декабрь 21, 2016 15:42