Оскон: Вӧсяськон медаз луы дыр быдтон

Удмурт Дунне
By Удмурт Дунне Ноябрь 8, 2016 16:40

шкляевШуркынмон толэзь шумпоттэ асьмемыз уно черк праздникъёсын, валтӥсьёсыз сӥземын Дун-чылкыт Инмар Анайлы: 4-тӥ ноябре сӥлы кариськом «Казанская» оброссэ, 6-тӥ ноябре — «Всех скорбящих радость», нош 22-тӥе — «Скоропослушница» иконаоссэ.

 Дэрае бинялтэм оброс

Инмар Анайлэн «Казанская» обросэз калыклы тодмо луиз 1579-тӥ арын. Казаньын со аре кышкыт тылпу гомаз, уно семьяос улон интытэк кылизы, городлэн бадӟым люкетэз пеньлы пӧрмиз. 9 аресъем Матрон уйвӧтаз Инмар Анаез адӟиз. Дун-чылкыт Мария Нылмурт дыдыез куриз, Солэсь оброссэ пень улысь, музъемысь поттыны. Ныллэн анай-атайёсыз Матронлы шуизы: «Уйвӧтъёс луо Инмарлэсь, но сыӵеоссэ вӧтъёсты адӟо святойёс гинэ, тон асладъёсызлы эн оскы». Но нылзы одӥг вӧтэз ик кӧня ке пол адӟемез бере анай-атайёс мыноно кариськизы со интые, кытчы косӥз Инмар Анай. Зэмзэ но отысь шедьтӥзы дэрае бинялтэм обросэз. Та икона сыӵе югыт но пиштӥсь вал, кожалод, сое али гинэ кин ке суредам. Ӟеч ивор соку ик вӧлмиз быдэс Казане. Обросэз интыязы Благовещенской соборе. Соку ик валаськиз: икона огшоры ӧвӧл, со азьын вӧсяськемзы бере кык сукыр (синтэм) адямиос выльысь адӟыны кутскизы…

Инмар Анайлэсь кужымзэ но юрттэтсэ шӧдо быдэс калыкъёс но. Озьы вал 1612-тӥ арын. Москва соку полякъёс ки улын вал, страналэн уйпалаз кузёяськыны выризы шведъёс. Сютэм ар вуиз но, Рюриковичъёслэн эксэй выжызы куашказ. Тушмонъёс городъёсты, черкъёсты сутыны, калыкез быдтыны ӧдъязы. Ӵапак сыӵе кышкыт вакытъёсы ӟуч адямиос оскиськизы Инмарлэн кужымез вылэ. Иисус Христослы оскись князь Д. Пожарский Инмар Анайлэн «Казанская» обросэз азьын трос вӧсяськиз. Та икона Москвае Казаньысь вуттэмын вал Гермоген патриарх куремъя. Вӧсяськизы солдатъёс но, эшшо куинь нунал визязы на. Озьы

Д. Пожарский но К. Минин кивалтэм улсын калык улляз асьме музъем вылысь тушмонэз.

Тодады вайытэме потэ Дмитрий Ростовский святительлэсь Инмар Анайлы вазиськемзэ:

«Мон та дуннеысь уно узыр но бадӟым адямиос доры вуылӥ. Соослэн капка азязы юрттӥсьёссы сыло, дугдыто, юало: мар татӥ ветлӥськод, кытысь лыктӥськод? Огъёссэ лэзё пырыны, мукетъёссэ улляло, ултӥяло. Тынад капка азяд ке вуисько, номыре сыӵезэ уг адӟиськы: уллясь, юась, тышкаськись ӧвӧл. Мон пырисько но Тон азе султӥсько, вераськисько. Кивалтӥсьёс, узыръёс дорысь тросэз бӧрдыса пото. Нош Тон доры лыктэмъёслэн бӧрдонзы быре, малы ке шуоно Тон, Дун-чылкыт Инмар Анай, уд чидаськы, аслэсьтыд нылпиостэ курадӟисен но ултӥямен адӟиськод ке. Тынад чылкыт яратонэд тырме милемды кылзыны, валаны, жаляны но шонер сюрес вылэ султытыны».

оброс

Инмар Анайлэсь «Казанская» оброссэ сӥлы каромы 4-тӥ ноябре.

 Кыл вылысь уж борды

5-тӥ шуркынмонэ — кулэм ӵыжы-выжыосты но войнаын быремъёсты буре ваён нунал. Сое кылдытӥз князь Д. Донской 1380-тӥ арын, Куликово бусыын бырем ожгарчиосты буре вайыса.

