Пиналлы кулэ удмурт нэнэ

Удмурт Дунне
By Удмурт Дунне Ноябрь 23, 2016 09:01
bilingva

«Билингва» семинар арняосы ужась аспӧртэм школа выллем луэ.

Мар тунсыкозэ сӥзе «Билингва»?

Ар пала ини Ижкарын радъясько нылпиосты пичиысен ик кык кыллы дышетонъя «Билингва» проектлэн семинаръёсыз. Одӥгез та нуналъёсы ортчиз Эшъяськон юртын, ас котыраз 25 пала пиналэз но соослэсь анай-атайёссэс люказ.

Кык кылын — шатыр-шатыр…

«Билингва» семинар арняосы ужась аспӧртэм школа выллем луэ. Татын нылпиос удмурт шудонъёс пыр тодон-валанзэс будэто, анай кылын матэгес тодматско. Нош со вискын анайёсты визьмало нимысьтыз специалистъёс. Пусъёно созэ но: та семинаре нокин нокинэ кужмысь уг келя, анай-атайёс асьсэ мылкыдзыя лыкто, кин ке нылпи садысьтыз ялонэз адӟыса, кин ке Интернетысь вотэсбамъёс пыр иворез шедьтыса, кин ке тодмоезлэн ӝуткамезъя.

Эшъяськон юртын ортчем семинарез радъяны юрттӥзы Удмуртиысь «Билингва» центр, анай кылэз дышетӥсьёслэн «Выжы» ассоциацизы, «Удмурт Кенеш» но «Удмурт нылкышно кенеш» огазеяськонъёс, Эшъяськон юрт но Нациосын ужан политикая министерство.

bilingva

«Билингвалэн» нырысетӥ семинаръёсыз Ижын ортчизы туэ январь, февраль, апрель толэзьёсы. Соос возьматӥзы: егит удмурт анайёслы но соослэн нылпиоссылы таӵе ужрадъёс туж кулэ.

Но нырысь ик, мар со — билингва, билингвизм? Латин кылысь берыктыса, со «кык кыл» шуэмез возьматэ. Озьыен, билингвизм — со кык пӧртэм кылъёсын вераськыны, соосты уже кутыны быгатон. «Билингва» семинаръёс — со кема дырлы чаклам но нуналлы быдэ ужась проект. Солэн кылдэмез сярысь маде та проектэз валтӥсь, филология наукаосъя кандидат Татьяна Волкова:

— Ог 10 ар талэсь азьло ай Нациосын ужан политикая министерствоын котрес ӝӧк сьӧрын вераськон мынӥз дышетӥсьёслы сайт кылдытон сярысь. Но соку уж интыысьтыз ӧз вырӟы. 2015-тӥ арын рос-прос кенешимы ни билингвизмъя проект сярысь. Соин кивалтӥз Удмурт кун университетысь Удмурт филологияя, финно-угроведениея но журналистикая институтлэн кивалтӥсез Наталья Кондратьева. Нырысь ик кылдӥз «Билингва» сайт. Собере проектэз валтыны мыным оскизы. Толэзь пала ужаса, валай, та Интернет проект гинэ луыны кулэ ӧвӧл. Озьы семинаръёс радъяны кутскимы.

«Билингвалэн» нырысетӥ семинаръёсыз Ижын ортчизы туэ январь, февраль, апрель толэзьёсы. Соос возьматӥзы: егит удмурт анайёслы но соослэн нылпиоссылы таӵе ужрадъёс туж кулэ. Тужгес но тунсыко, куке та семинаръёсын асьсэ ужан амалъёссы сярысь мадё нылпиоссэс кык но солэсь трос кылъёсын вераськыны дышетӥсь анайёс. Ӵапак сыӵе анай таяз рад вуиз пырак… Италиысь.

Амалъёс трос. Кудӥз тупалоз?

Лариса Широбокова-Монако — философия наукаосъя доктор, выжыезъя Шаркан ёросысь. Но улэ Италиын, картэз итальянец. Озьы ке но Лариса пичи пизэ огдыре ик кӧня ке кылын вераськыны дышетэ.

