Коньдонэз люкылэ калык

Удмурт Дунне
By Удмурт Дунне Ноябрь 7, 2016 12:03

2017-тӥ но матэктӥсь 2018-тӥ, 2019-тӥ аръёслы бюджетлэсь проектсэ поттӥзы калык азе. Таӵе амал туэ нырысьсэ кутӥськиз.

byudzhet-gsoosvet

Дышетонлы учкемын 18 миллиард манет, тазалыкез утёнлы — 9,7 миллиард манет, эшшо 14 миллиард манет — Медицинаын страхованиея фондысь, «льготникъёслы» юрттонлы — 7 миллиард манет но мукет.

Кун Кенешысь сессиос ортчытъян залэ калык тыраз люкаськиз, данакез — общественной огазеяськонъёслэн ёзчиоссы, огшоры адямиос. Соослэн юанъёссылы валэктонъёс сётыны дасяськиллям вань министръёс. Вуоно арлы экономикалы прогноз лэсьтӥзы но бюджетлэн проектэныз тодматӥзы экономикая но коньдон ужпумъёсъя министръёс Михаил Зайцев но Станислав Евдокимов. Соку ик верамын вал: бюджет кутӥське секытэн, коньдонэз шыръяно луом.

— Бюджетлэн проектэзлэн доход люкетэз 57 миллиард манет пала, — пусйиз Станислав Евдокимов. — Со пӧлысь бадӟым люкетэз — ог 49 миллиард манетэз — люкаськыны кулэ налогъёс чотын. Ог 7,6 миллиард манет пала возьмаськом Россилэн бюджетысьтыз.

Котьку сямен ик, элькун кисыысь данакез коньдон кошкоз калыклы улон-вылонын юрттэт сётонлы. Кылсярысь, дышетонлы учкемын 18 миллиард манет, тазалыкез утёнлы — 9,7 миллиард манет, эшшо 14 миллиард манет — Медицинаын страхованиея фондысь, «льготникъёслы» юрттонлы — 7 миллиард манет но мукет. Бюджет удысын ужасьёслы уждун тырыны ог 24,8 миллиард манет кошкоз — со быдэс бюджетлэн ӝыныез. Вань та лыдпусъёс 2016-тӥ арлы бюджетын мындагес луо. Но соос воштӥськыны быгатозы на.

Лыдпусъёслэн будэмзылы уката оске лэсьтӥськонъя, архитектурая но улон инты политикая министр Иван Новиков. Угось солэн министерствоезлы проектын 975 миллион манет гинэ чакламын.

— 2016-тӥ арлы бюджетлэн проектаз но лэсьтӥськон удыслы нырысь ик 1,9 миллиард манет гинэ учкемын вал, — шуиз со. — Но казнае коньдон вуэмъя та лыдпус туннэ нуналлы 4,2 миллиардозь йылӥз. Туж оскисько, вуоно арын югдур тупатскоз шуыса.

Бюджетэз эскеронэ лыктэмъёслэн трос юанъёссы люкаськиллям. 1 но ӝыны час интые вераськон 3 час пала кыстӥськиз.

С. Евдокимов оскытэ: лэсьтӥськон удыслы сяна, ватсаса коньдон утчаны тыршом промышленностьлы, гурт удыслы, сюрес лэсьтонлы но мукетъёсызлы.

Нош кытысь ватсаса коньдонэз поттоно? Та бордын, пе, ужано огъя кужымен. Бадӟым оскон вань Москвалы, улосъёсты уз кушты шуыса. Вазенгес ик ужпум ӝутэмын вал: Россиысь 12 улосъёслэн 60 процентлэсь ятырез вытъёссы кошко федерацие — таӵеос пӧлы пыре Удмуртия но. Законэн юнматоно: ӝыныез ке но налогъёс мед кылёзы улосъёсы ик. Та ӵектонэз умоен лыдъяз ни Федерацияя Кенеш.

— Москваослы та куронмы сярысь ялан тодазы вайытӥськом, — шуиз Кун Кенешысь Бюджетъя, вытъя но коньдон ужпумъёсъя ялан ужась комиссилэн кивалтӥсез Софья Широбокова. — Малпанмы пӧрмиз ке, элькун казнае ватсаса ог 15 миллиард манет пыртыны луоз.

Коньдон ужпумъёсъя министерство эшшо амал адӟе: коммерческой банкъёс азьын элькунмылэсь пунэмъёссэ пичиятоно, федерал бюджетысь коньдон басьтыса. 2016-тӥ арын 6 толэзь ӵоже гинэ талы луыса 300 миллион манет шыръяны быгатӥм.

Бюджетэз эскеронэ лыктэмъёслэн трос юанъёссы люкаськиллям. 1 но ӝыны час интые вераськон 3 час пала кыстӥськиз. Кылсярысь, Иж город Думаысь депутатъёслэн ик соос кӧня ке пумо вал. Курыса но вуттӥзы: шоркар сярысь закон, пе, юнматоно.

Город Думалэн йырыз Олег Гарин шуиз:

— Бюджетэ данакез коньдон люкаське Ижысь предприятиосысь, нош шоркаре со ог 4 процентэз гинэ кыле. Сюрес фондэ но коньдон люкаське Ижысь автомобилистъёслэсь — бензинлы акцизъёс чотын. Но со но быдэс республикая огкадь люкылӥське. Тодамы возёно: шоркарлэн тусызъя дунъяло быдэс Удмуртиез.

Но глазовъёслэн асьсэлэн малпанзы вылэм: Ижлы, пе, мукетъёсызлы сярысь, коньдон котьку тросгес сюре, кылсярысь, толлы дасяськонлы ик. Энергетикая, ЖКХ-я но тарифъёсты кун ласянь радъянъя министр Иван Маринин оскытыны выриз: нокинэ сыџе-таџе ум кариське.

Отӥяз егитъёс ӵектонэн потӥзы: пӧртэм проектъёссэс улонэ пыӵатыны луонлыкъёс кылдытоно. Синпелетъёс понна сюлмаськисьёс куризы: Ижысь Иван Пастуховлэсь музей-корказэ выльдоно, вунэтоно ӧвӧл, вуоно арын 100 ар тырме Октябрь революцилы.

Калык вераськем бере журналистъёслы мылкыдзэ вераз Бюджетъя, вытъя но коньдон ужпумъёсъя ялан ужась комиссилэн кивалтӥсез Софья Широбокова:

— Таӵе кылзонъёс туж пайдаё луозы бюджетэз кутон бордын ужасьёслы но, шаерамы улӥсьёслы но. Кенешон дыръя чузъяськем мылкыдъёсты лыдэ басьтыны тыршом. Таӵе амалъя ик мед ужалозы город Думаос но, Депутатъёслэн ёросъёсысь Кенешъёссы но.

Элина Кумачёва

 

 

Удмурт Дунне
By Удмурт Дунне Ноябрь 7, 2016 12:03