Проектъёсын ужано

Удмурт Дунне
By Удмурт Дунне Декабрь 28, 2016 13:02

М. Зайцев: Тросгес саклык висъяське пичи бизнесэн вырисьёслы. Соос адямиослы ужан интыос кылдыто.

Журналистъёсын пумиськылӥз Удмуртиысь экономикая министр Михаил Зайцев.

Таиз ар секытэнгес сётскиз ке но, предприятиосмы огсыр тыршо, ужысь трос калыкез мозмытон учыръёс пусъемын ӧвӧл, гурт удыс умой азинтӥське, ужбергатӥсьёс но азьпала вамышто. Экономикая министерстволэсь лыдпусъёссэ эскерыса потоно ке, куд-ог удысъёсъя адӟем карымон но луиськомы. Кылсярысь, ужбергатӥсьёслэн лыдзы йылэмъя Приволжск федерал округын 1-тӥ, Россиын 7-тӥ интыын.

Калыклэсь ужзэ трослы капчиято МФЦ-ос. Туннэ нуналлы шаерамы 32 МФЦ-ос ужало, эшшо 138 интыосын соослэн ёзъёссы усьтэмын. Соос пыр туэ ар куспын 1 миллион 140 сюрс юрттэт сётэмын.
Нош тужгес сюлмаськы-тӥсь ужпум — проектъёслы коньдон шедьтон. Та борды ужбергатӥсьёсты кысконо. Со понна шаерамы кылдытэмын пӧртэм удысъя проект дасясь офисъёс. Туэ декабрь толэзе гинэ 46 проект кылдытэмын вал. Соос Россиысь программаосы шедьыны кулэ.

Тросгес саклык висъяське пичи бизнесэн вырисьёслы. Соос адямиослы ужан интыос кылдыто.
Шаерысьтымы предприятиос туэ ар куспын 11 пол калыккуспо адӟытонъёсы пыриськизы. Юн кусыпъёс юнматэмын Белоруссиен, Узбекистанэн, Чехиен, Казахстанэн. Со сяна, шаерысьтымы Экономикая министерствоын ужасьёс Киров, Свердловск улосъёсысь но Санкт-Петербургысь экономикалы сӥзем ужрадъёсы вуылӥзы.

Вуоно ар сярысь Михаил Зайцев меӵак шуиз: улон секытгес луоз, но бадӟым ыштонъёс луыны кулэ ӧвӧл. Соин ик бадӟым предприятиослы гижысь-пиньысь басьтӥськоно выль проектъёс кылдытон борды. Туэ ар куспын шаерамы 85 миллиард манет тыр инвестициос вуизы ке, вуоно арлы 90 миллиард чакламын.

Валентина Емельянова

Удмурт Дунне
By Удмурт Дунне Декабрь 28, 2016 13:02