Куд-ог эскерисьёслэн верамзыя, пичи пинал, анаезлэн кӧт пушказ улыкуз ик, куара шуккиськемъя, шудэмъя, пӧртэм кылъёсты висъяны быгатэ ни. Озьы ке но кӧня ке кылъёсты тодыса уг вордӥськы.

— Пиналэз огдыре ик кык кыллы дышетон амалъёс кӧня ке пӧртэм луо. Нырысь ик, «одӥг адями — одӥг кыл» амал. Шуом, атай — итальянец, анай — ӟуч. Вордӥськем дырысеныз ик пиналэн анай но атай асьсэ кылынызы гинэ верасько. Озьы пинал уг сураськы, — визьнода Лариса Широбокова. — Та ӟеч амал, но милям семьямылы со ӧзгес тупа. Угось пие нылпи садэ мынӥз но туж ӝог итальянец луиз. Сыӵегес ик югдур кылдэ Ижын. Телевидение, радио, нылпи площадка — ваньмыз ӟуч сямен верасько. Соин кутыны луоз мукет амалэз: «семьяын одӥг кыл, калыкын — мукет». Озьы ми семьяямы али ӟучен гинэ вераськиськом, нош кырын — итальян кылын. Тодӥсько, та амалэз куто тросэз удмурт семьяос. Но со но котьку уг юртты.

bilingva

Вань на мукет амалъёс но: шуом, «одӥг учыр — одӥг кыл». Со понна юромо кылдытыны луоз кыӵе ке ужрадъёс-учыръёс. Шуом, удмурт нылпиослы чаклам кыӵе ке тунсыко пумиськон. Отын ваньзы удмурт сямен гинэ верасько.

Вань на мукет амалъёс но: шуом, «одӥг учыр — одӥг кыл». Со понна юромо кылдытыны луоз кыӵе ке ужрадъёс-учыръёс. Шуом, удмурт нылпиослы чаклам кыӵе ке тунсыко пумиськон. Отын ваньзы удмурт сямен гинэ верасько.

— Та выллем пумиськонъёс мон Италиын ортчытъяны кутски пиналмес ӟуч кыллы дышетон понна, — шуэ Лариса. — Соку ик шара лыдӟиськонъёс но радъяськом. Италиын туж ярато шара лыдӟонъёсты. Ми я библиотекаын, я паркын, я книга вузась лавкаын люкаськиськом. Куд-ог нылпиос воксё пичиесь, арес котыразы ай. Мар лыдӟеммес соос уг валало на, но кыллэн аспӧртэмлыкез, чузъяськемез йыразы пыӵаса кыле.

Вань на «одӥг дыре одӥг кыл» амал но. Таиз тупа кунсьӧр кылъёсты дышетонлы. Шуом, арняяз одӥг-кык нунал сӥземын кыӵе ке одӥг кыллы. Али ми тазьы англи кылэн тодматскиськом. Шуом, котькуд вторнике ми англи кылын вераськыны тыршиськом, занятиос ортчытӥськом, — шуэ Италиысь анай.

Анай медло попугай

Нылпиосмес анай кыллы дышетонлы нылпи садын, школаын саклык висъяськом. Но малы ке быдэ вуэмзы бере пиналъёслэсь ӵемысь кылоно: «Я всё понимаю, но не говорю…» Нялтас вераса, школаын 10 ар ӵоже англи кылэз дышетыса но, тросэз-а вераськыны пӧрмытэ?

Лариса малпамъя, асьмелэн воксё саклык уг висъяськы пиналэз вордӥськем дырысеныз 3 аресозь дышетонлы. Но ӵапак таӵе вакытаз нылпилэн пель сьӧраз 70-80 процентэз ивор анай кылыныз чузъяськыны кулэ. Со понна пиналлы удмурт книгаосты шара лыдӟоно, удмурт шудонъёсты, крезьгурез, мультфильмъёсты, аудиовыжыкылъёсты кутоно. Анай попугай кадь луыны кулэ. Шуом, пинал юан сётэ ӟуч кылын. Солы валэктоно но соку ик удмурт кылэ берыктоно. Кӧня ке пол верано.

bilingva

Ижкарысь анайёслэн верамзыя, нылпиосты удмурт кыллы матэгес карыны юртто «Шудон корка» выллем проектъёс. Но умой луысал на, анай кылэз дышетонъя арняосы ужась (воскресной) школа кылдысал ке.