Та нуналэ ик сӥлы кариськом Иаков апостолэз — дас кык апостолъёс пӧлысь одӥгзэ. Со, Иисус Христослэн мукет дышетскисьёсыз сямен, проповедьёсын пӧртэм кунъёстӥ ӧз ветлы. Иаковлы оскемын вал Иерусалимын нырысетӥ епископ луыны. Татысь православнойёс Иисус Христослэн курон-косонъёсызъя улӥзы но дуннеысь уно христианъёслы адӟем карымон луизы. Трос адямиос соослы вожъяськизы, малы ке шуоно таос пӧлын ӧй вал куанер муртъёс. Уноез нырысетӥосыз христианъёс, ваньбурзэс вузаса, Иерусалимысь христианъёслэн общинаязы лыктӥзы, диаконъёс со коньдонэз огкадь люкылӥзы вань семьяос куспын. Туннэ нуналлы но озьы ик уло тросаз монастырьёсын, отын нокин но номыре приватизировать уг кары, нош монастырьлэн ваньбурез йылэ. Туала вакытэ тросэз шуо: ми Инмарлы оскиськом, черке одӥг-ог ветлӥськом, куд-ог молитваосты лыдӟиськом. Но жаляса верано, Евангелие соос понна огшоры книга луэ но улоназы уг пыры. Кин ке туж шонер верам, тужгес но трос адямиос чиптэм-чаптэм ышо, адями туссэс ышто, кыл вылысь уж борды выжыкузы.

Иисус Христос асьмемыз ялан алэ: мукетъёслы юрттытэк но ӟеч ужъёс лэсьтытэк улӥды ке, вӧсяськемдылэн пайдаез уз луы, молитва лыдӟемды юнме дыр быдтонлы пӧрмоз.

Весь тазьы уз луы

18-тӥ шуркынмонэ сӥлы кариськом Москвалэсь но Россилэсь патриархсэ Тихонэз (Василий Беллавинэз). Со вал 1917-тӥ ар, кышкыт вакыт, большевикъёс черклэсь кулэлыксэ ӧз адӟе. Озьы ке но Патриарх Тихон уно черкъёсты утиз, большевик кивалтӥсьёс пӧлысь юрттӥсьёс шедьтӥз Россиын православной осконэз утён понна. Со вакытэ калык пӧлын вӧлмемын вал таӵе мадёс:

«Одӥг черкогуртын улэм христиан семья. Воргорон уен-нуналэн ужам ке но, туж секыт вылэм солы кышнозэ но пичи нылпиоссэ сюдыны. Но пиосмурт ноку но шара ӝожтӥськымтэ, нокинэ но янгыш карымтэ, оскиськем Инмар вылэ но ялан шуылэм: куке но одно ик улонмы умойгес луоз. Ассэ но семьязэ лӧпкытон понна пу вылэ гожтэм «Весь тазьы уз луы» но та кылъёсты коркалэн тужгес адӟиськись интыяз шуккем. Сютэм аръёс но черкез тышкаськон вакытъёс ортчиллям. Та семья но пыд йылаз султэм, сиёнлы ёрмемысь дугдэм. Будӥллям нылпиоссы, вордскиллям ни нуныкайёссы. Огпол ваньзы соос атай юртазы сиён-юонэн тырмытэм узыр ӝӧк сьӧры пуксиллям. Вӧсяськиллям, Инмарлы тау кариллям, туннэ сиыны няньзы вань шуыса. Соку бадӟым пизылэн син шораз йӧтӥллям со вужмем пу вылэ гожтэм кылъёс. Со шуэм: атай, ойдо куштом ини, асьмелэн табере ваньмыз умой, вунэтом со кышкыт аръёсты. Бубиз вазем: ум, пие, мед кыллёз. Тодады возе: весь тазьы уз луы. Эн вунэтэ тае но дышетэ пиналъёстэс та кылъёслы. Котьма понна (умоезлы но, уродэзлы но) Инмарлы тау карыны кулэ. Секыт вакытъёсы — чидан сётэмез понна, капчи аръёсы — ёрмытэк улэммы понна.

Матысь нуналъёсы черк пусъе:

4-тӥ шуркынмонэ — Инмар Анайлэсь «Казанская» оброссэ сӥлы карон.

5-тӥ шуркынмонэ — кулэмъёсты буре ваён, Иаков апостолэз сӥлы карон.

6-тӥ шуркыномнэ — Инмар Анайлэсь «Всех скорбящих радость» оброссэ сӥлы карон.

8-тӥ шуркынмонэ — Оскон понна курадӟытэм Дмитрий Солунскиез буре ваён.

10-тӥ шуркынмонэ — Дун-чылкыт Параскева Пятницалы вӧсяськон нунал.

21-тӥ шуркынмонэ — Михаил Архангеллэн но соборезлэн праздникез. Преподобной Марфаез буре ваён.

22-тӥ шуркынмонэ — Инмар Анайлэсь «Скоропослушница» оброссэ сӥлы карон.

26-тӥ шуркынмонэ — Дун-чылкыт Иоанн Златоустэз сӥлы карон.

27-тӥ шуркынмонэ — Филипп апостолэз сӥлы карон. Оскон понна курадӟытэм Константинэз но Пантелеймонэз буре ваён.

28-тӥ шуркынмонэ — Иисус Христослэн Вордӥськонэзлы (Ымусьтонлы) сӥзем визьдыр кутске, со кыстӥськоз 2017-тӥ арын 6-тӥ толшорозь.

29-тӥ шуркынмонэ — Матфей апостолэз но евангелистэз сӥлы карон.

30-тӥ шуркынмонэ — Григорий Чудотворец святителез сӥлы карон.

 

Удмурт Дунне
By Удмурт Дунне Ноябрь 8, 2016 16:40