Ӵошен гинэ асьмеос — кужым!

Удмурт Дунне
By Удмурт Дунне Ноябрь 7, 2016 11:42

4-тӥ ноябре Россиын пусйиське Калык огазеяськон нунал. Удмуртиын 130 пала пӧртэм выжыысь калыкъёс уло. Котькудӥзлэн аслаз кылыз, аслаз культураез, сям-йылолъёсыз. Но ваньзэсты огазея Удмуртиез яратон.

exact_600x280_img_3422

Мария Царёва, егитъёслэн «Вместе» ассоциацизылэн координаторез:

—  «Вместе» ассоциацие туннэ пыро удмурт, ӟуч, бигер, еврей, армян, азербайджан, немец, пор но корей егитъёс. Ваньмы огкылысь, одӥг мылкыдын пӧртэм ужпумъёсты сэрттон-пертчон борды басьтӥськиськом. Кӧня ке арзэ ни радъясько пӧртэм калыкъёслэн лагерь сменаоссы, ваньмызлы ик туж кельше визез сынанъя «Этноэксперт» шудон. Туэ гинэ кылдытэмын калык кусыпъёсъя тодон-валанэз будэтонъя центр. Отын визь-кенеш басьтыны быгатозы вань мылкыд карисьёс.

exact_600x280_img_2919

Сергей Антуганов, Удмуртиысь бесерманъёслэн огазеяськонэнызы кивалтӥсь:

— Ми асьмемыз Удмуртилэн марӟанэныз лыдъяськом — удмуртъёслы тупаськом но, ум но. Огазеяськонмы ог 26 ар талэсь азьло кылдӥз. Соку асьме сярысь дӥсьтытэкгес вералляны кутским — валалозы меда? Нош али югдур чылкак мукет — милемыз асьсэлэн каризы! 2010-тӥ арын ортчем переписья бесерманъёс 2 сюрс 12 кузя гинэ кылемын на. Озьы ке но юскиськеммы уг потты. Ужало культурая центръёсмы но, кырӟась-верась коллективъёсмы но. Ми пӧлысь потэмын тодосчиос, гожъяськисьёс, политикъёс. Калыкмы зћбыт, ужась. Но туж сюлмаськытэ гуртъёсмылэн пумен быремзы. Туэ тани пытсазы ни Юкаменск ёросысь Шамардан школаез — дышетскисьёсыз ӧжыт кылизы. Та муген ик уг ужа ни Турчиноысь покчиослы школа но. Нош школа пытсаське ке, гурт но ышыны ӧдъя. Та понна янгыш карыны уг луы кивалтэтэз. Но урод ӧй луысал бесерманъёсты утёнлы сӥзем программа кылдытыны.

exact_600x280_img_3370

Рамзия Габбасова, Удмуртиысь бигеръёслэн улосвыл автономиенызы кивалтӥсь:

— Удмуртиын 98 сюрс пала бигеръёс, вань калык пӧлысь ог 7 процентэз. Милям но сюлмаськонмы — егитъёс вунэтыны кутско анай кылмес. Соин ик вань кужыммес сётӥськом кылмес но, культурамес но утён понна. Удмуртиын талы луонлыкъёс кылдытэмын. Татын усьтэмын  Эшъяськон юрт, ужа Нациосын ужан политикая министерство. Ижысь кӧня ке школаосын усьтэмын бигер классъёс, вань гимназия. Ми ортчытъяськом пӧртэм ужрадъёс. Тросаз пырисько мукет выжыысь калыкъёс но. Кылсярысь, Сабантуй кемалась огъя праздниклы пӧрмиз.

exact_600x280_arakelyan

Мнацакан  Аракелян, Удмуртиысь армянъёслэн «Урарту» огазеяськонэнызы кивалтӥсь:

— Удмуртия — мынам доре, нылпиосылэн вордскем интызы. Татысь калыклэн поттэм сиён-юонэныз мон сюдӥсько пиналъёсме, татысь калыклэн ӟеч мылкыдыныз улӥсько. Мукет ӟеч интыез мон уг тодӥськы. Сое ноку вӧсь уг кары. Татын вань армян черк, армян библиотека, армян шайвыл… Кызьы мон та интыез мурт карыны кулэ?  Лыктӥ тапала Совето Союз вакытэ — мурт шаеръёсы ӧй мыны, аслам странаям ик. Озьы сюрсъёсын вуизы мукет калыкъёс но — азербайджанъёс, грузинъёс но мукетъёсыз.  Толон гинэ дорам куное вуылӥзы 3 удмурт, 2 бигер, 1 грузин, 2 армян — теннисэн шудӥм. Вераны луэ шат, кудзы соос пӧлысь уродгес, кудзы ӟечгес?

Быгатӥськом-а ог-огмес валаны, эшъяськыны — асьме бордысь потэ. Юнме уг верало, дыр: кызьы вазёд, озьы ик тыныд берытскоз. Котьку, котькыӵе учыре вунэтоно ӧвӧл: ӵошен гинэ асьмеос — кужым!

Элина Кумачёва

Удмурт Дунне
By Удмурт Дунне Ноябрь 7, 2016 11:42