— Эшшо одӥг амал — дун тырыса удмурт няня возён. Одӥг-кык часлы ке но, — шуэ Лариса. — Сыӵе нэнэ пинал азьын удмурт кылэз гинэ валась луыны кулэ. Пинал адӟоз: та адями удмурт сямен гинэ вала, озьыен, потэ-а, уг-а, ачиз но удмуртэ выжоно луоз…

Дунын нэнэ Италиын паськыт вӧлмемын, асьмелы со валантэмгес на. Асьмелы матынгес мукетыз: пиналэз огдырлы гуртэ келян. Но берло дыре улон возьматэ, пинал удмуртгес уг луы, песянай-песятайзэ ачиз ӟучомытэ.

Ижкарысь анайёслэн верамзыя, нылпиосты удмурт кыллы матэгес карыны юртто «Шудон корка» выллем проектъёс. Но умой луысал на, анай кылэз дышетонъя арняосы ужась (воскресной) школа кылдысал ке. Оло нош нимысьтыз визьноданъя центр кылдытоно? Зэм но, Ижын нылпиослы чаклам центръёс трос, нош удмуртэз одӥг но ӧвӧл. Но «Билингва» семинарысь мыло-кыдо анайёс шоры учкыса, оскон кылдэ: соос луозы на. Угось пичи нылпиосынызы доразы пукись удмурт анайёс Ижын трос гинэ.

Пусъёно на, «Билингва» проект улонэ пыӵа нимысьтыз федерал программая. Проектэн матэгес тодматскемды потэ ке, пыралэ udmbilingva.ru сайтэ.

bilingva

Семинаре пыриськемъёс.

Ярослава Шараева:

— Мон туж шумпотэмын, асьмелэн карамы «Билингва» проект вань шуыса. 2 аресъем нылынымы удмурт сямен гинэ вераськиськом. Адямиос кыло но туж паймо. Одӥгез бускельмы дорамы эшсэ но вайылӥз: «Учкы али, пичи гинэ, нош удмурт сямен вераське ни. Вундеркинд!» Мукетъёсыз ало: «Нылдылы секыт луоз, кызьы нылпи садэ ветлоз, дышетскоз?» Тазьы верамъёсты кылыса, оскон ик быре. Оло, зэм но шонертэм лэсьтӥсько? Нош «Билингва» осконме юнматэ. Анай-атайёс нылпиосынызы, ми сямен ик, удмурт верасько. Макем мусо но чебер кылӥське! Татын ми визь люкаськомы, эшъяськиськом, шудӥськом. Мылкыд пуроме.

 Марина Родионова:

— Мон нылпи садын ужасько, отын пиналъёсын удмурт сямен вераськыны тыршиськом. Но со тырмыт ӧвӧл, угось тросэз нылпиос ӟучесь. Куспазы соос ӟуч сямен ик верасько. Нош «Билингва» выллем семинаръёсы лыкто удмурт нылпиос, верасько но шудо удмурт кылын. Соин ӟучомем пинал но удмурт сямен вазёно луэ. Мынам аслам но 3 пиналъёсы: шутэтскон нуналъёсы соосты кытчы ке нуллэм потэ, но Ижын соос понна удмурт ужрадъёс воксё ӧвӧл. «Билингваын» нылпиосты визьмало но, соосын шудо но. Мылкыдзы туж бурдъяське!

Елена Миннигааева

Туспуктӥз Ф. Миннигараев

Видео: «Удмурт нылкышно кенеш»

 

 

 

Удмурт Дунне
By Удмурт Дунне Ноябрь 23, 2016 09:01